Da bul ‘amen’ manamur ta tiga sinsaring wara hadadas ma hatutun no sinsaring. Iasen bia no English i tangai ‘amen’ ma pai kis manamur tiga sinsaring, da pukusanei bia ‘A tutuna’ (Rom 1.25; 1 Pita 4.11; 5.11).

Iesu ga gilamis ra sangahul ma irua na bulu na hausur bia diet na mon ra dadas wara kurkurei timaan no lotu (Matiu 10.1-4). Diet ing diet ga nas Iesu ing ga lon ma ing ga tut hut sukun ra minaat (Apostolo 1.21-22). Diet ira mangana tultulai wara hinhinawas tano tahut na hinhinawas ma sen diet ga kurei no lotu mah, ma diet no burena tano lotu (Epesas 2.20). Di ga kilam Pol ma Banabas ma aring mes bia ‘apostolo’ mah. Ma da kilam diet bia ira ‘apostolo’ kanong pataie ta nianga tano udahat nianga oro kapkap timaan no kukuraina ta tiga tamat na tultulai tano lotu nong git gilgil warkurai mah. Ma a mon hartabar na apostolo tano Tanua mah (1 Korin 12.28-29; Epesas 4.11).

Ira kaunsil tano pisa na hala Aten diet git kiskis hulungai aram tiga uladih di ga kilam ia bia no Ariopagas, hua di gaam kilam no kis hulungai ta kaikek ira kaunsil bia no ‘Ariopagas’ mah.

Aras tano hanuo Esia ira halengin diet ga lotu tupas no hahin na tadaar di ga kilam ia bia Atemas ma di ga pakilei ira palimpua haruat ma ia. Di ga lik bia ga harahut ira hahin wara kinakaha ma ira nian wara kumkubur timaan. Ma no nuna tamat na hala na lotu aras Epesas.

No hinsana tiga tadaar ing aring mataniabar ing pai Israel diet, diet ga lotu tupas ia. Ma di ga kilam ia bia no watong nudiet ira sakana tanua, hua gi haruat ma ne Satan.

Da kilam no Buk Sam bia no Buk na Nirudu kanong kaikek ira Sam diet ira nirudu.

Ira Iudeia diet git sangsangeh ma diet git lalotu tano liman ma irua na bung tano wik wara liklik lah no sinangeh ta God (nas Buk Stat 2.3). Pa ga tale diet bia diet na gil pinapalim bia diet na haan tapaka ta iakano bung. Ma di ga hatahun no Bung na Sinangeh ra Bung Liman ra melsur tuk ra Bung Tagura ra melsur mah.

Ira mangana tena mintot aras Gris ing diet ga manga liilik ma diet ga manga iangianga utano ngaas wara kapkap ra gungunuama ma diet ga lik bia iakanong no suruna ta ira nudiet nilon.

Ira mataniabar aras Gris (nong di kilam mah ia bia ‘Akaia’) di ga kilam diet bia ira ‘Grik’. Pa diet ga lotu tupas no God tutun. Ma aring pakaan da nas bia di haruatanei ira Grik ma ira Iudeia wara nianga uta diet ing pa diet ga nunurei God ma diet ing diet ga nunurei no God tutun.

Aitul a mangana hala na lotu ta ira Israel. Manaluai sakit di ga gil tiga hala na lotu ma ra maal aram ra hanua bia (nas Apostolo 7.43-44; Hibru 8.5; 9.2; 9.21; Ninaas 15.5). Namur di ga gil no tamat na hala na lotu aras Ierusalem ma iakanong no halhaliana sibaan anudiet ira Iudeia kanong ta iakano tamat na hala na lotu sen mon diet ga tale bia diet na tun hartabar tupas God tana (Matiu 17.24; 23.16; 24.15). Ira Iudeia ira luena Kristian, diet ga hatahun ira nudiet lotu mah kaia iasen namur diet ga gil ira nudiet hala na lotu at (Apostolo 2.46; 3.1; Rom 16.5). Ma a mon nat na hala na lotu ta ira tamtaman ing a mon Iudeia kaia. Ira Iudeia diet git lalotu narako tana ma diet git hauhausur kaia. Ma Iesu ma Pol dir git laklaka ta kaikek ra hala na lotu oro warawai (Mak 1.21; Apostolo 9.20; 13.42; 19.8).

