43
Xoossa Deraa Ashshizaade
1 Ha7i gidikko Yaaqoobe,
nena medhdhiday,
Isra7eele! Nena giigsida GODAY,
«Tani nena
wozzida gishshas yayyofa.
Tani nena ne sunththan xeygadis;
neni taassa.
2 Neni haaththa giddora pinniza wode,
tani nenara gidana.
Neni pinnishin
shaafay nena mittenna;
neni tama giddora bishin
nena xuuggenna;
tama lacoykka nena meenna.
3 Gaasoykka tani GODAA ne Xoossay,
Isra7eele Geeshshay nees dhale;
Ta ne gishshas
Gibxe wozzo immana;
Tophphiyanne Seeba
ne gishshas aaththa immana.
4 Neni ta sinththan al7onne
bonchcho gidida gishshas,
tani nena siiqiza gishshas,
asaa ne gishshas,
kawoteththata
ne shemppo gishshas
laame immana.
5 «Tani nenara diza gishshas yayyofa;
tani ne nayta arshey
mokkiza baggafe ehana;
nena arshey wulliza
baggafe shiishshana.
6 Tani pudeha bagga, ‹Hamma›
dugeha baggaka, ‹Yedda› gaana;
ta attuma nayta haahoppe,
ta macca naytakka
biitta gaxappe,
7 ta sunththan xeygettida ubbaa,
ta bonchchos ta medhdhidayta,
tani giigsidayssanne
ta ooththidayssa
hammite» gaana.
8 Ayfey dishin qooqidayta,
hayththika dishin
tullidayta kessa.
9 Kawoteththati ubbay
issife shiiqetto;
asaykka issi bolla shiiqo;
isttafe kasetidi
hayssa nuus yootiday oonee?
Beni miish nuus awajjiday oonee?
Harati siyidi,
«Hayssi tuma» gaana mala,
istta tumateththayka
qonccana mala
bantta markkata ehetto.
10 «Intte tana erana malanne
ammanana mala,
izi tana gididayssa
intte akeekana mala,
ta markkatinne ta doorida
ta aylleti inttena.
Taappe kase
hara xoossi oosettibeenna;
taappe guyenkka
hara xoossi deenna.
11 Tana; tani GODAA;
Taappe attiin hara ashshizay deenna.
12 Tani qonccisadis;
ashshadissinne yootadis;
intte giddon hara
allaga xoossi de7ibeenna.
Tani Xoossa gididayssas
intte ta markkatta.
13 Beniisofe doommada tani tana;
ta kusheppe
kessi ekkanay deenna;
ta ooththizayssa laammanawu
dandayzay oonee?» gees GODAY.
Ammanettontta Isra7eeles Xoossa Maaroteth
14 GODAY inttena wozziza
Isra7eele Geeshshay,
«Intte gishshas Baabiloone bolla
olanchchata kiittana;
istti ceeqettiza markabetan,
Baabilooneta ubbaa
beettana mala ooththana.
15 Tani GODAY intte Geeshshay,
Isra7eele medhdhida
intte kawo» gees.
16 Abbaa giddora oge,
wolqqama haaththa
giddora aadhdhizaso
kessida GODAY,
17 para-gaaretanne parata,
olanchchatanne
mino asata ubbaa ehidi,
istti zaari dendontta mala
zaqullisida GODAY,
muqaadda bidntha mala
istta dhayssida GODAY,
18 «Beni yo7ota hassa7opite;
kase aadhdhidayssa balite.
19 Hekko ta ooraththa
miish ooththana;
izikka ha7i hanana;
intte yuushshi qoppeketii?
Tani bazzon oge giigsana;
tani aykkoy baynda bazzonkka
shaafata kessana.
20 Bazzo do7ati,
worakanatinne guttoti
tana bonchchana.
Tani bazzo biittan haath,
aykkoy baynda bazzonkka
pultto immana;
ta doorida ta deraas
haath immana.
21 Tani taas giigsida derey
ta galataa awajjana mala
ta hayssa ooththana.
22 «Yaaqoobe, ne tana xeygabeekka;
Isra7eele, ne tana salettadasa.
23 Neni taas xuugettiza yarshos
dors ehabeekka;
ne yarshonkka
tana bonchchabeekka.
Tani nena kaththa yarshon
waayisabeekke;
exaane yarshonkka
saleththabeekke.
24 Neni taas lo7o
sawiza exaane shammabeekka;
modhdho yarshon
tana kalssabeekka.
Gido attiin ne nagara tooho
tana toossadasa;
qohon tana daaburissadasa.
25 «Ta gishshas gaada
ne qohoza dhayssizay tani tana;
ne nagaraa ta qoppike.
26 Ane kase aadhdhidayssa
tana qofsa;
ane issife shiiqidi qoodhettoos;
ne tumateththaa ane erisa.
27 Ne aawa koyroyssi
nagara ooththides;
ne astamaaretikka
ta bolla makkallida.
28 Hessa gishshas tani ne Xoossa
Keeththa halaqata kawushshana;
Yaaqoobe bashshas,
Isra7eelekka cashshas
aaththa immana» gees.