99
1 No Watong i kap taman taar.
I tahut bia ira kantri diet na dedar.
I la kis taar tano uno kinkinis na king nalamin ta ira iruo kerubim.
I tahut bia no ula hanuo na ninir.
2 No Watong, a tamat ie aram Saion,
ma di raun haut ie naliu ta ira kantri bakut.
3 I tahut bia diet na pirlat ma diet na ru no tamat na hinsaam.
God a halhalianai.
4 A tamat ira dadas tano King, ma i la sipsip ira takodasiana magingin.
U te hakisi ira harkurai ing i takodas wara gaie ira matanaiabar bakut.
U te gil ira linge i bilai ma i takodas kai Israel.
5 I tahut bia muat na raun no Watong, no udahat God,
ma muat na siantudu kaia ra pinpaas na kakine.
God a halhalianai.
6 Moses ma Aaron dir airuo ut na pakila lotu nalamin ta ira uno mes na ut na pakila lotu,
ma Samuel tikai ta diet ing diet git tataau tupas ie.
Dal git tataau uram hono Watong
ma git balbalu dal.
7 Ga ianga suur meram narako tano bahuto.
Ira Israel diet ga mur ira uno harkurai ma ira uno hartula ing ga tar ta diet.
8 Watong, no numehet God,
u git balbalu diet.
U ga hamines ta diet bia augu no God nong i la liklik luban ira udiet sakena,
iesen bia u ga hapidanau mah diet ing diet ga pakile ira nironga.
9 Da raun no Watong no udahat God
ma da lotu kaia hono uno halhaliana uladih,
kanong no Watong, no udahat God, a halhalianai.