2
Djawuptja mukthurruna yana märr‐nherraṉmina Godkala
2:1–10 (Job kept on trusting God)
1 Ga ŋuliŋurunydja dhurrwaraŋuru, ŋunhala djiwarr'ŋuranydja ŋurukuy bäyma yolŋu'‐yulŋuyu djiwarr'wuyyu withiyan Garraynha biyapul, ga ŋayi Satandja malthun biyapul walalambala.
2 Bala ŋayi Garrayyunydja waŋa dhä‐wirrka'yun ŋanya Ŋäṉuknha, bitjan yana liŋgu bitjarra ŋunhi ŋäthili. “Wanhaŋuru nhenydja dhuwala bunana?” bitjarra. Ga ŋayi Ŋänuktja waŋa buku‐ḏaw'marama bitjan, “Ŋulaŋuru dhuwala ŋarra bay', munatha'ŋuru; marrtji ŋarra ŋuli yukurra wäŋakurru, wirwiryun marrtji buku‐ḻiw'marama.”
3 Ga ŋayi Garraynydja waŋa dhä‐wirrka'yun bitjan, “Nhäŋala muka nhe ŋarrakunydja yolŋunha? . . . Djawupnhanydja? Manymak ŋunhinydja ḏarramu, rom‐dhunupa. Ŋayi ŋuli bitjan liŋgu märr‐ŋal'yundja ŋarrakuway yana, ga gupana‐wekama ŋuli yätjkunydja romgu. Yakana wiripunydja ŋula yolŋu rom‐ŋamakurru' bitjan ŋunhi ŋayi Djawup. Mukthun yana ŋayi ŋuli yukurra märr‐ŋal'yun ŋarrakiyingala, bäyyi ŋunhi nhe ŋurrumiriwŋura bumara dhawar'maraŋala bukmak nhä malanha ŋunhi ŋayi yukurrana ŋayathaŋala.”
4-5 Bala ŋayi Satandja waŋana bitjarra, “Yurru ŋunha ŋayipinydja ŋamakurru' warray Djawuptja. Bäyyi warray ŋunhi ŋuli yolŋuwa nhä malanha winya'‐winyayun dhawar'yundja, ŋayinydja ŋuli ŋunhiyi yolŋu yaka warray ŋayaŋumirriyirri, yurru rumbal warray nhe ŋuli ŋanya ŋula mulkinydja, ŋunhi ŋuli ŋayi rirrikthurru ŋaraka ŋunha ga barrwaṉ, yurruna ŋayi ŋuli ŋula nhuŋu ŋaramurryinydja bäy, ga waŋi rom‐nyamir'yurrunydja nhuna.”
6 Bala yana Garraynydja waŋa nhanukala Ŋäṉukkala bitjan, “Manymak. Gatjala nhenydja marrtjiyana. Nhe yurru mulkiya warray ŋanya rumbalnydja, yana rirrikmaraŋa ŋanya, yurru yaka nhe yurru buŋa ŋanya rakunygunydja.”
7 Bala yana ŋayi Ŋäṉuktja marrtji dhawaṯthunna. Marrtjina ŋayi, bur‐way Djawuppana, bala ŋuliŋurunydja ŋayi Djawuptja rirrikthunna dhulku'mirriyirrina, djiraŋ'mirriyirrina ŋulaŋuru bili muḻkurrŋuru ga ḻukulili wapthun.
8-9 Nhinana yukurra ŋayi Djawup wirrkina dhika galŋa‐miḏikirrinydja, bala nhanukala miyalkthu withiyan ŋanya, ga waŋa ŋanya bitjan, “Way, Godthu nhuna dhuwalinydja rirrikmaranha yawungu. Nhäku nhe yukurra nhanŋu mukthundja märr‐nherraṉmirri? Ma', waŋiya rom‐nyamir'yurra ŋanya Godnha, bala rakunydhiyana.”
10 “Way, nhäna nhenydja dhuwala miyalk? . . . yätjnha? . . . bawa'mirrina?” bitjanna ŋayi Djawupthunydja waŋa. “Ŋunhi ŋuli Godthu wekama nhä malanha manymak ŋilimurruŋgu, ŋali yurru märrama yana nhanukuŋu ŋoy‐ŋamathirri. Nhäku ŋilimurru ŋuli rom‐nyamir'yun Godnhanydja, ŋunhi ŋuli ŋilimurrunha mariyunydja gumurr‐watjman?”
Yo, Djawupthunydja yaka rom‐yätj djäma milma Godkala, yakana ŋayi ŋula rom‐nyamir'yurruna; mukthurrunana marrtjina bala ŋayi märr‐nherraṉmina nhanukiyingalana yana Godkalana.
Djawupku ḻundu'mirriŋu mala
2:11—37:24 (Job’s friends)
11 Yo, ŋuriŋi Djawupkala ḻurrkun'thu ḻundu'mirriŋuyunydja walalay ŋäkula yätjnha dhäwu' Djawupkalaŋuwuy, ŋunhi nhaltjarra yukurrana nhanŋu ŋunhala, bala walala waŋanharaminana, “Ŋilimurru gul' marrtjina. Ŋilimurru ŋanya guŋga'yun, marrparaŋ'kuma ŋanya,” bitjanmirri.
12 Marrtjinydja walala bala‐a‐a, dharr‐way nhäma ŋanya Djawupnhanydja, ŋayi nhina djingaryun; gulkuruna walala dharaŋandja ŋanya bukunydja, ŋamumana walala ŋanya nhämanydja, yana bini ŋula yol wiripuna yolŋu, bala walala nyä'yunmirrina gay', bena nyä'yunmirri wiṯthunna nhanŋu.
13 Walala nhinanydja yukurra ŋunhili 7 walunydja ŋupan, yurru dhäruk‐mukthunna walala yukurra nhinanydja ŋunhi, yakana ŋula waŋanhamirri, liŋgu nhanukala rerriŋura.