59
Nagara Maareteththinne Wozzeteth
1 Hekko GODAA kushey inttena
ashshanaas qaammibeenna;
iza hayththi
siyanaappe tullibeenna.
2 Gido attiin intte qohoy inttena
intte Xoossaafe shaakkides;
intte nagaray iza ayfeso
inttefe genththides.
Hessa gishshas izi siyenna.
3 Intte kushey suuththan,
intte biradhdheyka
qohon muulettides;
intte doonay wordo haasaydes;
inxarsati iita yo7o sissida.
4 Xilloteththan mootizay baawa;
tumateththan pirdizay
oonikka deenna.
Hada yo7on ammanetteettes;
wordo haasayeettes;
shiro qanththatidi iitateth yelida.
5 Istti shooshsha
phuuphphulle haphphida;
achcharo keeth keexxida;
istta phuuphphulleta
miza asi hayqqees;
isttafe issoy meqqiko
puukkiza shooshshi kezees.
6 Istta qacinay may7o gidenna;
istti ooththidayssan bantta bolla
kammana dandayettenna;
istta oosoy iita;
istta kushetan
makkalla oosoy kumides.
7 Istta tohoti nagarakko woxxeettes;
xillo suuth gussanaas eesoteettes;
istti iita qofa qoppeettes.
Bashshinne qohoy
istti aadhdhida oge ubbaas malata.
8 Istti saroteththa oge erettenna;
istti biza ogen
suure pirday baawa;
istti bantta oge geellasida;
he ogera bizay saro demmenna.
9 Hessa gishshas
suure pirday nuuppe haakkides;
xilloteththika nuukko gakkenna.
Nuni poo7o koyidos;
gido attiin ubbay dhuma gidides;
wagagga poo7o koyidos;
gido attiin sakkanna
dhuma gidides.
10 Qooqe mala
gimbeza bolla gandigardos.
Nu hemetay ayfey baynda
asa mala tattafeteth gidides;
arshey wullishin haniza
seeta gallas dhuphettidos.
Qasse mino asata giddon nuni
hayqqida asa mala gididos.
11 Nuni ubbay zardo mala laawoos;
haraphpheta malakka
ceecishe guugumoos;
nuni suure pirda koyidos;
gido attiin demmibeekko;
attana koyidos;
gido attiin izi nuuppe haakkides.
12 Gaasoykka nu qohoy
ne sinththan darides;
nu nagaraykka
nu bolla markkattides.
Nu mooroy nuuppe
shaakettibeenna;
nu makkallateththaaka
nuni eroos.
13 Nuni GODAA bolla makkallidi
wordo haasaydos;
nu Xoossaa kaalo aggidi
sher7i gidos;
makkallateththinne
gene yo7o haasaydos.
Nu wozinay shaari uttida
wordo haasaydos.
14 Hessa gishshas suure pirday
guye sugettides;
xilloteththika nuuppe haakkides;
tumateththi oge bolla
dhuphettides;
suureteththika gelanaas
dandaybeenna.
15 Tumateththi awankka beettenna;
iitateththaafe haakkizay
qohettees;
GODAY be7idi suure pirday
dhayda gishshas ceecides.
16 Oonikka bayndayssa be7ides;
izakko gaannatizay bayndayssa
be7idi malalettides;
Hessa gishshas iza qesey
izas atoteth ehides;
iza xilloteththi iza kaafi oykkides.
17 Izi xilloteththa xurure mala
tiran may7ides;
atoteththaa birata qoobe mala
ba hu7e bolla woththides.
May7o garsara may7iza mala
halo keso may7ides;
may7o gophi may7iza mala
qanaate bollara gophides.
18 Istta ooso mala
hanqo ba baalgaaratas,
pirda ba morkketas izi qanxxana.
Haruro biittatas istta
ooso ooso mala immana.
19 GODAA peenoy sugi ekki biza
wolqqama di7o mala yaana.
Hessa gishshas arshey
wulliza baggara dizayti
GODAA sunththas yayyana;
arshey mokkiza baggara dizayti
iza bonchchos haarettana.
20 GODAY, «Wozzizaadey Xiyoonessinne
Yaaqoobe zaretan bantta nagara
paaxidaytakko yaana» gees.
21 Qasseka GODAY, «Ta baggara taassinne isttas diza caaqo qaalay hayssa; intte bolla diza ta Ayanaynne tani intte doonan woththida ta qaalay hachchife doommidi mernaa gakkanaas, intte doonappe, intte nayta doonappenne intte zereththa doonappe shaakettenna» gees.