54
Garrayyu märryu‐ḏapmarama yukurra Djurutjalamdja
54:1–17 (The Lord loves Jerusalem)
1 Yo, nhe Djurutjalam wäŋa, nhenydja dhuwala balanyarana biyaku ŋuli yothumiriwnha miyalk,
yurru goŋmirriyiya yulŋunydja märr‐yiŋgathiya,
liŋgu nhenydja yurru djamarrkuḻi' mäypamirriyirrina.
2 Dhuwalanydja gay' nhuŋu ḏalwaḏalwany'tja wäŋa wunhdhur yutjuwaḻa.
Ma' djäma biyaka yindikuŋa wal'ŋu dhaḻakarrmirriyaŋa, ga ḏälkuŋa biyapul,
liŋgu mirithirri guḻku'na yurru yolŋunydja walala marrtji dhipalanydja nhokalanydja wäŋalili, bala nhinana yurru.
3 Dhiyaŋunydja‐wala dhuwalanydja nhuŋu wäŋa goŋŋura mulkuruwala,
yurru biyapul ŋayi yurru dhuwalayi wäŋa nhuŋuwayyi yulŋunydja,
dhaŋaŋdhirrina yurru miṯtjiyu nhokalay yolŋu'‐yulŋuwalanydja.
4 Yaka barrariyanydja, yakana biyapulnydja nhe yurru buku‐wura.
Nhe yurru meṉgumana ŋurikiy ŋäthiliŋuwuynydja ŋunhi nhe gonha'yurruna ŋanya Garraynha,
ga yakana nhe yurru biyapul guyaŋirri yukurra balayi roŋiyirrinydja, ŋunhi nhe ŋuli yukurranha nhinanha gäna wal'ŋu,
bitjana bitjan ŋuli dhuway‐rakunymirri yolŋu nhina yukurra gäna.
5 Yo, Godthu Garrayyu ŋayipi nhuna djämanydja,
ga ŋayipi yana yurru nhuŋu djäkanydja yukurra,
bitjanna ŋayinydja yurru bitjan dhuway'mirriŋuna ŋayi nhuŋu.
Yäkunydja ŋayi ŋunhi God Garray, Yitjuralwunydja Ganydjarr‐ḏumurru wal'ŋu Waŋarr,
ga buŋgawa ŋayi ŋurruŋu dhiyakunydja wäŋawu bukmakku yana buku‐ḻiw'marama;
ŋayina yurru ŋuriŋiyina nhuna walŋakumanydja.
6 Yitjural, nhenydja dhuwala balanyara bitjan yuṯa nhe dhäyka, ŋunhi ŋayi dhuway'mirriŋuyu gonha'yurruna ŋanya,
nhenydja ŋunhi galŋa‐yätjthina wirrki yana, ŋunhi ŋayi Garrayyunydja nhuna gonha'yurruna,
yurru dhiyaŋunydja‐wala ŋayi yukurra gawaw'yunna nhuŋu roŋinyamaramana nhuna nhanukalaynha ŋayi.
7 Ŋayi yukurra waŋanydja bitjan, “Ŋarra gonha'yurruna nhuna yana gurriri,
yurru märr‐ŋamathirrinydja ŋarra nhuŋu yukurra mirithirri yana wal'ŋu,
biyapul nhenydja yurru ŋarrakuwaynha yana wal'ŋu dhulŋuŋuna.
8 Ŋarra ŋoy‐djingaryurruna nhokalanydja, bala ŋarra bukunydja gunganhaminana ŋarranhawuy ŋarra,
yurru yana gurriri ŋunhi yulŋunydja;
Ŋarra yurru mel‐wuyundhi nhuŋu,
liŋgu ŋarra yukurra märr‐ŋamathirrinydja nhuŋu märryu‐ḏapmarama yana nhuna gupaḏalnha‐wala.”
Bitjan yukurra nhuŋu walŋakunhamirrinydja Garray waŋa.
9 “Ŋulinyaramirriyunydja Nowamirriyunydja wäŋayu ŋarra dhawu'‐nherrara bitjarra gam'.
