41
Godthu yana ŋayipi yurru walŋakuma yolŋu'‐yulŋunhanydja
41:1–20 (God promised to help his people)
1-4 Yo, Godtja waŋa yukurra bukmakku wäŋawu bitjan gam', “Ŋäka walala, mäkiri'‐witjurra ŋarraku nhuma bukmak miṯtji buku‐ḻiw'marama. Go marrtjiya lili, ŋilimurru yurru waŋanharamirri yukurra rrambaŋina. Ŋunhi ŋuli ŋula nhä maḻŋ'thundja, nhäŋuru ŋunhiyinydja? Yolkala ŋunhiyinydja djämayu ŋuli maḻŋ'thun bitjandhiyinydja? Bukmak nhä malanha maḻŋ'thundja ŋuli yukurra liŋgu ŋarrakala yana djämayu, liŋgu ŋarra dhuwala God, ŋunha ŋarra ŋurruŋura, ga ŋunha ŋarra dhä‐yawar'yunaraŋura yurru.
5 “Yolŋu walala dhiyalaŋumi munatha'ŋuranydja nhäma ŋuli ŋarraku djämanydja ŋunhiyi, bala walala ŋuli barrarirrina yulŋunydja, wilwilyunna marrmarryunna barrariyuna manapan.
6-7 Bala walala ḻiw'maranhamirrina ŋuli yukurra waŋganylilina, bitjan marrparaŋ'kunhamirrina guŋga'yunmirrina bala‐lili'yunmirri. Bala walala ŋuli djäma ŋunhiyina ŋula nhäna maḏayin'kuma warkthun goŋdhuna, ḻatju'kumana dhikana dhapirrkkumana ŋuli, bala walala ŋuli dhärranhamaramanydja, mam'maramanydja ŋuli ḏälkumana yana wal'ŋu wuṉḏaŋarrkumana, yanapi ŋuriŋiyinydjayi waŋarryu yukirri ŋayathaŋu ganydjarr walŋakunharawu walalaŋgu.
8 “Yurru nhumanydja dhuwala ŋarrakuway yolŋu'‐yulŋu, ŋarrakuŋuway djarr'yunara yana, beŋuru bili yarraṯaŋuru Yipurayimgala ŋunhi ŋayinydja ŋarraku ḻundu.
9 Ŋarranydja nhumalanha gäŋala beŋuru barrkuŋuru, ḻuŋ'thunmaraŋalanydja lili nhumalanha ŋarrakiyingalana ŋarra, bala ŋarra waŋananydja nhumalanha bitjarrana, ‘Nhenydja dhuwala ŋarraku djämamirri, ŋarrakuŋuway yana djarr'yunara; yaka ŋarra nhuna ŋurrkaŋalanydja, gumurr‐nherraranydja.
10 Yaka nhe barrariyanydja, liŋgu dhuwala ŋarra galki nhokala. Yaka be wilwilyurranydja, liŋgu ŋarrapi nhuŋu Waŋarrnydja dhuwala Godtja. Ŋarra nhunanydja yurru ganydjarrmirriyama, ga guŋga'yun ŋarra yurru nhuna; ŋarrapi yurru nhuna gunganhamirriyamanydja ga walŋakumanydja.’
11 Yo, ŋunhinydja walala yolŋu'‐yulŋu ŋunhi walala yukurra ŋoy‐djingaryun nhuŋu, walalanydja yurru ŋunhi gorana, bala gulkuruna walala yurru maḻŋ'maramanydja yukurra. Yo, walala bini ŋurrkanha muka nhuna yulŋunydja, yurru gulkuruna, ga walalawuynha yurru ŋunhiyinydja murrmurryun.
12 Ga nhenydja yurru waŋa bitjanna, ‘Way, wanhakana ŋunhi miriŋunydja mala, ŋunhinydja walala ŋunhi walala yukurra ŋaramurryirri ŋoy‐djingaryun ŋilimurruŋgu?’ Liŋguna walala winya'‐winyayurruna buwayakthinana.
