10
1-2 Bala ŋayi Garray waŋana Mawtjitjkala bitjarra, “Ma' märraŋa ŋunhi guṉḏanydja maṉḏanha bilkpilktja maṉḏanha, bala gäŋana lili ŋarrakalana dhipala bukulilina, ŋarra yurru biyapul wukirri ŋunhimalayinydja maṉḏaŋulili ŋunhiyi rom malanha, bala nhe yurru ŋayathamanydja yukurra ŋunhilina dhawu'‐nherraṉminyarawuyŋurana bathiŋura.”
3-5 Ga bitjarra ŋayi Garray waŋananydja, bala yuwalkthi ŋayi wukirrinydja ŋunhiwala maṉḏaŋulili guṉḏalilinydja, ga ŋunhiyi guṉḏa maṉḏanha mukthun yana ŋunhilimi dhawu'‐nherraṉminyarawuyŋura bathiŋura.
10-11 Ŋunhalayi bukuŋuranydja ŋarra yukurrana nhinananydja weyinŋumirrina, 40‐na walu ga munha. Bitjarra liŋgu ŋarra yukurrana bukumirriyaŋalanydja nhumalaŋgu, bala ŋayi Garrayyunydja ŋäkulana ŋarranha ŋunhi bukumirriyanharawuynydja, yakana ŋayi baḏuwaḏuyurrunanydja nhumalanha, yana ŋayi ḻakaraŋalanydja ŋarraku bitjarrana, “Marrtjiyana‐wala yarrupthurrana, ga gäŋana ŋunhiyi yolŋu'‐yulŋunhanydja ŋurru‐warryurrana, märr yurru walala marrtjina‐wala yana gulŋiyirrina ŋunhimalayi wäŋalilinydja. Ga yuwalkthi ŋunhiyi wäŋanydja yurru nhumalaŋguway yana, liŋgu be ŋäthilinydja ŋayi Garrayyu dhawu'mirriyaŋala nhumalaŋgalaŋuwa märi'muwa walalambala.” Ga bitjarrayina ŋayi Mawtjitjthu ḻakaraŋalanydja yukurrana nhanukalayŋuwa yolŋu'‐yulŋuwanydja Yitjuralpuyŋuwanydja.
Rom‐wiyaṉiyiya biyaka Gunhu'wunydja
10:12–22 (This is what God wants you to do)
12 “Nhuma yolŋu'‐yulŋu Yitjuralpuyŋu, ŋäkanydja walala ŋamathaŋa mäkiri'‐witjurranydja. Dhiyaku ŋayi Garraynydja ḏukṯuk gam'. Nhuma yurru borrk‐beyaṉiyiya biyaka Garraywunydja nhumalaŋgalaŋuwu Godkunydja, ga ŋayathaŋa nhanŋu romdja warrpam'thurra yana. Märr‐ŋamathiya nhanŋu biyaka märryu‐ḏapmaraŋa mukthurra yana, ga buku‐ŋal'yurra nhanŋuway yana bukmakthu nhokalay yana ŋayaŋuyu ga rumbalyu.
13 Dhäruktja nhanŋu märraŋa yana ga nhiniyanydja yukirriya dhiyaŋu liŋgu romdhu ŋunhi ŋarra yukurra ḻakarama nhumalaŋgu gäthura, liŋgu dhiyaŋuyinydjayi romdhu nhuma yurru nhina yukurra walŋana.
14 Ŋunha garrwar wal'ŋu djiwarr' nhanŋuway yana dhulŋuŋu Godku, ga dhuwala munatha' wäŋa nhanŋuway dhulŋuŋu warrpam', ga bukmak nhä malanha dhiyalaŋumi munatha'ŋura, nhanŋuway yana dhulŋuŋu Garraywu wal'ŋu.
15 Godthu bini djarr'yuna warray yulŋunydja birrka'mirrinha bäpurru'nhanydja, yurru ŋayinydja djarr'yurruna nhumalanha warray, märr yurru nhuma nhanŋuway yana miṯtji, liŋgu wirrki yana ŋayi wal'ŋu märr‐ŋamathinanydja nhumalaŋgalaŋuwu märi'muwunydja walalaŋgu.
16 Yo, gonha'yurrana warrpam'thurrana dhuwali yätjtja malanha rom, ga dhäruk‐märraŋa ŋanyapinyay yana Garraynha, ga yakana mäkiri'‐yarryurra biyapulnydja.
17 Liŋgu nhumalaŋgunydja God ŋunhi biyapul warray wal'ŋu yindi warray, djuḻkmarama yukurra wiripuŋunhanydja nhänha malaŋunha waŋarrnha. Garraynydja ŋunhi ganydjarr‐ḏumurru wal'ŋu biyapul, djuḻkmarama yukurra bukmaknhanydja be nhänha walalanha ganydjarr‐ḏilkurrunha. Yakana yurru yolŋuyunydja ŋula yolthu bäyim Godnhanydja, märr yurru ŋayi djäma yukurra ŋilimurruŋgu dharrpalnydja rom, liŋgu ŋayinydja yukurra nhäma dhapirrkkuma yana rrambaŋikuma yolŋunha walalanha birrka'mirrinha.
18 Ŋayinydja ŋuli ŋaramurryirri ŋurikinydja yolŋuwu ŋunhi walala ŋuli yätjkuma ŋunhiyi goŋmiriwlili yolŋunha walalanha. Godtja yukurra märr‐ŋamathirri ŋuruku mulkuruwunydja yolŋuwu, ŋunhi ŋayi yukurra nhina nhumalaŋgala miṯtjiŋura, bala ŋayi ŋuli wekamana yana ŋuriki yolŋuwu mulkuruwunydja ŋathana ga girri'na, ŋula nhäna dhaṯthunminyarawuna.
19 Ga nhumanydja yurru bitjandhiyi bili märr‐ŋamathirri yukurra ŋurikiyi mulkuruwunydja yolŋuwu, ga djäka walalaŋgu, liŋgu nhumanydja ŋunhi nhumapinydja nhinanha ŋuli yukurranha mulkuruyi yana ŋunhala Yetjiptja wäŋaŋura.
20 “Yo, rom‐wiyaṉiyiya biyaka Garraywunydja nhokalaŋuwu Waŋarrwunydja. Dhäruk ŋanya märraŋa, ga buku‐ŋal'yurra nhanŋuway yana waŋganygu. Mam'thurra yana nhanukala yulŋunydja, ga nhanukala yana ŋuriŋi liŋgu yäkuyu dhawu'‐nherraṉmiyanydja.
21 Ŋayi nhumalaŋgu Godtja. Biyaka wokthurra nhanŋu djulŋithiya; nhanŋuway waŋganygu wal'ŋu ŋilimurru yukurra yurru wokthundja. Liŋgu muka nhuma nhäŋala ŋunhiyi, ŋunhi ŋayi djäma mirithirri yindi rom nhumalaŋgu.
22 Ŋäthili muka yana ŋunha nhumalaŋgu märi'mu walala marrtjina Yetjiplilinydja, ga walalanydja ŋunhi märr ŋuli ya' ḻurrkun' miṯtjinydja, yurru ŋayinydja Garrayyunydja nhumalaŋgu miṯtjinhanydja ŋunhi be warray dhaŋaŋguŋala warray. Dhiyaŋunydja‐wala nhuma dhuwala biyapulnha wal'ŋu bothurrumiriwnha, balanyarana bitjan ganyu' malanha ŋunha djiwarr'ŋura.”