Yakana yana biyapulnydja yurru dhuwala wäŋa munathany'tja monygunhara gapuwuŋu.
Ga dhiyaŋunydja‐wala bitjan yana liŋgu ŋarra yukurra dhawu'‐nherraṉdhi,
yakana ŋarra yurru biyapul ŋoy‐dharra nhuŋu,
yakana ŋarra nhuna yurru dhä‐ḏir'yun biyapulnydja.
10 Ŋunha bukunydja wäŋa yurru buḻwaŋ'thunna marrtji, muṉguythirrina buku‐yupthunna,
yurru ŋarrakunydja märr‐ŋamathinyara yurru yukurra djingaryun yana,
bitjanna liŋgu gupaḏalnha‐wala yana ŋarra yurru yukurra märr‐ŋamathirrinydja nhuŋu.
Ŋarra yukurra dhawu'‐nherraṉ dhuwala yulŋunydja nhokala bitjandhiyinydja,
nhe yurru nhina yukurra ŋayaŋu‐yal'yunna wal'ŋu ŋarrakalaynha nyeyaḻŋura,
ga yuwalknha yana ŋunhiyi dhäruktja yukurra yurru djingaryunna yana, djambimiriwnha.”
Ga bitjarra ŋayi Garray waŋananydja, ŋunhinydja ŋunhi ŋayi mel‐wuyunaramirrinydja.
11-12 “Ŋarraku wäŋa Djurutjalam, mirithina yana nhe yukurrana ŋayaŋu‐yätjtjinanydja ŋuriŋiyinydjayi dhalawandhunydja,
yakana ŋula yolthu marrparaŋ'kuŋalanydja gunganhamirriyaŋalanydja nhuna,
yurru ŋarranydja yurru biyapul nhuna dhärranhamaramayi yuṯakumayi nherraṉ,
nhe yurru dhärra dhika dhapirrkthirrina wal'ŋu wuṉḏaŋarryirrina.
13 Ŋarrapi Garrayyu yurru marŋgikumanydja marrtji nhumalaŋgu yumurrku'nhanydja bala,
ga walalanydja yurru yukurra bitjanna liŋguna nhina ŋayaŋu‐yal'yunaraŋurana yana.
14 Nhe yurru dhärra wuṉḏaŋarryirrina yana, liŋgu nhe yukurra yurru nhina ŋarrakalana ŋunhilina rom‐dhunupaŋurana.
Yakana yurru walala miriŋunydja marrtji galkithirri wal'ŋu nhokala,
ga yakana nhe yurru barrarirri ŋula nhäkunydja.
15 Ŋunhi yurru ŋula yol yolŋu marrtjinydja bunharawunydja nhuŋu,
ŋunhiyinydjayi mari marrtji yukurra yaka ŋarrakuŋunydja;
Ŋunhiyinydjayi mari‐djämamirrinydja yurru yana galkirrina winya'yunna‐wala yana,
liŋgu ŋarranydja dhuwala nhokala warray gali'ŋura.
16 “Ŋunhinydja ŋunhi ŋayi gara‐djämamirri yolŋu, ŋunhiyinydja djämawuy ŋarrakuŋuway,
ga balanyarayi liŋgu ŋarranydja dhuwala walŋa‐wuḻkthi.
17 Ga ŋuli nhuna yurru ŋula yolthu buma ŋula nhäyu,
yakana nhuna yurru ŋuriŋi murrkaynydja buma;
Ŋuli ŋayi yurru ŋula yol yolŋu waŋa yukurra yätj‐ḻakaramanydja nhuna,
walalanydja yurru nhämana warraŋulnha wal'ŋu ŋunhiyinydja yolŋunha ŋunhi ŋayinydja bothinyaramirrina wal'ŋu.
Nhenydja dhuwala ŋarrakuway yana djämamirri,
ga ŋarrapi yana nhuna gunganhamirriyamanydja yukurra,
ga bitjandhi liŋgu yana nhuŋu miriŋunydja yurru waṉḏirriyi, gumurr‐wanandhi.” Bitjarra ŋayi Garray waŋananydja.