14
Dhä‐ḏir'yunara ŋuriki yätjku buŋgawawu
14:1–22 (Judgement on the wicked king)
1 Yo, Garraynydja yurru biyapul ŋayi mel‐wuyun nhanukalayŋuwu ŋayi yolŋu'‐yulŋuwu Yitjuralwunydja, biyapul walala yurru nhinayi yukurra nyeyaḻŋuranydja nhanukala; nhinanydja walala yurru yukurra walalaŋgalay walala wäŋaŋuranydja, ga walala yurru mulkurunydja yolŋu marrtji, ga nhinana walalaŋgala ŋunhiliyi, ḻunduthirrina walalaŋgu.
2 Guḻku'yuna yurru miṯtjiyu bäpurru'yu guŋga'yundja yukurra walalanha Yitjuralnhanydja, märr yurru walala gumurr‐roŋiyirri walalaŋgalay walala wäŋalili, ga ŋunhiyi mulkurunydja walala yolŋu'‐yulŋu yurru djämamirrina Yitjuralwunydja. Yo, ŋunhiyi walala miṯtji ŋunhi walala ŋuli yukurranha buŋgawayinya Yitjuralwu bäpurru'wu ŋäthili, walalanydja yurru ŋunhiyinydja walala goŋŋura walalaŋgalana Yitjuralpuyŋuwalana, ga Yitjuralnha yurru walalaŋgunydja buŋgawa.
3 Yitjural, nhumanydja ŋunhi wirrki yana ŋayaŋu‐yätjthina ŋuriŋi warwuyunarayunydja, bitjarra nhuma barrarinana yukurrana, bala nhuma yukurrana wirrkina wal'ŋu yanana djämanydja ŋurikiyi yätjku buŋgawawu, bitjana ŋayi ŋuli ḏapṯapmaranhana raki'yuna nhumalanha, ga yakana djuy'yunanydja. Yurru ŋayinydja yurru Godthunydja nhumalanha dharraḏakuma warray, dhawaṯmarama warray ŋuliŋuruyi nhanukalanydja goŋŋuru, bala nhuma yurru nhinana yukurra ganydjarrnha nhanukalana nyeyaḻŋura ga djäkaŋura.
4 Ŋulinyaramirriyunydjayi nhuma yurru yukurra warku'yunna ŋunhi miriŋunhanydja buŋgawanha Bapilunbuyŋunhanydja, waŋa nhuma yurru yukurra bitjanna,
“Way, ŋunha buŋgawanydja yupthurrunana liŋguna,
yakana ŋayi yurru biyapulnydja muŋdhun yukurra binydjitjkuma ŋula yolnha yolŋunha,
5 liŋgu ŋayi Garrayyunydja liŋguna bakmaraŋalana ŋunhi nhanŋu mirithirrinydja yätjtja ganydjarr,
yakana yana biyapulnydja ŋayi yurru ŋula yolku buŋgawa.
6 Bitjanna liŋgu ŋayi ŋuli bunha yolŋu'‐yulŋunhanydja ŋayaŋu‐yätjkunhana;
bukmak ŋunha bäpurru'nha ga bäpurru'nha ŋayi yukurrana ŋayathaŋala baṯ bitjarrana, garrpirana walalanha.
7 Yurru dhiyaŋunydja‐wala bukmak dhuwala wäŋa buku‐ḻiw'marama yukurra nhina wapurarrŋurana, marimiriwnha nhämiriwnha,
ga bukmak yolŋu walala yukurra märr‐yiŋgathirrina miyamana‐wala manikaynha yana galŋa‐djulŋithirrina.
8 Ŋunha dharpa malanha djaka' weyindja yukurra wokthunna märr‐yiŋgathirrina,
liŋgu ŋunhinydja buŋgawanydja bathalanydja gal'ŋu liŋguna yupthurrunana,
yakana yurru ŋayi ŋula yol yolŋu marrtji goŋ‐ḏakul'mirrinydja,
ga djatthun yurru ŋunhiyi galkinyamarama biyapulnydja,
liŋgu ŋayinydja bena‐wala wiḏi'yurrunana.”
9 Yo, nhe ŋunhi, ŋunhi nhe mirithirri yätj gal'ŋu buŋgawa, bukmak ŋunhi wäŋa rakunymirriwunydja gumurr‐ŋamathirri nhuŋu yukurra märranharawuna. Ŋunhinydja walala ŋunhi walala yukurrana nhinana be buŋgawamirri gal'ŋu dhiyala munatha'ŋura, ŋunhiyinydja walalanydja rakunymirriwalana yukurra galkun nhuŋu, dhukarr‐nhämana yukurra nhuŋu bunanharawuna.
10 Ga yatjundja walala yukurra gawaw'yundja nhuŋu bitjanna, “Way nhenydja dhuwala yalŋgina, ganydjarrmiriwnha nhe, balanyarana liŋgu bitjan ŋanapurru.
