Ga bitjarrayi liŋgu ŋayi Garrayyu nherrarayi rom, nhaltjan yurru ŋayi ŋunhiyi ḏalkarra'mirri yolŋu wapthun, bala ganaŋ'thunna Garraywuna nhanŋuwaynha, bitjarra ŋayi Garray waŋananydja gam'; “Ŋäthilinydja wal'ŋu nhe yurru rurrwuyun walalanha gapuyuna, märr yurru walala warrpam'thuna yana ḏarrtjalkthirrinydja, bala nhuma yurru walalanha dhaṯthunna marrtji ŋuriŋiyinayi girri'yu malanyŋuyu dharrpalmirriyuna. Ga ŋuliŋurunydja dhurrwaraŋuru nhe yurru märraŋa weyikany'tja, bala rarr'yurra muḻkurrlilina walalaŋgala, ŋämilana biyakana walalanha, märr yurru walala bitjanna liŋguna yarrkmaranharana nhinanydja yukurra ganaŋ'thunarana nhanŋuwaynha Godkuna yana ḏalkarra'mirri gupaḏalŋuwuna‐wala.

10-12 “Ga biyapul nhuma yurru gäŋa wäyinnha buliki'nha ŋunhimalayinayi Withiyanminyarawuylilina Buṉbulili, bala walalanydja yurru ŋunhiyi *Yärun ga gäthu'mirriŋu walala nhanŋu goŋ‐ŋal'yun yurru muḻkurrlili ŋunhiyi wäyingala buliki'walana, bala nhuma yurru wutthundja nhanukala gumurrŋurana Garraywala, dhurrwaraŋurana ŋunhiliyi buṉbuŋura. Märraŋa nhe yurru maŋguny'tja banikin'lilina, bala goŋ‐ḻupthurra ŋunhimalayi gulaŋlilinydja, bala ŋämiṉna nhe yurru marrtji bala yulŋunydja ŋunhiyi dhandurruŋdja ŋunhilimiyi dhaliyarra'ŋuranydja, ga bukmaktja rarr'yurra gulaŋ ŋunhi wäyinnha ŋunhana wal'ŋu ŋoylilina ŋunhiwala dhaliyarra'lili ḻiw'maraŋa yana.

13-14 “Bala märraŋa biḏila ga ḏiny'ṯiny ŋunhi wäyinnha, ga wäyin yaḻmanga' ŋunhiyi ḏiny'ṯinyŋura märraŋayi, bala batharra ŋunhimalayinayi dhaliyarra'lilina mundhurr Godkuna. Yurru rumbalnydja nhuma yurru ŋunhiyinydja gäŋa dhawaṯmaraŋana warraŋullilina wäŋalili, ŋanaktja ŋunhi ga barrwaṉ'tja, ga batharra gurthalili warraŋulnha, liŋgu ŋuriŋinydjayi wäyindhu gämana yurru yukurra yätj ŋurikiyina ḏalkarra'mirriwuna walalaŋgu, bitjarra ŋunhiyinydjayi wäyin rakunydhina dharapulŋurana walalaŋgala, märr yurru ŋayi Godthunydja yakana nhäma yukurra walalaŋgu yätj biyapulnydja.” Ga bitjarra ŋayi waŋana Garrayyu ḻakaraŋalanydja †Mawtjitjkala.

15-37 Ga bitjarrayi bili ŋayi wekaŋalayi wiripunydja rom malanha, ḻakaraŋala Mawtjitjkala nhaltjan ŋayi yurru yukurra ganaŋ'marama ŋunhi ḏalkarra'mirrinha walalanha, märr yurru walala marrtji galkithirrina wal'ŋu yanana Godkalanydja.

