24
1-2 Bala ŋayi Garrayyu djuy'yurruna Mawtjitjnha balayi, roŋiyinmaraŋala yolŋu'‐yulŋuwala, bitjarra ŋayi waŋananydja, “Gatjuy marrtjiya balayi yarrupthurra, ga ŋunhili garr'yurra walalanha Yärunnha ga Natapnha ga Bäyunha, ga wiripu‐guḻku'nha ŋurru'‐ŋurruŋunha Yitjuralpuyŋunha, 70 ŋaḻapaḻmirrinydja mala, walala yurru marrtji lili ḏuwaṯthun, yurru märr‐barrkulili walala yurru djingaryundja marrtji, buku‐ŋal'yun yurru ŋarrakunydja, liŋgu nhepi yurru waŋgany Mawtjitj marrtji galkithirrinydja wal'ŋu ŋarrakalanydja.” Bitjarra ŋayi Garrayyu ḻakaraŋalanydja Mawtjitjkala.
3 Bala Mawtjitjtja yarrupthurrunana, ga ḻakaraŋalanydja yolŋu'‐yulŋuwa Garraynha dhäruktja, ga bukmak rom malanha ŋunhi ŋayi wekaŋala yukurrana nhanukala Mawtjitjkala. Bala bukmaknha yana yolŋuyunydja walalay dhäruktja buku‐ruŋiyinmaraŋala Mawtjitjkalanydja bitjarrana gam'. “Ŋanapurru yurru djämana‐wala yana bukmak ŋunhi Garrayyu nhaltjarra ḻakaraŋala.”
4 Bala Mawtjitjthu wukirrina marrtjina bukmak Garraywuŋu dhäruktja djorra'lilina.
Ga wiripuŋuyuna waluyu, Mawtjitj gaŋgathina munhakumirri dhika, bala botjaŋala guṉḏana ŋal'‐ŋalmaraŋala ŋunhili bäyma ŋoyŋura bukuŋura, ga bitjarrayi bili ŋayi djinga'‐djingarmaraŋala 12 guṉḏa malanha, bili walala ŋunhi Yitjuralnydja mala 12 bukmaktja bäpurruny'tja.
5 Bala ŋayi djuy'yurruna yuḏayuḏanhana ḏarramuwurrunha, ga ŋunhalanydja walala bumara wäyinnha malanha, bala ŋal'maraŋala wäyindja guṉḏalilina, ŋunhimalana ŋunhi ŋayi botjaŋala Mawtjitjthu. Walala batharana ŋunhiyi wäyindja malanha, buku‐ŋal'yurrunana yukurrana Garraywuna,
6 bala ŋayi Mawtjitjthunydja gulaŋdja ŋunhiyi wäyin guryu'‐guryunmaraŋala rupa'lilina, ga wiripunydja gulaŋ ŋayi bikpikthurruna ŋunhimalayi wäyinmirrilili guṉḏalili.
7 Bala Mawtjitjthunydja märraŋala djorra'na, ŋunhiyi djorra' ŋunhi nhanukiyinguŋu wukirriwuy dhawu'‐nherraṉminyara ŋanyapinyay Garraynha ga yolŋunha walalanha, bala ŋayi marrtjina waŋana ŋuliŋuru djorra'ŋuruna. Bala yolŋu'‐yulŋuyunydja ŋäkula bukmakthuna, ga waŋana walala bukmaknha yana bitjarra, “Ŋanapurrunydja yurru djämana‐wala yana bukmaknha ŋunhi Garray yukurra waŋa; yuwalknha ŋanapurru yurru yana malthundja nhanŋuwaynha dhärukku,” bitjarra.
8 Bala ŋayi Mawtjitjthu märraŋala ŋunhi gulaŋ rupa'mirri, bala bikpikthurruna yolŋu'‐yulŋuwalana, waŋana marrtjina, “Dhiyaŋunydja gulaŋdhu wuṉḏaŋarrkumana dhärranhamarama yukurra ŋunhiyinydja malanha dhäruktja dhawu'‐nherraṉminyaranydja, Garray God ga nhumapi; ŋayi yukurra yurru bitjanna liŋguna dhuwalayi dhäruk‐nherraṉminyaranydja djingaryun yurru.”
