9
1 Ŋuliŋurunydja God waŋana goŋmirriyaŋalana Nowanha ga nhanŋu ḻurrkun'nha gäthu'mirriŋunha walalanha, waŋananydja ŋayi Garray bitjarra gam' walalaŋgu, “Ŋarrapi yurru nhumalanha goŋmirriyamanydja, märr nhuma yurru waka'‐yalkthunmirri yumurrku'nha, biyapul mala dhaŋaŋgunhamirri, barrku'‐barrkuwatjthirri marrtji yurru wäŋalili ga wäŋalili, buku‐ḻiw'marama wäŋakurrunydja.
2 Nhumapi yurru dhuwali walala wäyingunydja malaŋuwu buŋgawa, walala yurru barrarirrinydja nhumalaŋgu, ga nhumalaŋgalayi goŋŋura yana yurru dhuwala wäyindja walala nhina.
3 Nhuma yurru ḻukiya wäyinnhanydja ŋanak, ga ŋunha ŋatha ga borum, dhuwala nhumalaŋgu ḻukanharawunydja.
4 Ga ŋunhi nhe yurru wäyinnha wutthun, ŋäthilinydja nhe yurru gulaŋ ḻarrmaraŋa baṉḏany'kuŋanydja, ga yurruna ḻukiyanydja; yakana yurru nhuma gulaŋdja ḻuka, liŋgu gulaŋdja ŋunhi walŋa muka.
5-6 “Ŋuli yurru ŋayi yolŋuyu buma murrkay'kumanydja yolŋunha, ŋunhiyinhanydja yolŋunha yurru murrkay'‐bunharamirrinhanydja bumayi yana murrkay'kumayi, ga ŋuli yurru wäyindhunydja buma yolŋunhanydja, bala wäyinnhanydja nhuma yurru bumayi yana rakunygumayi, liŋgu ŋunhiyinydja Godthu djäma yolŋunhanydja mali bitjarra bitjan ŋayipi yana; yakana ŋuli yolŋunhanydja buŋu murrkay'kuŋunydja yolŋuyunydja.
7 “Yo, nhuma yolŋunydja walala miṯtji‐guḻku'thiyana, barrkuwatjthiyana biyakana yanana, warrpam'thurrana gungaŋa dhuwala munathany'tja wäŋanha, birrka'mirrina.”
8 Ga ŋuliŋurunydja Godthu waŋana Nowanha ga gutha'mirriŋunha walalanha Nowawu bitjarra,
9-10 “Ŋarranydja yukurra dhuwala dhawu'‐nherraṉmirri nhumalaŋgu yolŋuwu ga wäyingu, bukmakku yana ŋuriki ŋunhi ŋarra walŋakuŋala ŋuriŋiyi marthaŋayu,
11 dhuwala dhäruktja gay' ŋarra yukurra nherraṉna. Yakana yurru ŋarra biyapulnydja gapuyu ga waltjaṉdhu buwayakkuma bukmaknha ŋunhi yukurra nhä malanha nhina walŋamirri dhuwali munatha'ŋura.
12-13 Ŋarra yukurra yurru djärina nherraṉdja nhumalanha marŋgikumanydja, ŋayi yukurra yurru dhärranydja waŋupini'ŋura, yana guyaŋinyamirriyama yurru nhumalanha, ŋunhi ŋarra dhawu'‐nherrara nhumalaŋgu, liŋgu ŋarrakuŋunydja dhawu'‐nherraṉminyarawuy yurru djingaryun gupaḏainha‐wala yana.
14-16 Ga ŋarranydja yurru nhäma ŋunhi djärinydja, bala ŋarra yurru guyaŋirrina ŋarrakuŋuway dhawu'‐nherraṉaranydja ŋunhi; yakana biyapulnydja yurru ŋarra bukmaknha yolŋunha buwayakkuma gapuyu ga waltjaṉdhu.”
17 Ŋe, bala yuwalkthi dhuwala, djäriyunydja ŋuli yukurra ḏämbu‐ḻaymarama Godnha dhäruk ŋunhi ŋayipi wal'ŋu nherraṉmina.
Ḻakarama yukurra Nowanha ga gäthu'mirriŋunha walalanha nhanŋu
9:18—10:32 (Noah and his sons)
18-19 Yo, dhuwala walala Nowawu djamarrkuḻiny'tja yäku gam', Djim, Wäm, ga Djaypip, ga dhiyakuŋunydja walalaŋguŋu mala‐bunhara bukmaknha yolŋu'‐yulŋu ŋunhi yukurra nhina dhiyala munatha'ŋura buku‐ḻiw'marama dhika.
20 Ŋunhi walala walma'‐walmananydja ŋuliŋuru marthaŋaŋurunydja, bala ŋayinydja Nowayunydja dholkuŋala borum wuḻuymu'yinyarana, bala ŋayi djämanydja weyika' ŋuliŋuru borumŋuru ga ŋänitji'na.
21 Ŋuliŋurunydja ŋayi ḻukanana yukurrana Nowayu, yana liŋgu ga leŋu ŋayi ŋuriŋiyi ŋänitji'yu, bala ŋorranana yukurrana buṉbuŋurana ḏalwaḏalwa'ŋura warraŋulnha, girri'miriwnha.
22 Ŋayi Wämdhu nhäŋalanydja ŋanya, bala yana marrtjina ga ḻakaraŋala wäwa'mirriŋuwana maṉḏapala,
23 bala ŋuriŋiyi märrma'yu maṉḏa yana märraŋala ŋunhi girriny'tja Djimdhu ga Djaypipthu, bala maṉḏa marrtjinanydja dhuḏi'thuna, bala yana bäpa'mirriŋunhanydja ŋäkirrmaraŋalana maṉḏakuway ŋuriŋi girri'yuna; yakana maṉḏa ŋula nhäŋala ŋanya ŋunhimala djolarra'lilinydja.
24-28 Ga ŋunhi ŋayi gaŋgathina yakurrŋurunydja Nowa, leŋuŋurunydja ŋunhi, bala yana ŋayi waŋana dhäruknha wekanhamina goŋmirriyaŋala maṉḏanha Djimnha ga Djaypipnha, yurru ŋanya Wämnha yaka warray goŋmirriyaŋalanydja ŋayi waŋana, ŋayinydja yurru Wämdja djämamirri yana maṉḏaku wäwa'mirriŋuwu maṉḏaku ŋurikiyi.
29 Yo, nhinananydja ŋayi yukurrana Nowa‐a‐a, ga worruŋuyina, bala ŋayi ŋuliŋurunydja dhawar'yurrunana 950‐na dhuŋgarranydja.
10:1–32
Yo, Nowawala ḻurrkun'thu gäthu'mirriŋuyu walalay miṯtji‐bumarana yukurrana yumurrku'nha walalaŋguway, yana liŋgu walalaŋgala yumurrku'yunydja mala‐bumara, ga walalaŋgalanydja yumurrku'yu ga bitjarra yana liŋgu mala‐bumara, weyin‐märraŋalana bitjarrana bili, bitjarrana bili, yana liŋgu ga gaŋdhurruna miṯtji yolŋu walala, malana ga malana ga malana yolŋunydja walala nhinana yukurrana ŋulinyaramirriyu, ga bukmaknha yolŋu'‐yulŋu ŋunhi yukurra nhina dhuwala ŋarakaŋura buku‐ḻiw'marama nhanukuŋuway Nowawuŋu malanydja bunhara yana.