11
Djiramayayu yukurrana ḻakaraŋala ŋurikiynha dhawu'‐nherraṉarawuynha ŋunhi ŋayi Godthu nherrara
11:1–23 (Jeremiah told about the covenant)
1-5 Yo, Garray waŋana ŋarrakala bitjarra, “Marrtjiya bala ŋunha yolŋu'‐yulŋuwala wäŋalili Djurutjalamlili ga Djudiyalili makarrlili, ga ḻakaraŋa walalambala biyaka, ‘Ŋunhi ŋarra ŋurruthaŋalanydja nherrara dhawu' nhumalaŋgalaŋuwala märi'muwala, ŋarra waŋananydja bitjarra gam' ḻakaraŋalanydja. Marinydja yurru bathala yana marrtji ŋurikinydja yolŋu'‐yulŋuwu ŋunhi walala yurru yaka dhäruk märrama ŋarranha. Ŋarra ḻakaraŋalanydja walalaŋgu bitjarra, “Ŋuli nhuma yurru dhäruktja märrama ŋarranha, ga ŋayathamana yukurra ŋarraku ḏälkumana romdja, bala nhumanydja yurru ŋarrakuwaynha wal'ŋu yolŋu'‐yulŋu, ga ŋarranydja yurru nhumalaŋgu God, bala nhumanydja yurru nhina yukurra biyapulnha wal'ŋu goŋmirriyirrina ŋunhiliyi ḻatju'ŋuranydja dhikanydja wäŋaŋura, ŋunhi ŋarra yurru wekama nhumalaŋgu.” Dhuwalayina ŋunhi dhawuny'tja ŋarra nherrara nhumalaŋgalaŋuwala märi'muwalanydja walalaŋgala.’ ”
Ga ŋarranydja waŋana bitjarra, “Yo Garray, ŋarra yurru marrtjinydja, ga ḻakaramana walalaŋgu.”
6 Bala ŋayi djuy'yurrunanydja ŋarranha waŋana bitjarrana, “Marrtjiya ga ḻakaraŋa ŋuripa yolŋu'‐yulŋuwanydja, märr yurru walala ŋäma yana wal'ŋu dhuwalayi dhawuny'tja ŋunhi ŋarra nherrara, märr yurru walala marrtjinydja yukurra ŋuliwitjandhi liŋgu romgurrunydja ŋunhi ŋarrapi nherrara.
7-8 Bitjarra liŋgu ŋarra yukurrana raypirri'yurrunanydja, dharraykuŋalanydja waŋananydja, yurru walalanydja yaka warray mäkiri'‐witjurruna ŋarraku, yaka warray walala märraŋala dhäruk ŋarranha. Bukmakthina warray walalanydja ŋayaŋu‐wuṉḏaŋarryina, ga mukthurruna‐wala yana walalanydja djäma ŋunhiyi warray walalaŋguŋuway warray guyaŋinyarawuy, djarrpi'kunhara warray, bala märraŋalanydja walala yukurrana ŋunhina marina yana ŋunhi ŋarra ḻakaraŋala ŋäthili ŋurikiyi dhäruk‐märranhamiriwwunydja walalaŋgu, ŋulinyaramirriyu ŋunhi ŋarra nherrara dhawu' ŋunhiyi.”
9-10 Yo, ŋayi Garray waŋananydja bitjarrayi ŋarrakala, “Ŋarrakunydja ŋunhi yolŋu walala yaka ḏukṯuk malthunarawu ŋarraku, walala gonha'yurruna ŋarranhanydja, bala walala yukurra malthundja ŋunha walalaŋgalaŋuwu märi'muwuna walalaŋgu, ŋurikina walalaŋgu ŋunhi walala ŋuyulkthina yarryurruna ŋarraku, ga buku‐ŋal'yurruna wiripuŋuwuna waŋarrwu.
11 Bala dhiyaŋunydja‐wala ŋarra yukurra walalanha girri'‐ŋamathinyamirriyamana waŋa raypirri'yunna. Märr‐yuwalk ŋarra yurru yana baḏuwaḏuyundja walalanha ŋuriŋina bathalayuna gal'ŋu mariyunydja. Walala yurru gawaw'yun märrliliyama guŋga'yunarawu ŋarrakala, yurru ŋarranydja yakana yurru mäkiri'‐witjun walalaŋgu.
12-13 Walala ŋuli yukurra buku‐ŋal'yun wiripuŋuwuna waŋarrwu malaŋuwu, yurru ŋunhiyinydja ganydjarrmiriw warray, nhäŋiniŋ'nha yana; yakana ŋuriŋiyinydja walalay waŋarryu yurru guŋga'yun ga walŋakuma walalanha.
14 Djiramaya, yaka waŋiya bukumirriyaŋa ŋarranha walŋakunharawunydja walalaŋgu. Ŋunhi walala yurru marililinydja gärri, walalanydja yurru märrliliyama yana gawaw'yun ŋarrakala guŋga'yunarawunydja, yurru ŋarrapinydja yurru yakana walalaŋgu mäkiri'‐witjun.”
