86
A sinasaring tane Devit.
1 Watong, nu hadade, ma nu balu iau,
kanong a maris ma a malahahin iau.
2 Nes mur no nugu nilon, kanong iau la murmur ugu.
Augu no nugu God, halon no num tultulai nong i nurnur taam.
3 Watong, nu marse iau,
kanong iau tataau uram ho ugu tano kidilona bung bakut.
4 Haguama no num tultulai,
kanong iau raun haut no nugu nilon ukaia ho ugu, Watong.
5 Watong, a bilai ugu, ma u la liklik luban ira nironga.
A tamat saakit no num harmarsai tupas diet ing diet tataau uram ho ugu.
6 Watong, hadade no nugu sinasaring.
Taram no nugu tintaau wara gaiena harmarsai.
7 Ta ira bung iau harsomane ra tinirih, iau ni tataau uram ho ugu,
kanong nu taram pase leh iau.
8 Watong, taie tikai nalamin ta ira god i haruat ma augu.
Ira udiet gingilaan pai haruat ma ira num.
9 Watong, ira matanaiabar ta ira kantri bakut ing u ga hakisi,
diet na hanuat ma diet na lotu tupas ugu.
Diet na hanuat ma diet na ru no hinsaam,
10 kanong augu u manga tamat saakit ma u gil ira tamat na gingilaan na kinarup ing i melmel saakit.
Augu sen mon no God.
11 Watong, hausur iau ta ira num tintalen,
ma iau nigi haan narako tano num tutun na magingin.
Tar tiga kapawena liklik tagu bia ni mur sen mon ugu,
waing iau nigi ru no hinsaam.
12 Watong, nugu God, iau ni pirlat ugu ma no nugu nilon bakut.
Iau ni hatamat no hinsaam hathatikai,
13 kanong no num harmarsai i manga tamat ukai tagu.
U te halon iau mekaia tano tingena no midi.
14 God, ira ut na hariamul diet wara hinarubu ma iau.
Tiga kaba holmatau dal wara bu bing iau,
dal ing dal pai nes kilam ugu.
15 Iesen augu, Watong, a God nong i tar bia mon no uno harmarsai.
Pau la ngalngaluan gasien, u manga sip mehet ma u hung ma ra tutun na magingin.
16 Tahurus ukai ho iau ma nu marse iau.
Tar no num dadas tagu, no num tultulai.
Halon iau kanong iau taram ugu hoing no pawasigu git gilgil huo.
17 Hamines tiga hakilang tagu uta ira num bilbilai,
waing ira nugu ebar diet na nes ie ma diet na hirhir,
kanong augu, Watong, u te harahut iau ma u te habalaraan iau.