95
1 Mai, dahat gi inge ma ra gungunuama tano Watong,
dahat gi kup ma ra pirhakasing tupas no udahat Haatkis na harhalon.
2 I bilai bia dahat na haan tupas ie ma dahat na tanga tahut saakit uram ho ie,
ma dahat na pirlat nabanei ma ra ninge.
3 Kanong warah, no Watong aie no tamat na God,
no tamat na King saakit ta ira god bakut.
4 No ula hanuo bakut i kis taar tano limana,
hatahun leh ta ira salil tuk ta ira uluno ira uladih auno.
5 Auno no tes, kanong aie nong ga gil ie,
ma ira iruo limana ga huul no pise.
6 Mai, dahat gi siantudu ma ra urur wara lotu tupas ie,
dahat gi singa bukunkek menalua tano Watong nong ga pakile dahat,
7 kanong aie no udahat God,
ma dahat ira matanaiabar ing i la nesnes mur,
ira matanaiabar menapu tano uno harbalaurai.
Ing bia muat hadade no ingana katin,
8 waak muat hadadas ira bala muat hoing muat ga gil aram Meriba,
ma hoing muat ga gil ta iakano ra bung aram Masa tano hanuo bia.
9 Ira hintubu muat diet ga manga walar iau kaia,
sukmaal bia diet ga nes ira nugu gingilaan tupas diet.
10 Ga haruat ma ra ihat na sangahul na tinahon iau ga ngalngaluan taar ta kaike ra matanaiabar.
Ma iau ga tange bia, “Ira bala diet iakanong ra matanaiabar i la hanhan talur iau,
ma diet pai palai tano mangana ngaas iau sip bia diet na mur.”
11 Io kaik, iau ga ngalngaluan, iau gaam hasasalim bia,
“Diet pana le tale tunat bia diet na sola tano nugu sinangeh.”