10
Miyalkthu buŋgawayu Djipawuyyu gumurr‐watjmara buŋgawanha Djalamannha
10:1–13 (The Queen of Sheba visited King Solomon)
1 Yo, Godthu guŋga'yurruna Djalamannha, wirrkina dhika muḻkurr‐djambatjkuŋala, ga wirrkina wal'ŋu ḻukunydjakuŋalanydja ŋanya, bitjarra yana liŋgu ŋunhi ŋayi dhawu'‐nherrara ŋanya. Yakana wiripunydja yolŋu balanyarayi bitjan ŋayipi Djalaman, ga dhäwuny'tja dhika buḻwaŋ'thurrunana nhanukalaŋuwuy Djalamangalaŋwuy bena‐wala barrkulilina wäŋalili, warrpam'nha mulkana. Ga ŋunhala Djepa yäkuŋura wäŋaŋura ŋäkula nhanukalaŋuwuy Djalamangalaŋuwuy, ga buŋgawayu miyalkthu ŋäkulayi, bala ŋayi waŋananydja bitjarrana, “Ŋarra yurru marrtji balayi bay', Djurutjalamlili, ga maḻŋ'marama yurru ŋanya. Ŋarra yurru ŋanya gatjarr'yun, dhä‐wirrka'yun ŋanya yukurra ḏälmirriyuna dhärukthu,” bitjarra ŋayi waŋana ŋunhi miyalk buŋgawanydja.
2 Bala yana ŋayi djoṉguŋala marrtjina mundhurr malanha, ḻatju'mirrina dhika yana girri' malanha gänharawu nhanŋu Djalamangu, bala yana ŋayi marrtjinana‐wala. Marrtjinana ŋayi yukurrana ga‐ga‐ga‐ga‐a‐a, ga ŋunhala Djurutjalam ga bur‐way bunanana ŋayi Djalamangu, ga ŋunhalayina ŋayi waŋanana yukurrana dhä‐wirrka'yurrunana ŋanya Djalamannha.
3 Ga ŋayinydja Djalamandhunydja yaka ŋula buku‐meṉguŋala ŋunhiyi dhä‐wirrka'yunara nhanukuŋu, ḏe'ŋu‐ŋupanara, yana ŋayi marrtjina lilinydja yana buku‐ruŋiyinmaraŋalanydja waŋana dhunupa warray marrtjina yana, yakana ŋula ŋoy‐ḏälthina nhanŋu. Ŋayi marŋgina warrpam'nha, bukmakkuna.
4 Ga ŋunhiyi miyalkthunydja ŋuriŋinydja wäŋawuy Djipawuynydja dharaŋarana ŋanya, ŋunhi ŋayinydja yuwalk warray muḻkurr‐djambatj, gaḏaman dhika ḏarramu, wirrkina wal'ŋu.
5 Ga bitjarrayi ŋayi liŋgu nhäŋala ŋunhi wäŋanydja dhika, ŋanyana dhapirrknha dhika bäymana, ga nhäŋala ŋayi bukmaknha nhanŋu ŋunhiliŋumi djämamirrinha walalanha dhika nhä ŋatha malanha, ga wirrkina ŋayinydja ŋunhinydja miyalktja ṉirryurruna dhika.
6 Ga waŋana ŋayi ŋunhiyi dhäyka bitjarra nhanukala Djalamangala, “Ŋunhala yawungu ŋarrakiyingala wäŋaŋura, ŋarra ŋäma nhokalaŋuwuy yawungu, ŋunhi nhenydja dhuwala wirrkina wal'ŋu gaḏaman.
7-8 Yakaŋga ŋarra yawungu märr‐yuwalkthirrinydja, bala yawungu ŋarra marrtji ŋarrapina lili, ga maḻŋ'marama ŋarrapina nhäma yawungu. Ga yuwalk warray dhuwala yulŋunydja. Nhenydja dhuwala yuwalknha wal'ŋu gaḏaman dhika, ga wirrkina marŋgina wal'ŋu, ga wirrkina wal'ŋu ḻukunydja. Yana ŋarra ŋäkulanydja yukurrana märr‐ḻurrkun' ŋäthilinydja, ga nhenydja dhuwala biyapul warray‐wala waŋarr, djuḻkmarama warray wal'ŋu yukurra nhä walala yukurrana ḻakaraŋala ŋäthili‐wala.
9 Nhuŋunydja Garray Waŋarr ḻatju' warray wal'ŋu, wirrki warray dhika; ŋayi yukurra märr‐ŋamathirri Yitjuralpuyŋuwunydja wirrki warray, ga nherrara ŋayi nhuna ŋurruŋukuŋala walalaŋgu, märr yurru nhe yukurra djäka walalaŋgu yuwalkkuma yana walaŋguma.” Bitjarra ŋayi yukurrana ŋuriŋi dhäykayu waŋananydja Djalamannha.
10-12 Bala ŋayi wekaŋalana nhanŋu guḻku'na dhika mundhurrnydja malanha ḻatju'mirrina.
13 Ga bitjarra bili ŋayinydja Giŋ Djalamandhunydja buku‐ruŋiyinmaraŋala wekaŋala mundhurr nhanŋunydja ŋuriki dhäykawunydja; ga ŋayinydja wekaŋalayi nhanŋu ŋunhi ŋayi bukmakku nhäku malanyŋuwu ḏukṯukthina yukurrana. Bala ŋayi ŋunhiyi miyalktja ga nhanŋu djämamirrinydja walala marrtjinana roŋiyinana walalaŋgiyingala wäŋalilina.