No hinanuat ta Iesu ga hatahun no hauhawatina ta ira pakana bung tano ula hanua ing ira poropet manaluai diet ga iangianga uranei (1 Korin 10.11; Hibru 9.26). Ma i tale bia da tangai bia dahat lon kaiken tano hauhawatina (Ioanes 2.18). Iasen ing Iesu na tapukus balin iakanong no haphapataam tano hauhawatina ta ira pakana bung ma Matiu 24, 1 Korin 15, 2 Tesalonaika 4 ma 5, ma no Buk Ninaas i manga iangianga utana.

Kaiken ira aitul a hinsang ta diet ira bulumur ta Iakop. I nanaas bia manaluai sakit di ga kilam diet bia ‘Hibru’ kanong Eber tiga hintubu diet (nas Luk 3.35). Ma di ga kilam diet bia ira ‘Israel’ mah kanong ‘Israel’ tiga mes na hinsane Iakop (nas Buk Stat 32.28). Ma manaluai at ira Asiria diet ga tulei sei ira sangahul na huntunaan ta Israel ma sen pa di ga tulei sei no huntunaan Iuda, hua no huntunaan Iuda ga hatahuat ra haleng na tunatuna ta iakano taman. Ma iakanong no burena bia tano pakana bung ta Iesu di ga manga kilam diet bia ira ‘Iudeia’.

God ga kukubus taar ta Dawit bia na hatur no nuna kinkinis na warkurai ma pa na pataam (nas 1 Samuel 7.16). Ma ira Iudeia diet ga nunurei bia no Mesaia nong na hatur hatikanei iakano kinkinis na warkurai ma diet ga kis kahai no pakana bung bia no Mesaia na hanuat ma na hatahun oro kurkurei ma oro balbalaurei timaan diet ira mataniabar ta God. Hua ing Ioanes na tena bapitaiso ga hanuat ga warawai bia ira tunatuna diet na lilik pukus ing diet naga tagura taar wara ninlaka ta iakano matanitu ta God (tano nianga nalamin ma no nianga na English da kilam ia bia no ‘kingdom’). Ma Iesu ga manga harpir bia no nuna kinkinis na warkurai a mangana linga sa ia. Pa ga manga haruat ma ira lilik ta ira Iudeia. Ira Iudeia diet ga lik bia no Mesaia na haliarei ira Rom ma na halangalanga sasei diet sukun ira dadas ta ira Rom ma na hatahun no nuna kinkinis na warkurai ma na balaurei timaan diet. Iasen Iesu ga hapuasnei bia no nuna matanitu pai makai tano ula hanua (Ioanes 18.36). A mangana linga ia bia diet ing diet nurnur tana, God na lik luban sei ira nudiet magingin sakena waing diet naga haan tupas ia ma na kurei timaan diet hoing no nudiet Watong. Ma ing bia tikai na sola tano matanitu ta Kalou, na kap no harhalon hathatikai ma dir na harnunurai ma Kalou.

No nianga ‘Karisito’ a nianga na Grik ia. Ma bia da pukusanei ia tano nianga na Hibru anudiet ira Iudeia da kilam ia bia ‘Mesaia’. Kaikek ira irua nianga dir haruat mon. Di ga kilam Iesu bia no Karisito bia no Mesaia (nas ‘Mesaia’ tano hinhinawas palai tano kukuraina). Ma namur tano tuntunut hut ta Iesu di ga pas ia bia ‘Karisito’ mah kanong ia no Karisito. Hua ta ira pakpakat namur ta ira aihat na Tahut na Hinhinawas di ga kilam ia bia Iesu Karisito bia Karisito Iesu bia Karisito sen mon.

God ga gil tiga kunubus naluai ma ira Israel tano pakana bung ta Moses ing Kalou ga tar ira nuna warkurai ta diet. Tano nianga nalamin da kilam ia bia no Olpela Testamen bia Olpela Kontrak. Iasen no minaat ma no tuntunut hut ta Iesu ga gil tiga sigara kunubus (Hibru 8.13 i manga palai uta iakan). Tano nianga nalamin da kilam ia bia no Nupela Testamen bia Nupela Kontrak. Ma ta iakan ra kunubus God ga kukubus taar bia na lik luban sei ira magingin sakena ta tikai ing bia na nurnur ta Iesu. Ma iakan ra pakpakat no hinhinawas uta iakan ra sigara kunubus God ga tar ta dahat, ma da kilam iakan ra pakpakat bia no ‘Sigara Kunubus’.

