23
Sinththafe Yaana Hidota
1 GODAY, «Ta heenththasohon diza ta dorsata dhayssizaytassinne laalliza heenththanchchatas aayye ana!» gees.
2 GODAA Isra7eele Xoossay ba asaa heemmiza heenththanchchatas, «Intte ta dorsata laallidi wora yeddida gishshassinne intte istta lo7eththi xeellontta aggida gishshas intte iitateththaas bessiza qixaate ta immana.
3 Hessafe guye ta wudeppe attidayta kase ta goodda yeddida dere ubbaafe tani tarkka shiishshada kase ta heemmizasoho zaara ehana; isttika hessan yelettidi corattana.
4 Tani lo7eththi heemmiza heenththanchchata isttas denththana; istti nam7anththo babbettennanne dagammettenna; isttafe issaadeyka dhayenna» gees.
5 GODAY,
«Tani Dawites xillo zare
denththana wodey yaana;
izi tumu pirdanne
xilloteth ooththizaade,
aadho erateththan haariza kawo gidana.
6 Iza kawoteththa layththan
Yuhuday attana;
Isra7eeleykka saron daana;
iza sunththi,
‹GODAY Nuus Xilloteththa› geetettana.
7 Hessa gishshas asay
hayssafe guye iza,
‹Isra7eele asaa Gibxe biittafe
kessidi ehida GODAY be7iin›
gi caaqqontta wodey yaana gees GODAY.
8 Gido attiin, ‹Isra7eele zareta
pudeha bagga biittafenne
izi istta laallida hara deretappe
kessida de7o GODAY be7iin›
gi caaqqana wodey yaana;
hessafe guye istti
bantta deren daana» gees.
Wordo Nabeta
9 Nabeta gishshas ta wozinay meqqides;
ta meqeththati ubbayka kokkorida.
GODAA gaasoninne
iza geeshsha qaala gaason
woyne ushshu uyidi
maththottiza asa mala gidadis.
10 Biittaya layman xalla kumadus;
qanggettida gishshas yeekkawus;
bazzon diza mehe heenththasohoti melida;
nabetikka geella oge kaallida;
baas imettida maataa
wogay baynda go7ettida.
11 GODAY, «Nabeti, qeeseti
xilloteththa ogera beettenna;
ta Keeththaa garsankka istti
ooththiza iitateththaa ta be7adis.
12 Hessa gishshas istta ogey hallixana;
isttika dhuman kundana;
istti gandigardi kundana;
istti qaxxayettiza wode
ta istta bolla pala miish ehana.
13 Tani Samaariyan diza nabeta bolla
ufayssontta miish be7adis;
istti Ba7aale sunththan
tinbite yootida;
ta deraa Isra7eelekka baleththida.
14 Yerusalaamen diza nabeta bolla
deexxiza iita miish be7adis;
istti laymateettes;
wordoteththan de7eettes;
oonikka ba iita oosoppe
simmontta mala
iitata minththeettes;
ta matan istti ubbayka
Sodoome mala,
izin diza asaykka
Gamoora mala» gees.
15 Hessa gishshas Ubbaafe Wolqqama GODAY
hayta nabeta gishshas,
«Yerusalaamen diza nabetappe
tuna miishshi kezidi
biitta ubbaan laalettida gishshas
ta istta camo kath mizana;
qasse marzettida
haath ushshana» gees.
16 Ubbaafe Wolqqama GODAY,
«Hayti nabeti tinbite
inttes yootizayssa siyopite;
istti inttena
wordo hidotan kunththeettes;
istti GODAAPPE gidontta
baappe medhdhi ekki yooteettes.
17 Tana kadhizayta isttas,
‹GODAY inttes
saro gidana gides› geettes;
bantta wozina muumeteththa
kaallizayta ubbaa
isttas, ‹Iita miishshi
inttena gakkenna› geettes.
18 Iza qaala siyanaassinne azazettanaas
GODAY de7iza shiiqon isttafe
oonee eqqanay?
