21
Am7ey imota
(Mar 12:41-44)
1 Yesusi dhoqu gi xeellishin dure asati Xoossa Keeththen muxuwata izan shiishshizayssa giddon muxuwata yeggishin beydes.
2 Qasseka issi am7o dizaara nam7u sikina gidiza nam7u xarqimala he muxuwata izan shiishshizayssan yegishin xeelidi,
3 “Ta intes tumu gays; hanna am7eya ubba asappe bollara aadhdheth immadus gides.
4 Hayti asati immiday baas diza tirpafe gidishin iza gidikko baas baynda wolqafe baas dizaronne ba duussas koshshizaro wursa yeggadus” gides.
Xoossa Keeththi laalettanayssa Yesus kasetidi yootides
(Mato 24:1-2; Mar 13:1-2)
5-6 Iza kaallizaytappe issi issi asati Xoossa Keeththay lo7o shuchchaninne asay immida imotan ay mala lo7i keexettidakko giidi ba giddon haasayettishin Yesusi siydi “Hayssi inte beyizayssi wuri laalettonta shuchchi shuchcha bolla keelettida mala attonta wodey yaana” gides.
7 Istika iza “Astamaare! Hayssi wuri ayde hananee? Qasse hayssi hananayssas malatay aazee?” giidi oychida.
8 Izikka istas “Inte balettonta mala naagettite; daroti bana ‘Ta Kirstoosakko! Wodeykka matides’ gishe ta sunthara yaana shin inte ista kaallofte.
9 Ola gishshinne dere makalatetha gish siyiza wode daggamofte. Hessi wuri kasetidi hananas bessees; wursethi gakkides; gido attin heerakka hanenna” gides.
10 Qasse “Derey dere bolla, kawoy kawo bolla dendana.
11 Biittay wolqama qaath qaaxana; koshaynne boshay dumma dummason hanana; daro babissizazinne saloppe gita malatay beettanna.
12 “Hessi wuri hananappe kasetidi asay intena oykkananne gooddana; Ayhuda Woosa Keeththinne qasho keeththe gelthana; kawota sinthinne daannata sinth shiishana. Hessi wuri ta suntha gish inte bolla gakkana.
13 Hessi wurikka markattanas lo7o qaada gidana.
14 Hessa gish nuna oychizaytas nu ay zaarinoo? giidi kasetidi hirgonta mala hayssa woznan woththite.
15 Inte morketappe oonikka intenara eqettanassinne baleththanas dandayonta qaalanne cincateth ta intes immana.
16 Intena yelidaytinne inte ishati, inte dabbotinne inte laggeti wuri intena aaththi immana; intefe baggata wodhana.
17 Ta suntha gish ubba asa achchan inte ixettana.
18 Gido attin inte hu7e binanatappe issinaka dhayukku.
19 Inte minni eqqikko inte shempo inte ashshana.
Yesusi Yerusalame dhayo gishas kasetidi yootides
(Mato 24:15-21; Mar 13:14-19)
20 “Ola asay Yerusalame giddoththishin beykko izis dhayiza wodey matidayssa erite.
21 He wode Yuhudan dizayti pude zuma bolla gangetto; kataman dizaytikka katamappe kezite; dere giddon dizaytikka he katamayo geloppetto.
22 Xaafettidays wuri polettanas hanna halo kessiza wode.
23 Biitta bolla gita metoy hanana; hayssa dereza bolla hanqoy yaana; hessa gish he wode qanthara diza macasatassinne dhanthiza aayetas aayye ana!
24 Bagga asay mashshan hayqqana; ba dereppe hara dere di7ettana; Yerusalameykka Xoosse eronta dereta wodey polettana gakkanaas, Xoosse eronta asatan yedhetidaro gidana.
Asa Naa nam7antho yuussa gish
(Mato 24:29-31; Mar 13:24-27)
25 “Awa arshe bolla, agina bollanne xoolinte bolla malatay beettana; Abbafenne abba dambala giirissafe dendidayssan biitta bolla diza derey hirgananne metottettana.
26 Salo wolqamati qaaxiza gish asay biitta bolla aaze hananesha guussaninne naagon xalla daaburana.
27 He wode Asa Nay wolqara, gita bonchoranne shaarara yishin beyana.
28 Inteka hayti ha ta gidayti poleteth oykkishin intes atetha wodey matida gish siti gi eqqite; inte ayfe pude dhoqu histite” gides.
Goda yuussa malatiza balase mithay leemiso
29-30 Kaalethidi “Balase mithinne hara mithata wursi xeellite; he mithati haythe kessishin inte beyiza wode boney matidayssa inte ereeta.
31 Hessathokka haytanti geetettidayti polettishin inte beyiza wode Xoossa Kawotethi inteko matidayssa erite.
32 “Ta intes tumu gays; hayssi wuri polettana gakkanaas ha yelettay aadhdhenna.
33 Saloynne sa7ay aadhdhana shin ta qaalay aadhdhenna.
34 “Histikko wogay baynda duussan, daro ushshaninne duussas hirgan inte woznay daaburopo; hessa ooththonta ixikko he gallassay inte qopponta narxa mala inte bolla gakkonta mala naagettite.
35 Hayssi biitta bollan diza asa ubba bolla gakkana.
36 Hessa gish buro yaanayssafe inte kessi ekkana malanne Asa Naa sinthan eqqanas dandayana mala ubba gallas minnidi woossite” gides.
37 Yesusi gallas gallas Xoossa Keeththan tamarsi tamarsidi omars omars Dabrazayte geetettiza zuma bolla kezi kezi aqqees.
38 Asay wurikka izappe siyanas maalado wontara Yesusakko Xoossa Keeththe yees.