10
Djatjuwayu walŋakuŋala Gipiyannha miṯtjinha goŋŋuru miriŋuwala ganydjarryu Godkala
10:1–15 (Joshua rescued the Gibeonites by God’s power)
1 Ga ŋuliŋurunydja dhurrwaraŋuru walala ŋäkulana wiripu‐guḻku'yunydja bäpurru'yu yolŋu'‐yulŋuyu ŋurikiy wäŋawuy Gipiyanbuyŋuyunydja miṯtjiyu, ŋunhi walala ḻundukunharaminana, ga nhinanana walala yukurrana ŋunhilina Yitjuralpuyŋuwalana malawala.
2 Bala walala waŋanhaminanydja bitjanminana, “Gipiyandja ŋunhi ŋutu'na wäŋa, ga yolŋu'‐yulŋunydja ḏarramuwurrunydja ŋunha ḏälmirrina dhika bunharawunydja. Nhäkuna walala yawungu ŋilimurrunhanydja gonha'yuna, ga wapthuna yawungu Djatjuwawalanydja gali'lili?
3-5 Gul' ŋilimurru marrtjina go, nyäṉ'thunna walalaŋgu, ga bumana walalanha Gipiyanbuyŋunhanydja ŋunhanydja.” Bala walala mana'‐manapanminana mala ga mala, goŋ waŋgany ŋurru'‐ŋurruŋunydja ga miriŋu walala walalambala, ga waŋganynha marrtjina malanydja bena dhika miriŋunydja Gipiyanbuyŋuwunydja yolŋu'‐yulŋuwu ŋuriki nyäṉ'thurruna.
6 Ga dhunupana walalanydja ŋunhi Gipiyanbuyŋuyunydja dhäruknha djuy'yunmina bala Djatjuwawalana bitjarra gam', “Go walala, guŋga'yurra ŋanapurrunha. Marrtjiyana lili ga walŋakuŋa ŋanapurrunha. Yaka ŋanapurrunha gonha'yurra,” bitjarra.
7 Bala dhunupana yana ŋayinydja Djatjuwayunydja yurrum'thunmaraŋalana nhanŋuway miṯtjinhanydja ŋunhi bukmaknha dhika, bala yana marrtjinana walala Gipiyanbuyŋuwuna guŋga'yunarawu.
8 Ga ŋayi Garraynydja waŋana Djatjuwawala bitjarra, “Yaka barrariyanydja ŋurikiyi miriŋuwunydja. Ŋay' nhokalana ŋarra wekaŋala walalanha goŋlilinydja. Nhena yurru buma walalanha warrpam'thunna, yakana yurru ŋula waŋgany djingaryundja ga buku‐ruŋiyirrinydja nhuŋu.”
9-10 Yo, Djatjuwanydja ga nhanŋu miriŋunydja marrtjinana‐wala yana withiyarana Gipiyandja wäŋa. Walalanydja ŋuriŋi miriŋuyunydja wal'ŋu nhäŋalana walalanha, walala yukurrana lili marrtjina, bala ŋayi Garrayyunydja walalanha barrari‐wekaŋalana yana, bala walalanydja bilyurruna, bala gundupuŋala yukurrana bitjarrana‐wala. Ga walalanydja Yitjuralpuyŋuyunydja walalanha ŋuparana, buku'‐wukukurruna dhika marrtjina bumara walalanha bala.
11 Bala ŋayinydja Garrayyunydja djuy'yurruna, balanyarana bitjan guṉḏa rarralayinyara, ŋutu'mirrina dhikana guṉḏa guyiŋarrnha marrtjina burruḻ'yurruna, bala dhä‐monyguŋalana marrtjina, ga bukmaknha yana miriŋunha marrtjina muŋdhu'‐muŋdhurrunanydja, guṉḏayunydja marrtjina ŋuriŋi burakina.
12 Yo, galki marrtjina munhakuyinana ŋunhi yulŋunydja, ga yaka yana marinydja dhawar'yurruna ŋunhi, bala ŋayi Djatjuwanydja waŋanana Garraywala ŋuhiliyina gumurrŋura ŋurikalana yolŋu'‐yulŋuwala bukmakkalana, bitjarra ŋayi waŋananydja gam'.
“Walu, djingaryurrana yukirriya yana yulŋunydja,
ga ŋaḻindi djingaryurra yukirriya mukthurra!”
13 Bala yuwalkthi walunydja yukurrana dhärranana, yakana ŋayi giṯthurrunanydja marrtjina gärrinanydja bala, ŋunhilina liŋguna yukurrana dhärrana waŋganyŋurana dharapulŋura weyin‐marraŋalana, yanana liŋgu‐u‐u, gonha walalanha‐a‐a, ga ŋuriŋi Yitjuralpuyŋuyu miṯtjiyu warrpam' wal'ŋu miriŋunha ŋunhi bumara dhawar'maraŋala, bala yurruna munhakuyinanydja.
14 Yo, Garrayyu dhäruk märraŋala yolŋunha wal'ŋu ŋunhiyi, bili Garraynydja gali'ŋura ŋurikala Yitjuralpuyŋuwala, ŋayipi yukurrana ŋunhi bumaranydja walalaŋgala ŋunhi miriŋunhanydja, yakana ŋula ŋäthili bitjarrayi walu yukurrana dhärrana weyin, dhäwulnha.
15 Bala Djatjuwanydja ga nhanŋu miriŋunydja marrtjina roŋi'‐ruŋiyinana wäŋalilina balayi Gilkallilina yäkulili.
Djatjuwayu goŋdhu märraŋalana wäŋanydja, bala barrku'‐barrkuwatjkuŋalana malawu ga malawu