45
Djotjip maḻŋ'maranhaminana ŋanyapinyay ŋayi wäwa'mirriŋuwalana walalaŋgala
45:1–28 (Joseph revealed himself to his brothers)
1 Djotjiptja wirrkina dhika ŋoy‐warrina dhaŋa'‐dhaŋaŋdhinana marrtjina nhanukalaŋuwu ŋuriki wäwa'mirriŋuwunydja walalaŋgu, bala ŋayi djuy'yurruna djämamirrinha walalanha warraŋullili, walalawuynha ŋunhi Djotjipnha ga nhanŋu wäwa'mirriŋuna walala ganaŋ'thurrunana.
2 Bala ŋayi ḻakaranhaminana nhanukalaŋuwa wäwa'mirriŋuwana walalambala ŋuripana, yurru ŋayi wuythurrunana dhikana ŋäthinanydja dhä‐warrwarnha ye'yurruna. Walala ŋuriŋiyi Yetjippuyŋuyunydja ŋäkulana ŋanya, ga dhäwuny'tja buḻwaŋ'thurrunana wäŋakurrunydja buku‐ḻiw'maraŋala, giŋgunydja wäŋa.
3 Ga bitjarrana Djotjiptja ḻakaranhamina nhanukalaŋuwa wäwa'mirriŋuwa walalambala, “Ŋarranydja dhuwala Djotjip muka. Ŋarraku mäḻuny'tja be walŋa muka?”
Walala ŋunhi wäwa'mirriŋuyunydja walalay ŋäkulana ŋanya, bala wirrkina dhikana beyaṉinyaminanydja, ga yakana buku‐ruŋiyinmaraŋala ŋula waŋgany dhäruk.
4 Ga Djotjipthu waŋana walalanha bitjarra, “Go marrtjiya giṯthurra walala dhipala galkithiya ŋarrakala.” Bala walala giṯthurrunayi, ga ŋayinydja waŋana bitjarra, “Ŋarranydja dhuwala nhumalaŋgu muka ŋunhi gutha'mirriŋu Djotjip muka, ŋunhi muka ŋunhi nhuma wuŋiḻi'yurruna, bala walala gäŋalana ŋarranha dhipalana wäŋalili Yetjiplilina.
5 Yaka buku‐goriya walala, ga yaka ḻiya‐ŋarrtjunmiya walala nhumalanhay nhuma, ŋunhi nhuma wuŋiḻi'yurruna ya' ŋarranha rrupiyawu. Yuwalktja wal'ŋu ŋunhi ŋayipi Godthu ŋarranha djuy'yurruna dhipala walŋakunharawu yolŋu'‐yulŋuwu dhiyaku.
6 “Yo, dhuwalanydja ganbarkthirrinydja yawungu märr‐gurriri yana yulŋunydja, yurru märr‐weyin yurru ŋupandja, yurruna yurru ŋatha ŋuthan biyapul ŋamathirri.
7 Godthu djuy'yurruna ŋarranha dhipala nhumalaŋgu walŋakunharawu, märr nhuma yurru ŋatha muka märrama ḻukanharawu, märr nhumapi ga nhumalaŋgu mala yurru ŋuthan ga yakaŋga murrmurryun djaṉŋarrthinyarayu.
8 Yaka ŋunhi yuwalktja nhumanydja djuy'yurruna lili ŋarranha, ŋunhinydja Godthu ŋayipi yana, ga ŋayipi nherrara ŋarranha dhipala ŋurruŋukuŋala. Dhuwala wäŋa buku‐ḻiw'marama Yetjippuy ŋarrakalaynha yana goŋŋura.
9 “Ma' marrtjiyana walala gatjuy bala ŋarrakalaŋuwala bäpawala, ga ḻakaraŋa nhanbala ŋunhi Djotjiptja dhuwala walŋa muka yana. Ḻakaraŋa walala nhanbala biyaka, ŋayi marrtjina lilina yurru dhipalana wäŋalili, ga nhina ŋarrakalana galkina.
10 Dhiyalana nhuma yurru nhiniyanydja yukirriya ŋunhala Gutjinnha, nhumapi ga nhumalaŋgu yumurrku' ga nhumalaŋgu wäyin walala ga ŋula nhä malanha ŋunhi nhuma yukurra ŋayathama.
11 Ŋarrapi nhumalaŋgu yurru djäkanydja. Nhuma yurru märramana yukurra ŋula nhänydja malanha, yakana nhuma yurru djaṉŋarrthirri; ḏulpuna yana yurru nhina yukurra bitjanna liŋgu.