Iza qaala ezgi siyiday oonee?
19 GODAA hanqoy gote carko mala dendana;
mino dambalay
iita asata hu7e shocana.
20 Iza wozina qofa
mulera polontta dishe
iza hanqoy coo hada simmenna;
guyeppe yiza layththatan hayssa
qonccen intte erana.
21 Hayta ha nabeta ta kiittabeekke;
gido attiin istti bantta kiita
ekki woxxeettes;
ta isttas yootontta
tinbite yooteettes.
22 Istti ta zoren eqqidaakko
ta qaala ta deraa sissana;
iita ogeppenne iita oosoppe
istta zaarana.
23 Tani matas xalla Xoossee?
Haahoska Xoos gidikkinaa?
24 Tani be7ontta mala geemason
qotetti attana asi dizee?
Salonne sa7a kumiday
tana gidikkinaa!» gees GODAY.
25 GODAY, «Tani agumettadis; tani agumettadis» gishe ta sunththan wordo tinbite haasayza nabeta qaala siyadis.
26 Ha yo7oy bantta wozina baleththon wordo tinbite haasayza nabeta wozinan ayde gakkanaas gam7anee?
27 Istta aawati Ba7aale geetettiza eeqaza gaason ta sunththaa dogida mala, istti issoy issaas yootiza agumon ta asay ta sunththaa dogana mala ooththidaa isttas misatees.
28 Agumettiza nabey ba agumaa yooto; ta qaalay izan dizaadey gidikko he qaala ammaneteththan yooto; happassinne kaththa ayfes ay gaytoteththi dizee?
29 «Ta qaalay tama malanne shuch qeriza naariqa mala gidennee?» gees.
30 GODAY, «Hessa gishshas qaala issoy issaafe kaysi kaysi ekkidi taappe ekkida mala yootiza nabetara ta eqettays.
31 Bantta doona cinccateththan, ‹GODAY hizgees› giza nabetara ta eqettays» gees.
32 GODAY, «Tani wordo agumo kaallidi tinbite yootiza nabetara eqettays; ta kiittontta dishin woykko ta shuumontta dishin xalateththan wordo yo7o yooteettes; ta derezakka baleththeettes; hayssa ha dereza aykkoka go7ettenna» gees.
Wordo Nabeta Tinbite
33 GODAY taas, «Ha derey, woykko nabey, woykko qeesey, ‹GODAAS tooho gididay aazee?› giidi oychchiko, ‹GODAAS toohoy inttena; hessa gishshas tani inttena wora olana› gees ga yoota.
34 Nabey, woykko qeesey, woykko ay asikka, ‹Hayssi GODAA tooho› giidi haasaykko tani hessaadenne iza soho asaa qaxxayana.
35 Issoy issoy ba lagge woykko ba dabbo, ‹GODAY ay zaaro immidee?› woykko, ‹GODAY yootiday aazee?› giidi oychchanaas bessees.
36 Hayssafe guyen gidikko, ‹GODAA tooho› giidi intte haasayanaas bessenna. Gaasoykka as ubbaas izi haasayda qaalay izas tooho gidiza gishshas de7o Xoossa, Ubbaafe Wolqqama GODAA nu Xoossa qaala intte bokkiseeta.
37 Hessa gishshas nabezas, ‹GODAY inttes ay zaaro immidee?› woykko, ‹GODAY yootiday aazee?› gaada oychchanaas bessees.
38 Gido attiin intte, ‹Hayssi GODAA tooho› giikko, GODAY tani inttena, ‹Hayssi GODAA tooho› goopite giinkka intte, ‹Hayssi GODAA tooho› gideta.
39 Hessa gishshas inttena, qasseka inttessinne intte aawatas ta immida katamayra gaththada yegga aggana; ta sinththafekka wora olana.
40 Mernaas dogettontta mernaa yeellateththinne kawushshateth ta intte bolla ehana» gides.