15 Yo, ŋayi Garraynydja waŋana bitjarra, “Ŋunhiyinydja yolŋu walala ŋarrakuway yana dhulŋuŋu, wirrki yana ŋarra yukurra märryu‐ḏapmaramanydja walalanha, yurru yätj warray walala yukurra djämanydja, mirithirri warray. Yakana yana ŋarra yurru märrama walalaŋguŋu ŋunhi mundhurrnydja malanha buku‐wekanharanydja, liŋgu walalawuynydja ŋunhi yukurra märr‐nherraṉmirri ŋuriki wiripuŋuwuna waŋarrwu.
16 Ŋäthilinydja ŋunhinydja miṯtji balanyara bitjan dharpa ḻatju'mirri, borum‐mäypamirri dhika wal'ŋu, yurru dharpanydja ŋunhiyi marrtjina yätjthina warray, bala ŋarra yurru ḏaw'‐ḏawyunna baṉdja'‐baṉdjanydja malanha, guḻk‐guḻkthunna yana marrtji, ga man'tjarrnydja ŋunhi ŋarra yurru gurthayuna dhuŋgur'yun.
17 “Yo, Yitjuralnydja dhuwala miṯtji balanyarana bitjan dharpa ŋunhi ŋarrakuŋu ḻämu‐nherraṉara. Yurru yuwalk yana ŋarra yurru dhä‐ḏir'yundja ŋunhiyi miṯtjinha bäpurru'nha, ga ŋunhiyinydjayi walalaŋguway ŋurru, liŋgu walala ŋarranha ŋuriŋinydjayi ŋaramurr‐wekaŋalana yanana, ŋunhi walala yukurrana mundhurr‐wekaŋala buku‐ŋal'yurruna wiripuŋuwu waŋarrwu.” Ga bitjarra ŋayi Garray waŋananydja.
18 Bala ŋarra marrtjinana‐wala yana, ga ḻakaraŋalana marrtjina ŋuripa yolŋu'‐yulŋuwanydja ŋanya, bala wiripu‐guḻkuny'tja yolŋu walala yukurrana ŋayan'‐dharrana ŋarraku bunharawu murrkay'kunharawuna, yurru ŋayinydja Garrayyunydja milkuŋala warray ḻakaraŋala ŋarrakala.
19 Ŋäthilinydja ŋunhinydja ŋarra märr‐nherraṉmina walalaŋgala, liŋgu yaka ŋarra dharaŋara ŋunhi walala bini bunha ŋarranha. Ŋarra yaka marŋgi ŋunhi walala yukurrana waŋana buku‐ŋamaŋamayunmina bitjarra, “Gul' ŋilimurru bumana ŋanya, walŋana dhawar'marama nhanŋu, märr yurru ŋilimurru baḏuwaḏuyun yäkuna ŋanya ga nhanŋu dhäwu'.”
20 Bala ŋarra bukumirriyaŋalanydja Garraywala bitjarrana, “Garray, nhenydja ŋuli bitjan warray liŋgu djäma dhunupa warray yana wal'ŋu, ga nhe marŋgi yolŋuwalaŋuwu guyaŋinyarawuywunydja ga ŋayaŋuwunydja. Ŋarra dhayuŋanmina ŋarranhawuynydja ŋarra nhokalana goŋlili; nhepina yurru ŋurikiyinydjayi walalaŋgu buku‐ruŋinyamaranharawuy wekama, ŋunhi walala yurru djäma yätj ŋarraku.” Bitjarra ŋarra bukumirriyaŋalanydja yukurrana.
21 Yo, ŋurukuynydja yolŋu walala Yanathuwuynydja yukurrana ŋayan'‐dharrana ŋarraku bunharawuna murrkay'kunharawuna; walala waŋananydja bitjarra ŋarrakala, “Ŋuli nhe yurru mukthun yukurra waŋa yäkuyu Garraywalanydja, ŋanapurru yurru bumana yana nhuna, murrkay'kumana.”
22 Ga ŋayinydja Garraynydja waŋana bitjarra, “Ŋarrapi yurru ŋunhiyinydjayi buku‐ruŋinyamaranharawuy wekama dhä‐ḏir'yunaranydja; walala yurru murrmurryunna, bunhara ŋurikiŋina miriŋuwuŋuna mandjawakpuynha, ga yumurrkuny'tja walalaŋgu yurru marrtji murrmurryun ŋuriŋi marrya'yinyarayuna.
23 Yakana ŋula waŋgany yolŋu ŋurikiy miṯtjiwuy yurru walŋanydja nhina; walala yurru warrpam'thuna yana murrmurryundja marrtji, ŋulinyaramirriyunydja waluyu ŋunhi ŋarrapi djarr'yurruna walalaŋgu nherrara dhä‐ḏir'yunarawu.” Ga bitjarra ŋayi Garray waŋananydja.