12 “Liŋguna nhuma yukurra nhämana dhuwala ŋarranha ŋunhi ŋarranydja dhuwala yuwalk Djotjip.
13 Ḻakaraŋa ŋarrakalaŋuwala bäpawalanydja ŋunhi ŋarranydja dhiyalami Yetjip nhina yukurra ganydjarr‐ḏumurru yana, ga ḻakaraŋanydja nhanbala bukmak nhä‐malanha ŋunhi nhuma nhäŋala dhiyala. Gatjuy waḏutjana marrtjiyanydja walala, ga garr'yurrana ŋanya lili.”
14 Bala ŋayi gaḻummaraŋala dhangi'yurrunana nhanŋuway gutha'mirriŋunha Bindjamannhanydja, bala ŋäthinana, ga bitjarra yana liŋgu Bindjamandhunydja dhangi'yurruna Djotjipnhanydja ga ŋäthinayi.
15 Ga bitjarrayi bili ŋayi ŋunhi wiripu‐guḻku'nhanydja dhangi'‐dhangiyurruna ga wälku'‐walkuŋala marrtjina, ga yurruna walala waŋananydja ŋunhiyi wäwa'mirriŋunydja walala nhanukala.
16 Ga Giŋdhunydja ŋäkula galŋa‐ŋamathina ŋunhiyi walalanha ŋunhi Djotjipku wäwa'mirriŋu walala bunana,
17-18 ga waŋana ŋayi Djotjipkala bitjarra, “Ma' ḻakaraŋa wäwa‐ŋaliwanydja walalambala, walala marrtjina yurru lilina dhipalana wäŋalili, ga dhiyalana nhina yukurra yurru Yetjipnha, mäḻu'mirriŋu nhuŋu ga bukmak ŋunhi yolŋu walala dhiyalana yukurra nhina yurru. Ŋarra yurru wekama walalaŋgu manymak yana wäŋa dhiyala Yetjiptja, märr yurru walala nhina yukurra ŋamathama dhiyalanydja wäŋaŋura.
19-20 “Gatjuy weka'‐wikaŋa nhokalaŋuwa wäwa'mirriŋuwanydja walalambala ŋula nhä malanha mundhurrnha, walala yurru gäma bäpa'mirriŋuwu nhokalaŋuwu; ŋayi marrtjina yurru lilina dhipalana, ga dhiyalana nhina Yetjipnha.” Bitjarra ŋayi buŋgawayunydja ḻakaraŋala Djotjipku.
21 Bala yana ŋayi Djotjipthu rarr'yurruna ŋathana malanha, ga yarraman'nha malanha ga girri'na malanha nhanukalaŋuwa ŋuripa wäwa'mirriŋuwanydja walalambala,
22 yurru nhanbala Bindjamanbanydja ŋayi rarr'yurruna dhaŋaŋnha dhika rrupiya ga dhaŋaŋnha girri'.
23 Ga bitjarrayi liŋgu ŋayi rarr'yurrunayi nhanbala mäḻu'mirriŋuwanydja girri' ga ŋatha biyapulnha dhaŋaŋ dhikana, bala yana djuy'yurrunana walalanha wäŋalilina.
24 “Ga yakana marrtjiya bala ŋarrtjunmiya gandarrkurrunydja,” bitjarra ŋayi Djotjipthu waŋananydja.
25 Bala yana walala marrtjinana gonha'yurrunana ŋunhi Yetjippuynydja, marrtjina roŋiyinana bäpa'mirriŋuwana, bunana Gaynanlilina.
26 Ŋunhala bäpa'mirriŋuwanydja bunana, bala ḻakaraŋala bitjarrana, “Way, Djotjiptja ŋunha walŋaŋga, buŋgawana ŋunha ŋayi Yetjippuyŋuwuna yulŋunydja.”
Bala ŋayi bäpa'mirriŋuyunydja Djaykupthunydja ŋäkula, bala gulkuruna märr‐yuwalkthinanydja ŋayi.
27 Yurru walala milkuŋalana marrtjina gay' girri'na be nhäna malanha nhanukuŋu rarr'yunarana, ga yurruna ŋayi märr‐yuwalkthinanydja.
28 “Gäthunydja ŋunha ŋarrala walŋaŋga Djotjiptja, yuwalknha walŋana ŋi'! Waḏutja ŋarra marrtjina, ŋarra nhämana ŋanya, yurruna ŋarra yurru rakunydhirrinydja.” Bala Djaykupthu girriny'tja marrtjina dhoṯkuŋalana bukmak nhä malanha bilina gurku'yurrunana.