34
1-3 Ga dhawar'yurrunanydja ŋayi waŋanharaŋurunydja Mawtjitj, bala yana ŋayi gonha'yurrunana ŋunhiyinydja yolŋu'‐yulŋunhanydja, bala marrtjinana ŋayi nhinana bala, ŋal'‐way ŋal'yurruna ŋunhimalayi bukulilina, ga ŋulaŋuruna ŋayi nhämanydja marrtji warrpam' ŋunhiyi wäŋa Gaynanbuynydja.
4 Bala ŋayi Garrayyunydja wäŋana marrtji Mawtjitjkala milkuma bitjanna, “Yo, ŋunhana wäŋanydja nhäŋana. Dhuwalana ŋunhiyinydja wäŋa ŋarra ŋunhi dhawu'‐nherrara Yipurayimgu ga Yitjakku ga Djaykupku, ŋunhi ŋarra yurru wekama walalaŋgalaŋuwu yumurrku'wuna. Ŋarranydja nhuŋu marrtji yana dhuwala milkuma; nhämana nhe marrtji yurru yana, yurru yakana nhe gärrinydja yurru ŋunhimalayi wäŋalili.”
5 Bala ŋayi ŋuliŋurunydja Mawtjitjtja ŋunhi Garraywunydja yolŋu rakunydhinana ŋunhiliyina bäyma bukuŋurana, galkina ŋunhiliyina wäŋaŋura.
6 Bala ŋayipina Garrayyuna ŋanya dholkuŋalanydja munatha'liliyaŋalanydja; yakana ŋula yol yolŋu nhanukalaŋu marŋgi moluwunydja Mawtjitjkalaŋu.
7 Yo, Mawtjitjtja djawuḻpa'na wal'ŋu wirrkina, dhuŋgarranydja nhanŋu 120‐na ŋunhi ŋayi rakunydhinanydja, yurru nhanŋu rumbalnydja wuṉḏaŋarr warray, bäyma warray, bitjan yuṯana ŋayi yolŋu, ga yakana ŋayi bambaythinanydja ŋula.
8 Ga yolŋunydja walala Yitjuralpuyŋunydja ŋunhi ŋäthinyaminana, guyaŋinana manapara ŋanyana Mawtjitjnhana, yana liŋgu ga waŋgany ŋaḻindi djuḻkmaraŋala.
9 Yo, ŋäthilinydja ŋunhi Mawtjitjthu yiŋarra'yurruna Djatjuwanha, ŋayina yurru ŋurrulili wapthun, bala Djatjuwanydja ḻiya‐djambatjthinana wirrkina, liŋgu Garrayyu ŋanya ganydjarr wekaŋala ŋurikiyi djämawu. Bala yana ŋuriŋi yolŋu'‐yulŋuyu dhäruktja yukurrana märraŋalana ŋanya Djatjuwanha, malthurrunana nhanŋuwaynha yana dhärukku; walala ŋayathaŋala yukurrana romdja malanha ŋunhi baṯ bitjarrana, ŋunhi Garrayyu wekaŋala Mawtjitjkala.
10 Yo, Mawtjitjtja ŋunhi galkiwuynha wal'ŋu Garraywalaŋuwuynha; nhanukala Garraynydja ŋuli waŋanha mel‐yunupa, maṉḏa ŋuli buku‐nhänharaminya waŋanharaminyanydja.
11-12 Yakana wiripuŋuyunydja ŋula dhäruk‐gänharamirriyu yolŋuyu milkuŋala Garraywunydja ganydjarr, ga djäma ŋutuny'tja wal'ŋu rom, balanyaranydja rom bitjarra ŋayi Mawtjitjthu djäma ŋunhala Yetjippuyŋuwala buŋgawawala, milma bukmakkala ŋurikala Yitjuralpuyŋuwala.