Ira Iudeia diet git gilgil iakan ra lukara tiga pakaan tiga tinahon ma ra gungunuama kanong diet gata bul tanakurua taar. Ma diet git gilgil ira palpalih diet gaam git kiskis narako ta kaikek ra palpalih ta liman ma irua na bung wara liklik lah ira aihat na sangahul na tinahon ing ira hintubu diet diet ga hanahaan tano hanuo bia.

Ira Iudeia diet git kutkut ira palatamai diet ira nat na bulu tunaan haruat ma no hartulai Kalou ga tar ia ta Abraham (nas Buk Stat 17.9-14). Ma iakano magingin a hakilang ia bia tikai ga mur no kunubus ta God. Ma ira Iudeia diet ga lik bia ing tikai pa na mur iakano magingin, pai tale bia na kap no harhalon ta God haruat ma no nuna kunubus kanong pai mur ira warkurai ta God. Iasen Pol ga hinawas palai bia ing da kut no palatamai tikai bia pa da kut ia, pataie ta linga. No tamat na linga bia tikai na nurnur sen mon ta Karisito wara kapkap no nilon. Ma a tamat na hargau ga kis nalamin tano lotu bia da supi bia da kut ira palatamainari bia taie. Ma ta Apostolo 15 i tale bia una was no pir bia ira lualua na lotu diet ga tar ra palai na hinhinawas bia pai supi bia da mur iakan ra magingin oro kapkap no harhalon ta God, ma i palai bia ira Iudeia ma dahat ing pai Iudeia dahat, dahat bakut dahat tale bia dahat na haan tupas God ma ra nurnur sen mon ma pataie ta ira gingilaan dahat na gil bia ira warkurai ta Moses dahat na mur.

No nianga ‘Mesaia’ a nianga na Hibru anudiet ira Iudeia ia. Ma bia da pukusanei ia tano nianga na Grik da kilam ia bia ‘Karisito’. Kaikek ira irua nianga dir haruat mon. No kukuraina tutun tano nianga ‘Mesaia’ i hoken, bia da kapal tikai ma ra wel wara gilgilamis ia ta tiga tamat na pinapalim. Tano Olpela Testamen di git gilgil hua ta ira poropet, ira tena pakila lotu, ma ira tamat na tena gil warkurai. Ma no Olpela Testamen i hinawasei dahat bia God ga manga hapidinau ira Israel kanong diet ga gilgil ra sakena ma sen ga kukubus taar bia na haidanei mah diet namur. God ga kukubus bia tano hauhawatina ta ira pakana bung na tulei iakano tunatuna nong i ta gilimis ia oro halhalon ma oro kurkurei timaan ira nuna mataniabar. Ma tano pakana bung ta Iesu ga manga dadas ira nilon ta ira Iudeia kanong ira Rom diet ga kurei hadadas diet, hua ira Iudeia diet ga manga kiskis kahai iakano tunatuna nong God ga kukubus tar bia na hanuat ma na halon diet. Ma di ga kilam ia bia no Mesaia. Ma bia Iesu ga hanuat aring diet ga nurnur bia ia no Mesaia ma aring pa diet ga nurnur tana. Ma bia di ga tangai bia Iesu ia iakano tunatuna nong God ga pilak ia, io, tano Sigar Kunubus tano nianga Hinsaal ira pakaan bakut da kilam ia bia ‘Mesaia’. Dahat ta mur no nianga na Hibru. Pa dahat kilam ia bia Karisito haruat ma no nianga na Grik kanong haleng na mataniabar na Hinsaal diet lik bia ‘Karisito’ tiga hinsane Iesu sen mon ma pataie ta kukuraina tana. Hua dahat ta kilam ia bia no ‘Mesaia’ waing naga palai bia a mon kukuraina ta iakan ra nianga. Ma sen ira pakaan bakut bia da was bia ‘Karisito’ tiga hinsa Iesu, io, da kilam ia bia ‘Karisito’ haruat ma no nianga na Grik (nas ‘Karisito’). Ma no burena bia da kilam no nudahat Watong bia ‘Iesu Karisito’, kanong ia no Mesaia.