38-42 Yo, bitjarra ŋayi Garrayyu ḻakaraŋalanydja ‡Mawtjitjkala, “Bitjan liŋgu goḏarr'mirri ga munhakunydja nhuma yurru bathan wäyinnhanydja gurthayuna, mundhurr‐wekamanydja nhanŋu Garraywunydja ŋunhili Withiyanminyarawuyŋuranydja Buṉbuŋura, liŋgu ŋunhilinydja dhaḻakarrŋura ŋarra yurru withiyan nhumalanha ŋarrakuway ŋunhi yolŋu'‐yulŋunha, ga ŋunhiliyinydja ŋarra yurru waŋana yukurra nhumalanha. 43 Yo, ŋarraku yurru nhänydja malanha gungama yukurra djarraṯawun'thu yana ŋunhiyi wäŋanha, ga ŋunhiyinydjayi dhaḻakarr wäŋa gänana wal'ŋu yana garrkuḻuknha ŋula nhämiriwnha, ganaŋ'maranharana ŋunhiyinydja ŋarralay djarraṯawun'nha. 44 Yo, ŋunhiyinydjayi buṉbu ga dhaliyarra' dhulŋuŋu yana ganaŋ'thunara ŋarrakuway, ga bitjandhi yurru §Yärundja ga gäthu'mirriŋu walala nhanbala, ŋarrakuway yana wal'ŋu ḏalkarra'mirri walala, ganaŋ'maranhara ŋarrakuway djämamirri. 45 Liŋgu ŋarranydja yurru ŋunhi nhinana yukurra ṉapuŋga'na ŋarrakalaŋuwala yolŋu'‐yulŋuwalanydja *Yitjuralpuyŋuwalanydja, ga ŋarrapi yana walalaŋgu yurru Godtja ŋunhi. 46 Walala yurru marŋgiyirri ŋarraku, ŋunhi ŋarranydja Garray walalaŋgu God Waŋarr, ŋunhi ŋarra dhawaṯmaraŋala walalanha gäŋala beŋuru †Yetjipŋuru, märr yurru ŋarra nhinana yukurra wäŋaramana walalaŋgala. Ŋarrapi yana walalaŋgu Waŋarr Godtja.” Ga bitjarra ŋayi yukurrana Garray waŋananydja.

Ga baḏak Garrayyu waŋana yukurrana Mawtjitjnha ŋunhiliŋga bäyma bukuŋura yana. “Biyakayi liŋgu nhuma yurru ŋamaŋamayurra bathanarawu buŋgangu bäw'wunydja. Ga bitjandhi nhuma yurru nherraṉdhi dhandurruŋdja malanha yumurrku' ḏämbu'mirri ḻikanlili malaŋulili ŋunhiwala, bala nherraṉdja nhe yurru ŋunhina wal'ŋu yana Dhuyulilina dhaḻakarrlili, galkina gunganharawuylilina dhomala'lili, yurru gumurrlilina ŋunhimala Dhawu'mirriyanharawuylilina Bathilili, ŋunhi wanhami ŋarra yurru withiyan nhumalanha. Yo, Yärundhunydja bathan yukurra yurru buŋgan bäwny'tja bitjan liŋgu munhakumirri ga milmitjpa, ŋunhi ŋayi yurru marrtji lanhdhirra'wunydja weyika'mirriyanharawu, märr yurru yukurra buŋgan bäwny'tja gaŋgathirri yana bitjan liŋgu. Ga bitjanna liŋgu dhuŋgarra‐watjinya ŋunhi ŋayi yurru buma ŋunhiyi wäyin Yitjuralwunydja yätjku ŋäkirrmaranharawu, ŋayinydja yurru Yärundhunydja ŋämiṉ marrtji ŋunhiyina dhandurruŋnha ŋuriŋiyi maŋgu'yuna wäyingala, märr yurru ŋayi Godthu bäy‐ḻakaranharawuy wekama walalaŋgalaŋu yätjpuy. Ga dhuwalayinydjayi ŋunhi ŋayi yukurra yurru gaŋgathirri bäw' ŋuliŋuruyi, ŋunhinydja gänana wal'ŋu yana, ganaŋ'thunna yukurra ŋarrakuwaynha.” Bitjarrana ŋayi yukurrana Garray waŋananydja.