Ŋurru'‐ŋurruŋuyu nhäŋalana Garraynha
24:9–14 (The leaders of Israel saw God)
9 Ga dhurrwaraŋuru ŋuliŋurunydja walala wäŋgaŋala ḏuwa'‐ḏuwaṯthurruna bukulilina, Mawtjitj ga Yärun ga gäthu'mirriŋu maṉḏa Yärungu Natap ga Bäyu, ga wiripu‐guḻku' 70 ŋaḻapaḻmirri marrtjinayi malthurruna,
10 ga ŋunhalayi bukuŋura walala nhäŋalana Garraynhana Godnha, Yitjuralpuyŋuwuna Waŋarrnha. Yo, nhanukala Garraywala ḻukuŋuranydja ŋunhi ŋayi yukurrana djingaryurruna ŋunhilimi ḻatju'na dhika buyuwuyu'na, miny'tjinydja ḻatju'na dhikana, ga ḏarrtjalknha dhika wal'ŋu, yurru ralkthunara.
11 Liŋguna walala mel‐ŋal'yurrunana, nhäŋalana Godnhanydja, yurru yakana ŋayi walalanha ŋula rakunyguŋalanydja ŋunhi ḏilaknhanydja, yana walala ḻukana marrtjina ŋayaŋay'nha ga ŋarkula'na waŋganyŋurana, bala walala marrtjina roŋi'‐ruŋiyinayi balayi wäŋaliliyi.
12 Bala biyapul Garray waŋana Mawtjitjkala bitjarra, “Ḏuwaṯthurra dhipala bukulili nhe yurru, ga galkurra yukirriya ŋarraku dhiyala. Ŋarra yurru wekama nhokala goŋlili bilkpilk maṉḏanha guṉḏa, makarrmirri dhärukmirri, liŋguwuynha ŋunha ŋarrakuŋu wukirriwuynha yulŋunydja ŋunhiyinydja romdja malanha.”
13-14 Bala Mawtjitjtja ga nhanbala guŋga'yunamirrinydja Djatjuwanydja gaŋgathinana, bala waŋana ŋurikala 70‐walanydja ḏilakkala bitjarrana, “Nhumanydja nhiniya ŋi' dhiyala, galkurra ŋinyalaŋgu yukirriya, bäy ŋilinyu yurru roŋiyirri. Ŋunhiyi maṉḏa Yärun ga War yurru nhina yukurra dhiyalinydja nhumalaŋgalanydja, djäkanydja nhumalaŋgu. Ŋuli nhuma yurru ḏukṯukthirri ŋula nhäkunydja, marrtjiyanydja maṉḏakala.” Bala maṉḏa Mawtjitj ga Djatjuwa ḏuwaṯthurrunana marrtjina bukulilina, ŋunhimalana ŋunhi Garraywu buku Djäniya yäku.
Mawtjitj ga God gumurr‐wunanhaminana maṉḏa bukuŋuranydja
24:15–18 (Moses met God on the mountain)
15 Ŋe. Mawtjitjtja ḏuwaṯthurrunana marrtjina bala bukulilina, bala ŋayinydja marrtjina waŋupini'yunydja monyguŋalana ŋunhi bukunydja,
16 bala maŋandja marrtjina wiripuŋuyinana dhikana ḻatju'thinana, liŋgu Garray ŋayipi milkunharamina ŋunhiliminydja maŋanŋura, ŋunhilimi bili bukuŋura Djäniya.
17 Ga ŋuriŋi yolŋu'‐yulŋuyu wäŋaŋurunydja nhäŋalana ḻatju'thinyara djingaryunara yukurranhara, Garraywuna ḻatju'na dhikana ŋunhi maŋandja. Nhäŋalanydja walala ŋunhi bitjanarana bitjan ŋuli gurtha marrtji nhäri, ŋäṉarrnydja gurtha ŋatŋatthurruna marrtjina ŋunhala bukuŋuranydja djinmir'ŋuranydja. Ḻurrkun' ga ḻurrkun' munhanydja‐ŋupara bukunydja ŋunhi monyguŋala yukurrana maŋandhunydja, ŋayi Mawtjitjtja mukthurruna yana nhinana yukurrana, galkurruna Garraywu.
18 Bala ŋuriŋiyinydja bala ḏaykun'thu Garray wäthurrunana Mawtjitjku ŋulaŋuruyi maŋanŋurunydja, bala Mawtjitj djar'tjaryurruna, bala gärrinana ŋunhimalayi maŋanlilina, ḏuwaṯthurruna marrtjina bala‐a‐a, yana liŋgu ga buku djinmir' ŋunha mulkana, guwatjmara Garraynhana. Bala ŋayi Mawtjitj nhinananydja yukurrana ŋunhalana bukuŋurana waŋgany ŋaḻindi ga ḻurrkun' walunydja bäythinyaranydja.