Ira Iudeia diet git gilgil iakan ra gil nian tiga pakaan tiga tinahon. Diet ga liklik lah no pakana bung bia God ga halangalanga sei ira hintubu diet marau Isip. God ga tulei no nuna angelo wara bubu bing no luena bulu ta ira harataman bakut arau Isip iasen God ga hinawasei ira Israel bia diet na kut bing tiga nat na sipsip, diet naga salap no gapina ta ira matanangas ta ira nudiet hala tikatikai. Ira Israel diet ga gil hua ma ing no angelo ga nas no gaap gaam haan sakit ma pa ga bu bing no luena bulu ta iakano hala. Ma tano pakana bung ta Iesu ira Iudeia diet git kutkut bing tiga nat na sipsip diet gaam ien ia wara liklik lah iakano bung. Ma bia no tamat na tena gil warkurai marau Isip ga haut lah ira Israel bia diet na haan sukun Isip diet ga haan gasien. Pataie ta pakana bung bia diet na kis kahai no beret bia na lalat baa bia diet na tun ia, ma ira Iudeia diet ga ien ira beret ing pai lalat baa wara liklik lah iakano nian manaluai (nas Buk Kisim Bek 12.1-51).

A dadas na nianga sakit iakan wara pukpukusanei ia. Tano nianga na English da kilam ia bia ‘Son of Man’ ma tano nianga nalamin bia ‘Pikinini Bilong Man’. Iasen pai manga tahut bia da mur ia hua kanong a malalar ia ma no kukuraina i pulus aring mes na linga mah. Ta tiga ninaas tano Buk Daniel ira mangana tena warkurai diet ga wara kurkurei no ula hanua. Ma tano ninaas diet ga haruat ma ira wawaguai. Iasen namur tiga mes ga haan tupas God. Paga ngan hoing tiga wawaguai. Taie. Galesia ngan hoing tiga tunatuna, ma di ga kilam ia bia ‘Son of Man’, ma sen no kukuraina bia ‘Nong a Tunotuno Ia’ kanong pai haruat ma diet ira mes na tena warkurai (nas Daniel 7.13). Ma iakano Nong a Tunatuna ia na kurei no ula hanua bakut ma pa na pataam (Daniel 7.14). Io, ma ira Iudeia tano pakana bung ta Iesu diet ga nunurei bia kaikek ra irua buturkus ta Daniel ga ianga utano Mesaia nong na hanuat ma na hatur no nuna kinkinis na warkurai. Ma iakanong tiga burena bia Iesu ga kilam habalin ia bia ‘Nong a Tunotuno ia’, kanong ia iakano Mesaia ma ia God nong ga hanuat tunatuna mah bia na kurei no ula hanua. Ma sen tiga mes na burena mah bia Iesu ga kilam habalin ia bia ‘Nong a Tunatuna ia’. Ira mataniabar diet git kilkilam iakan ra nianga wara nianga uta tikai. Hua ing Iesu ga tangai bia ‘Nong a Tunatuna ia’ na gil tiga linga ari diet ga lik bia ga ianga uta tiga mes na tunatuna (nas Jon 9.35-36). Ma Iesu ga kilam habalin ia hua kanong a nianga na susuhai ia. Diet ing pa diet ga nurnur bia ia iakano Mesaia ta Daniel 7.13-14, diet ga lik bia Iesu ga iangianga uta tiga mes na tunatuna. Ma sen ira mataniabar ing diet ga nurnur bia Iesu ia no Mesaia diet ga nunurei kilam bia Iesu ga iangianga utana at. Ma Iesu ga tale bia na hausur diet ira tena nurnur bia a mangana Mesaia sa ia ma sen ira nuna hausur hua pa ga hatahuat ra tinirih tupas ia makaia ta diet ing diet pa ga palai ta ira nuna nianga. Ma namur tano tuntunut hut ta Iesu pa da was tupas ta pakpakat ta Pol bia Pita bia siga, bia da kilam ia bia ‘Nong a Tunatuna ia’, kanong gata palai bia Iesu no Mesaia, ma pataie ta burena bia da kilam iakano nianga na susuhai.

Tiga kaba matanaiabar na Iudeia ing diet ga manga mur timaan ira warkurai ta Moses bia diet na manga gamgamatien ra matmataan ta God. Ma Pol ga tiga Parisi mah. Ira mataniabar diet ga manga ru diet kanong diet ga lik bia ira Parisi diet manga takodas sakit. Iasen diet tikai ma ira mes na lualua ta Israel, diet ga mola sei Iesu kanong diet ga lik bia Iesu ga wara kapkap sei ira warkurai ta Moses. Ma diet ga burut mah bia ira Rom na hapidinau diet bia ira mataniabar diet na mur Iesu hoing tiga tamat na tena gil warkurai ia (Ioanes 12.19). Kaiken ira burena bia ira Parisi tikai ma ira mes na lualua nudiet ira Iudeia, diet ga wara bubu bing Iesu (nas ‘Sadiusi’).

