6
Yitjuralnydja yakana ḏukṯukthina Godkalaŋuwunydja romgu malthunarawu
6:16–30 (Israel rejected God’s ways)
16 Yo, Garrayyu waŋa yukurra nhumalanha nhanŋuway yolŋu'‐yulŋunha bitjan, “Nhäŋa marrtjiya ḻarruŋa ŋurikinydja dhukarrwu dhunupawunydja, dhä‐wirrka'yurra biyaka, ‘Wanhaka dhika dhukarr ŋamakurruny'tja wal'ŋu, ŋunhiyinydja ŋunhi ŋayi Garrayyu nherrara ŋäthili?’ Marrtjiya ŋuliwitjarrayi liŋgu dhukarrkurrunydja, bala nhe yurru nhinana yukurra ŋunhilina ŋayaŋu‐wurrkurrum'thirrina.” Yurru nhumanydja waŋana bitjarra, “Yakana ŋanapurrunydja yurru marrtji ŋuliwitjandhinydja dhukarrkurru nhokalanydja,” bitjarra.
17 Ga biyapul ŋayi Garrayyu ḻakaraŋala walalambala yolŋu'‐yulŋuwa bitjarra, “Mäkiri'‐witjurra ŋuruku ya' dhukarr‐nhänharamirriwu yolŋuwu, ŋunha ŋayi yukurra ḻoḻthunmarama yiḏaki, girri'‐ŋamathinyamirriyama yukurra nhuna dharraykuma ga raypirri'yun, liŋgu ŋunhi marinydja yukurra marrtjina lili galkina.” Yurru nhumanydja waŋana bitjarra warray, “Yakana ŋanapurrunydja yurru ŋuriki djawarrkmirriwunydja yolŋuwu mäkiri'‐witjun; yakana ŋanapurru ḏukṯuk ŋurikinydja dhäwu'wu.”
18-19 Bala ŋayi Garraynydja waŋana bitjarra warray, “Mäkiri'‐witjurra nhuma wäŋa malanha bukmak yana, dhuwalanydja walala ŋarrakuwaynydja yolŋu'‐yulŋu yakana ŋarraku yurru mäkiri'‐witjun ga dhäruk märrama, yakana walala ḏukṯuk ŋarrakalaŋuwunydja dhukarrwu. Bitjandhi liŋgu walala yukurra gumurr‐nherraṉdhi ŋarranhanydja, ga dhiyakuyina märrwu ŋunhi marinydja yurru lili marrtji ga bunana walalaŋgu, wirrki yana walala yurru galŋa‐yätjthirrinydja warwumirriyirrinydja ŋuriŋiyi.
20 Walala ŋuli gämanydja ŋarraku buŋgan bäw' dhika nhä malanha, yurru yaka ŋarra ḏukṯuk walalaŋgalaŋuwu ŋurikiyi mundhurr‐wekanharawunydja; yakana walala yurru marrtji galkithirrinydja ŋarrakala ŋuriŋi wäyindhunydja bathanarayu.
21 Ŋarra yurru ŋula nhäna gurrunhan gunganhamirriyama dhukarrlilinydja ŋunhiwalanydja, märr walala yurru dhä‐ŋal'yunna ga galkirrina; walala yurru murrmurryundja rrambaŋiyirrina bäpa'mirriŋu ga gäthu'mirriŋu nhanŋu, ga ḻundu'manydji walala yurru murrmurryunna bukmakthirrina.”
22 Yo, bitjanna ŋayi yukurra Garray waŋanydja, “Nhäŋa ya', miriŋunydja yukurra marrtjina lili beŋuru ḻuŋgurrma'ŋurunydja, mirithirri guḻku'na miriŋu dhaŋaŋnha.
23 Yo, ŋunhiyinydja yolŋu'‐yulŋu ŋoy‐wurrpu'mirrina mel‐wuyunamiriwnha walala, ga marrtjinydja walala yukurra dhuwala lili mandjawakmirri dhika nhämirrina walala, bala walala yurru baḏuwaḏuyunna yanana nhumalanha Djurutjalam yulŋunydja warrpam'nha.”
24 Ga walala yolŋu'‐yulŋunydja waŋana bitjarra, “Yo, ŋäkula warray ŋanapurru ŋunhi yulŋunydja miriŋunhanydja walalanha marrtjinyaranydja lili, bala ŋanapurru yukurra marrmarryunmirrina dhuwala yulŋunydja barrariyuna, ŋoy‐wilwilyunmirrina yukurra ŋanapurrunydja dhuwala.
25 Yakana ŋanapurru yurru marrtji ḏiltjilili, ga dhukarrkurru ŋanapurru yurru yakana marrtji, liŋgu miriŋunydja walala birrka'mirrina dhika ŋayan'‐dharra marrtji ŋanapurruŋgu, ga ŋanapurrunydja yukurra barrarirrina dhuwala mirithirrina.”
26 Yo, bala ŋayi Garrayyu ḻakaraŋala yolŋu'‐yulŋuwanydja bitjarrana, “Buku‐yirryirryurrana biyakana ŋäthinyamiya manaparra, biyakana bitjan ŋuli ŋäṉḏi'mirriŋu ŋäthi nhanukalaŋuwu yothu'wu rakunygu, liŋgu galki yurru miriŋunydja marrtjina, bumana marrtji yurru baḏuwaḏuyunna nhumalanha.”
27 Bala ŋayi Garray waŋana bitjarrana ŋarrakala, “Way Djiramaya, gatjarr'yurra dhuwali yolŋu'‐yulŋunha ŋarraku; maḻŋ'maraŋa walalaŋgala nhäyinyaraŋura romŋura walala yukurra nhinanydja.
28 Bala nhe yurru maḻŋ'maramanydja ŋunhi walalanha ŋayaŋu‐wuṉḏaŋarrmirrina, bitjanna liŋgu walala yukurra djäma walalaŋgalaynha yana djälyu; bukmaknha ŋunhi walala yulŋunydja yätjmirrina yanana wal'ŋu, marrtji walala ŋuli yukurra dhäwuny'tja birrŋ'marama bothinyarayŋuna ḻakaranhamirri.
29 Ga ŋunhiyi marinydja balanyarana bitjan worrk. Yo, ŋarranydja bini ŋunhi bitjana ḏarrtjalkkunha walalanha ŋuriŋiyinydja gurthayunydja, yurru ŋarrakunydja ŋunhi yolŋu walala yaka warray ḏarrtjalkthina; mukthun yana walala djäma yukurra ŋunhiyi nhäŋiniŋ' rom, yaka yana walala gonha'yurruna walalaŋguway yätjtja.
30 Bala ŋarranydja yurru walalanha ḻakaramanydja ŋayaŋu‐djarrpi'na, nhäŋiniŋ'nha yanana bitjanna; liŋgu ŋarra walalanha gatjarr'yurruna, bala maḻŋ'maraŋalanydja yätj warray.” Ga bitjarra ŋayi Garray waŋananydja.