26
Yitjakthu märraŋalana ŋunhiyinydja dhawu' ŋunhi Godthu dhawu'‐nherrara Yipurayimnha
26:12–15, 24–25 (God blessed Isaac because of his covenant with Abraham)
26:12–15
Ŋe, yuwalkkuŋalana wal'ŋu Godthu gäŋala yukurrana guŋga'yurruna Yitjaknhanydja, ḻukunydjana yana ŋayi nhinana yukurrana, ga wäyindja nhanŋu dhaŋaŋnha dhika buliki ga gamul ga nanikut ga ŋula nhä wäyin, bena dhika dhaŋaŋnha. Ŋayipi Yitjak ga nhanbala miṯtji, djämamirri walala ga wiripu‐guḻku' yolŋu'‐yulŋu miṯtji, nhinananydja walala yukurrana wäŋaŋura yäkuŋura Gera, ga ŋunhalayi wäŋaŋura wäyindhunydja walalay ŋuli gapunydja ḻukanha ŋuliŋuru maŋutjiŋuru ŋunhi bäpa'mirriŋuyu nhanukala ŋangi'yurruna ŋäthili be.
24-25 Ga wiripuŋuyuna munhayu, Godnha Garraynha maḻŋ'thun nhanukala Yitjakkala, bala waŋana yukurra nhanŋu bitjanna, “Ŋarranydja dhuwala God, ŋunhi muka bäpa‐ŋaliwu Yipurayimgu Waŋarr. Yaka nhenydja barrariya, bili ŋarranydja dhuwala nhokala galki. Ŋarra yurru nhuna gäma yukurra, guŋga'yundja marrtji bala, ga nhokuŋu yumurrkuny'tja yurru guwar‐yalkthunmirrina marrtji bala, mala‐guḻku'kunharamirrinydja biyapulnha dhaŋaŋnha; guŋga'yundja ŋarra nhuna yurru, bili Yipurayimnhanydja ŋarrakuway ŋunhi yolŋu.” Bitjarra Garraynydja waŋana Yitjakku.