17-21 Ga biyapul ŋayi Garrayyu ḻakaraŋala Mawtjitjkala bitjarra gam'. “Ga biyakayi liŋgu djäma yindi rupa rurrwuyunminyarawunydja yukurra yurru yana, bala nherralanydja ŋunhiyi rupa'nha ṉapuŋga'lili buṉbuwala ga gurthawuywala dhaliyarra'wala, ga guryu'‐guryunmaraŋa gapu dhaŋaŋguŋa. Walala yurru Garraywu ḏalkarra'mirri walala, Yärun yäku ga nhanbala gäthu'mirriŋu walala rurrwuyunmirri goŋ ga ḻuku yurru, yurruna walala yurru gärri'‐garri Garraywalanydja buṉbulili ŋunhanydja. Ga bitjandhi bili walala yurru rurrwuyunmirriyi, yurruna walala yurru djäma mundhurrnydja bathan gurthalilinydja; walala ŋuli gonhana rakunydhi. Yo, ŋäthilinydja walala yurru rurrwuyunmirri goŋ ga ḻuku, ga dhuwalayinydja rom yukurra yurru dhärra bitjanna liŋgu gupaḏalnha‐wala yurru.

“Ga wiripunydja ŋarra yawungu ḏarramunha djarr'yunna, ‡Warwu gutharra'mirriŋunha yäkunha §Betjalilnha, ŋarra yawungu ganydjarr wekamanydja ŋanya djämawu, liŋgu Walŋayu Birrimbirryu ŋuriŋi ŋarrakalay liŋguna ŋanya dhaŋaŋgunha, märr ŋayina boŋguŋu djämanydja yukirri ŋunhiyi maryakalnydja malanha ḻatju'kuŋunydja. Yo, ŋayipi boŋguŋu Betjalilyu ga wiripu‐guḻku'yu guŋga'yunamirriyu walalay nhanukala boŋguŋu djämanydja yukirri ŋunhiyi ŋarraku buṉbunha, ga bukmak nhä malanha wiripu girri' ŋurikiyi buṉbuwunydja. Ga bitjandhiyi walala yurru djäma mirithirri yukurra dharrpal girri' wal'ŋu ŋuriki ḏalkarra'mirriwunydja walalaŋgu, ga biyapul walala yurru djämayi weyikany'tja dharrpal yana ŋurikiyi lanhdhirra'wunydja, yurru djämanydja walala yurru yukurra bukmak djan'kukuma bitjandhi, bitjarra ŋarra ŋunhi nhokala ḻakaraŋala ŋunhala bukuŋura.” Bitjarrana ŋayi yukurrana Garrayyu ḻakaraŋalanydja Mawtjitjkala.

12-17 Bala Garray waŋana dhurrwara‐ḏaw'yurrunanydja *Mawtjitjkala bitjarrana gam'. “Ḻakaraŋa †Yitjuralpuyŋuwanydja miṯtjiwa biyaka, walala yukurra yurru bitjanna liŋguna ḏälkuma ŋarrakunydja ganaŋ'maranharanydja walu nhinanharamirrinydja, liŋgu dhuwalayinydja walu yiŋarra'yunara, märr nhuma yurru bitjan liŋgu guyaŋirrina yukurra ŋunhi ŋarra nhumalanha ganaŋ'maraŋalanydja ŋarrakuwayliliyaŋala. Yo, ŋunhiyinydjayi walu dharrpalnha wal'ŋu yana dhulŋuŋuna ŋarrakuwaynha. Ŋuli yurru ŋayi ŋula yol yolŋu yakanydja galkunmirri nhina, djämanydja yukurra mukthundja, nhumanydja yurru bumana ŋanya rakunygumana, liŋgu waŋgany rulu ga waŋgany bäythinyara ḏaykun' djämawuynydja, ga ŋuriŋinydja bala waluyu ŋunhiyinydja ganaŋ'maranharana wal'ŋu, galkunminyaramirrina, gänaŋuna nhanŋuwaynha Garraywuna. Balanyarayunydja walala Yitjuralpuyŋuyunydja yurru bitjan liŋgu guyaŋirrina yukurra, ŋunhi Garrayyu bokmara ŋunha djiwarr' ga dhuwala munatha'; waŋgany rulu'yu ga waŋganydhu bäythinyarayu ḏaykun'thunydja ŋayi djämanydja, dhawar'maraŋalana warrpam'nha nhä malanha, ga ŋuriŋinydja bala ḏaykun'thu ŋayi galkunminana ŋanyapinyay ŋayi.”