11 Yo, nhenydja ŋuli yukurranha nhinanha dhika ḻatju'ŋura wal'ŋu, ga bukmak ŋunhi yolŋunydja walala nhuŋu yukurrana märr‐ŋal'yurrunana ŋula nhäyuna manikayyu, yurru dhiyaŋunydja‐wala nhe ŋunhi rakunynha, nhe yukurra ŋorranydja dhuwala warrpam'nha rumbalnydja nhe barrpa'wuŋuna ŋäkirrmaranhara.”
12 Way buŋgawa, nhenydja be yäku Baṉumbirr Djaḏaw'yunaramirri, yurru yupthurrunana nhe yulŋunydja beŋuru djiwarr'ŋurunydja. Ŋäthilinydja ŋunhinydja nhe bumara marrtjina yolŋu'‐yulŋunha miṯtjinha, yurru Godthunydja nhuna ḏupthurruna warray munatha'lilina.
13 Waŋananydja nhe yukurrana ŋayaŋuyunydja nhokalay nhe, ga guyaŋina nhe yukurrana bitjarra, “Ŋarranydja yurru marrtji bala djiwarr'lili, ŋunhana‐wala yana bena‐wala garrwarlilina; ŋunhalayina ŋarra yurru yukurra nhinanydja ŋurruŋuna wal'ŋu buŋgawana bukmakkuna djiwarr'wuywu malaŋuwu.
14 Marrtjinydja ŋarra yurru be‐wala yana djuḻkmarama waŋupini'nhanydja ŋunha gal'ŋu, ga nhinanydja ŋarra yurru yukurra bitjan buŋgawana bathalana, bitjan Godnha yana ŋayipina.” Ga bitjana nhe bini ŋunhi yulŋunydja garrwarkunhaminyanydja nhunapinyay nhe,
15 yurru Godthunydja nhuna ŋurrkaŋala warray ŋunha‐wala ŋunhina rakunymirriwalana wäŋalili, dhikana yana ŋoylilina munatha'lilina ŋarŋgalilina.
16 Yo, ŋunhayinydjayi rakunymirriwalanydja dhikanydja wäŋaŋura, yolŋuyu walalay yurru nhuna yukurra nhämana dharr bitjanna, ga waŋanydja walala yurru bitjanna, “Dhiyaŋunydja gay' yolŋuyu ŋunha munathany'tja wäŋa gur'kuryunmaraŋalana, ga bukmak wäŋanydja beyaṉiyinana nhanŋu.
17 Ŋayinydja baḏuwaḏuyurruna warrpam'thurrunana ŋunha munathany'tja wäŋa, bala wäŋanydja ŋunha ganbarkthinana, baṉḏanydhinana räwakthinana. Ga bitjarrayi liŋgu ŋayi yolŋunhanydja walalanha yukurrana garrpira baḏak, mel‐wuyunaramiriwnha ŋayinydja, yakana ŋayi dharraḏakuŋala walalanha, ga djuy'yurruna yära bäyŋuna.”
18 “Yo, bukmak ŋunhi buŋgawa walala dhiyakuy munatha'wuynydja ŋorra marrtji moluŋuranydja ḻatju'mirriŋurana dhikana wal'ŋu yanana,
19 yurru nhuŋunydja rumbal yukurra yurru ŋorra warraŋul warray, baṉarra'ŋura warray ga barrpa'na binydjitjnha, yakana nhuna ŋula yolthu dholkuŋalanydja rumbalnydja nhuna, yana nhe yukurra ŋorranydja mukthunna yana ŋurikalana walalaŋgala dhambay, ŋunhi walala murrmurryurruna marrtjina mariŋura.
20 Yakana yurru nhuŋu yol marr‐ŋal'yundja ga guyaŋirrinydja nhuna, liŋgu nhe baḏuwaḏuyurruna wäŋa ŋunhiyi nhuŋuway, ga bumara nhe dhawar'maraŋala yolŋu'‐yulŋunha nhuŋuway.
21 “Yo, buŋana murrkay'kuŋana gäthu'mirriŋunha walalanha ŋurikiyinydjayi yätjkunydja buŋgawawu, liŋgu ŋunha bäpa'mirriŋunydja walalaŋgu mirithirrina yanana yätjnha nyalmirina; yaka yurru ŋurikiyinydjayi gurruṯu'mirri walala biyapul gaŋgathirri marrtji, ga yakana yurru walalaŋgala dhuwala munatha' biyapulnydja goŋŋura.
22 Yo, ŋarranydja yurru buma dhawar'yunmaramana yana ŋunhiyi wäŋanha ŋuriki buŋgawawunydja, ga yakana yurru nhanŋu ŋula waŋgany yothu walŋathirrinydja.” Ga bitjarrayina ŋayi Garray waŋananydja.