15
ዉርሴꬃ ቦሻታ ኦይኪዳ ኪታንቻታ
1 ታኒ ሃራ ዎልቃማ ማላታ ሳሎ ቦላ ቤያዲስ፤ ጾሳ ሃንቆይ ኢስታን ፖሌታናስ ዉርሴꬅ ጊዲዳ ላፑን ቦሻታ ኦይኪዳ ላፑን ኪታንቻታ ቤያዲስ።
2 ሄሳፌ ጉዬ ታማራ ዋላኬቲዳ ማስቶቴ ኣባ ሚሳቲዛ ሚሽ ቤያዲስ፤ ሄሳꬆካ ሄ ዶኣዛኔ ኢዛ ሚስሌዛ ኢዛ ሱንꬃ ቁጹሬዛ ማላታ ጾኒዳይታ ቤያዲስ፤ ጾሲ ኢስታስ ኢሚዳ ዲꬃ ማላ ባጋና ጌቴቲዛይሳ ኦይኪዲ ማስቶቴ ሚሳቲዛ ኣባ ኣቻን ኤቂዳ።
3 ጾሳ ኦሳንቻ ሙሴ ዬꬂኔ ዶርሳዛ ማዛሙሬ፥
«ኡባ ዳንዳይዛ ጎዳ ጾሶ!
ኔ ኦሶይ ጊታኔ ማላሊሲዛዛ፤
ዴሬ ካዎዞ!
ኔ ኦጌይ ሊኬኔ ቱማ።
4 ጎዶ፥ ኔስ ባቦንታ ኣሲኔ
ኔ ሱንꬅ ቦንቾንታ ኣሲ ኦኔ?
ኔኒ ኔርካ ጌሻ፤
ኔ ቱማ ፒርዳይ
ቆንጪዳ ጊሻስ
ዴሬቲ ዉሪ ዪዲ
ኔ ሲንꬃን ኔስ ጎይናና»
ጊ ዬጺዳ።
5 ሄሳፌ ጉዬ ታ ዛራ ጼሊሺን ካሴ ማርካቴꬃ ዱንካኔ ጊዲዳይሲ ጾሳ ኬꬂ ሳሎን ዶዬቲዴስ።
6 ላፑን ቦሻታ ኦይኪዳ ላፑን ኪታንቻቲ ጾሳ ኬꬃፌ ኬዚዳ፤ ኢስቲ ጌሽ ጊዲዲ ጾልቂዛ ቦꬃ ማይኦ ማይኢዳ፤ ዎርቃፌ ኦሴቲዳ ዳንጮ ማላ ማይኦ ቲራ ቦላ ቃቺዳ።
7 ኦይዱ ዶኣታፔ ኢሶይ ላፑን ኪታንቻታስ ሜርናፔ ሜርናስ ዲዛ ጾሳ ሃንቆይ ኢስታን ኩሚ ኡቲዳ ላፑን ዎርቃ ጹኣታ ኢሚዴስ።
8 ጾሳ ኬꬃይካ ጾሳ ቦንቾፌኔ ኢዛ ዎልቃፌ ዴንዲዳይሳን ጩዋይ ኢዛን ኩሚዴስ፤ ላፑን ኪታንቻቲ ባ ኩሼን ኦይኪዳ ላፑን ቦሻቲ ፖሌታና ጋካናስ ኦኒካ ጾሳ ኬꬃ ጌላናስ ዳንዳይቤና።