46
ባቢሎኔ ጾሳታ
1 ቤሌይ ካዉዪዴስ፤
ኔቦይ ኬሂ ጉጺዴስ፤
ኢስታ ኤቃ ጾሳቲ
ጫና ሜሄታን ጫኔቲዳ፤
ኢስቲ ኦይኪ ዩዪዛ
ሚስሌቲ ቶሆ፤
ዳቡርዳ ሜዶሳታስ ዴጾ ባኦ።
2 ኢስቲካ ኢሲ ቦላ ዱጌ ጉፋናና፤
ጫናካ ኣሻና
ዳንዳዬቴና፤
ኢስቲካ ዲኤቲዲ ባና።
3 ጎዳይ፥ «ኢንቴኖ ያቆቤ
ሶ ኣሳቶ!
ኢስራኤሌፔ ኣቲዳ ኡባቶ!
ኢንቴ ኢንቴ ኣዪ ኡሎን
ሻራ ኣቶሳፌ ሃ ሲሚን
ኢንቴና ታ ኦይኪዳይቶ!
ኢንቴ ዬሌቶሶፌ ዶማዳ
ታ ቶኪዳይቶ!
ታ ጊዛ ሲዪቴ።
4 ኢንቴ ጪሚዲ
ፑሉማና ጋካናስካ
ኢንቴና ቶኪዛይ ታና፤
ታኒ ታና፤
ታኒ ኢንቴና ሜꬋዲስ፤
ታኒ ኢንቴና ቶካና፤
ታኒ ኢንቴና ካፋና፤
ታ ኢንቴና ኣሻና።
5 «ታና ኦናራ ጊኒሴቲ?
ታና ኦናራ ሊኪሴቲ?
ኑኒ ኢሲኖ ሚሳታና ማላ
ታና ኦናራ ጌዳሬቲ?
6 ኣማርዳ ኣሳቲ ዎርቃ
ባንታ ካራጺቴፔ ቆሌቴስ፤
ቢራካ ሜዛኔን
ጌዳሬቴስ፤
ኢስቲ ሴሪሲ ቲጊዛ
ሂላንቻ ቃጻሬቴስ፤
ኢዚካ ኢስታስ ጾሳ
ሂስቲ ሜꬌስ።
ኢስቲካ ኢዛስ ጎይኔቴሲኔ
ያይኔቴስ።
7 ዴንꬂዲ ባንታ
ሃሼን ቶኬቴስ፤
ዛሪዲ ሄ ዴንꬂዳ
ሶሆን ዎꬄቴስ፤
ኢዚካ ሄን ኤቃ ጌስ፤
ሄፔ ኣዋካ ቃጼና፤
ኦኒካ ኢዛኮ ዋሲኮ
ዛሮ ኢሜና፤
ሜቶፔካ ኢዛ ኣሼና።
8 «ኢንቴኖ ሞራንቻቶ!
ሃይሳ ኣኬኪቴ፤
ዩሺካ ቆፒቴ፤
ኢንቴ ዎዚናን ቁምኢ ኦይኪቴ።
9 ካሴ ቤኒ ዎዴ
ሃኒዳ ዮኦታ ኣኬኪቴ፤
ታኒ ጾሳ፤
ታፔ ሃራይ ዴና፤
ታኒ ጾሳ፤
ታ ማላይ ኦኒካ ዴና።
10 ዉርሴꬃን ሃናናይሳ ኮይሮታ፥
ቡሮፔ ያናይሳ ቤኒ ዮታዲስ፤
‹ታ ሃልቾይ ሚኖ፤
ታና ኡፋይሲዛዝ ኡባ
ታ ኦꬃና› ጋዲስ።
11 ኣርሼይ ሞኪዛ ባጋፌ
ቦንቂዛ ኣርጋንꬅ፥
ሃሆ ቢታፌ ታ ቆፋ
ፖሊዛ ኣስ ታኒ ጼይጋና።
ታ ዮቲዳይሳ ታ ኦꬃና፤
ታ ሃልቺዳይሳ ታ ፖላና።
12 «ኢንቴኖ ዎዚና ሹቻቶ፥
ጺሎቴꬃፌካ ሃኪዳይቶ፥
ታና ሲዪቴ።
13 ታኒ ታ ጺሎቴꬃ ኤሆን ዳይስ፤
ሃሆ ጊዴና።
ታ ኣቶቴꬃይ ጋምኤና፤
ታኒ ጺዮኔ ኣቶቴꬅ።
ኢስራኤሌ ቦንቾ
ማይዛና» ጌስ።