13 Liŋgu ŋarrapinydja nhokala waŋarryunydja Godthunydja yukurra mulka nhuna ŋarrakalay ŋarra goŋdhu, ga waŋanydja ŋarra yukurra bitjan nhuŋu, ‘Yaka nhenydja barrariya. Ŋarra nhunanydja yurru guŋga'yun.’
14-16 “Yo, nhe Yitjural miṯtji, nhenydja dhuwalanydja ganydjarrmiriwnha yalŋgi'na, yurru ŋarrapi nhunanydja yurru guŋga'yun. Ŋarranydja dhuwala nhuŋu walŋakunharamirri, yakana nhenydja barrariya. Ŋuliwitjan nhokalaŋukurrunydja ŋarra yurru baḏuwaḏuyunna ŋunha miriŋunhanydja barrkuwatjkumana, bäy warray ŋunhiyi be bathalanydja ŋayi ga ḏälnydja ganydjarr‐ḏumurrunydja, ŋayinydja yurru ŋunhiyi winya'yunna‐wala yana nhokalanydja. Ga nhenydja yurru ŋunhi wirrkina wal'ŋu yana galŋa‐djulŋithirrinydja Garraywala, liŋgu ŋarrapi nhuŋu waŋgany Godtja. Nhe yurru wokthun ŋarraku, ŋunhi ŋarranydja Yitjuralwu ḏarrtjalknha wal'ŋu God.
17 “Yo, wiripunydja ŋuli ŋarraku yolŋu walala ŋanhdharkthirri gapuwu, nhämanydja nhuma yurru marrtji birrka'mirriŋura wäŋaŋuranydja, ḻarruma marrtji yurru gapuwu, yurru bäyŋuna nhuma yurru maḻŋ'maramanydja. Ga ŋarrapi yana Garrayyu yurru wekamanydja gapunydja nhumalaŋgu, ŋarranydja yurru yaka ganan nhumalanha djäkamiriwlilinydja.
18 Buku'‐wuku ŋunhi wäŋa dhärra yukurra baṉḏany ŋunhi ganbark gapumiriw, dharpamiriw nhämiriw; ŋarranydja yurru djäma ŋarkula maya'‐mayaŋgumana, waṉḏinyamarama ŋarra yurru gapunydja beŋuru ŋunhi buku yukurra gorruma, ga ŋunha ŋoyŋura ḻaparra'ŋura wäŋaŋura gapu yurru marrtji dhawaṯthunna beŋuru munatha'ŋuruna riyalana dhika ŋanyana. Yakana yurru biyapul dhuwala munathany'tja wäŋa yukurra djingaryun baṉḏany gapumiriw; ḻatju'na ŋanyana dhika yurru yukurra djingaryundja, yuṯana dhika ŋanyana walŋana ŋuriŋiyi gapuyuna.
19 Ŋarra yurru djäma yuṯakumanydja, ga ŋunhiyi dharpa malanha yurru ŋuthanna marrtji ŋunhiliyinydja dharapulŋura ŋunhi ŋayi ŋäthilinydja ŋunhiyi baṉḏany räwak; birrka'mirri dharpanydja malanha yurru ŋuthan bena‐wala weyi'‐wiyindhirrina, dhapirrkthirrina dhikana ŋanyana, dhärranydja yurru ŋunhiyi rrambaŋina yana, ḏälnha wal'ŋu.
20 Ga bukmakthuna yurru yolŋuyu nhämanydja ŋunhiyi yuṯanydja wäŋa walŋathinyara, bala walala yurru dharaŋanna ŋunhiyi nhämanydja, bala waŋa bitjanna, ‘Nhä dhuwala mirithirrinydja wal'ŋu ŋamakurruny'tja rom. Godthu ŋayipi ŋunhayinydjayi djäma, Yitjuralwala ḏarrtjalkthu wal'ŋu Godthu,’ bitjarrayinydjayi.”