Tiga tamat na gil nian nudiet ira Iudeia ing di git gilgil ia tiga pakaan tiga tinahon. No kukuraina bia ‘liman sangahul’ kanong di ga gil ia ra liman sangahul na bung namur tano Nian na Hinahaan Sakit. Di ga gil no nian na Pentikos wara tangtanga tahut ta God ta ira ina wit ing ga matukal ta iakano pakana bung. Ma tano bung na Pentikos no Halhaliana Tanuo ga hansur ta ira Kristian.

Ira mangana tena mintota aras Gris ing diet ga manga lilik ma diet ga manga iangianga uta ira bilai na magingin. Diet ga lik bia i tahut bia ira tunatuna diet na kurei timaan ira palatamai diet, diet gaam lik bia iakan no suruna taira nudiet nilon.

Tiga kaba mataniabar ing diet ga manga mur ira warkurai ta Moses ma diet ga mon ra dadas bia diet ira lualua ta ira Iudeia mah. Halengin tano kaunsil na Iudeia diet ira Sadiusi. Ira nudiet mangana lilik ga manga hutet ta ira lilik gar na Parisi, iasen ira Sadiusi diet ga manga mur timaan sen mon ira luena liman na Buk tano Olpela Testamen ma pa diet ga nurnur tano tuntunut hut sukun ra minaat ta ira tunatuna namur (nas ‘Parisi’).

Di ga gil no pisa na hala Ierusalem aram ta ari uladih ma no uladih di ga gil no tamat na hala na lotu tana, di ga kilam ia bia ‘Saion’ (Matiu 21.5), ma a halhaliana sibaan ia. Iasen no hinsang ‘Saion’ i tale bia na tur mah hoing tiga nianga harharuat ta Ierusalem kanong ia no halhaliana pisa na hala ta ira Israel. Ma di ga kilam no halhaliana taman nong na hanuat namur bia Saion mah, kanong ia no sibaan ing God i la kiskis kaia (Hibru 12.22; Ninaas 14.1).

Diet ing diet malentakuanei Karisito, i tale bia da kilam diet ira ebar tane Karisito. Iasen tano hauhawatina ta ira pakana bung tiga sakana tunatuna tutun at na hanuat (Matiu 24.15) ma ia no tamat na ebar tane Karisito (di kilam ia bia ‘antichrist’ tano nianga na English). I nanaas bia ia iakano tamat na ulpat ta God nong Pol ga iangianga utana (2Te 2.3-11) ma ia no rakaia tano Ninaas ta Ioanes (Ninaas 13.1-18; 14.9; 16.10; 17; 1; 19.20).

Aring pakaan bia da nas ‘tultulai’ ta iakan ra pakpakat no kukuraina bia ira tena kap nianga, hoing diet ing Ioanes ga tulei sei diet (nas Luk 7.24). Iasen i hutet bia ira pakaan bakut no kukuraina i manga dadas. I iangianga utano magingin ta iakano pakana bung ing ga manga tirih ira nudiet nilon aring tunatuna. Aring watong diet na tinanei aring mes na tunatuna ma kaikek ra tunatuna na manga taram ira nudiet watong. Ma ing bia taie, ga tale bia diet na hirua. Io hua mah, Pol ga tiga tultulai ta God. Pataie bia a tena kap nianga sen mon ia. Galesia manga taram timaan ira hartulai ta God. Ma Pol i tale bia na tangai bia dahat ira tultulai tano magingin takodas kanong i tahut bia dahat na manga mur ira takodasiana magingin.

A nianga manaluai ta ira mangana haat ing i kubur narako ta ari mangana kalagi ma no matana ta tikai bia una kul ia i manga tamat sakit. Tano nianga na English da kilam ia bia ‘pearl’.

A mangana lualua na lotu ing di ga pilak wara harharahut no lotu. Pa diet ga manga kurei no lotu hoing ira lualua na lotu iasen diet ga tar ra harharahut. Tano nianga na English da kilam diet bia ira ‘deacon’ ma no kukuraina ta ‘deacon’ bia ‘tena harharahut’ (nas ‘Lualua na Lotu’).