77
A nianga tupas no tunotuno nong i kure ira ut na ninge: da inge iakan ra ninge na lotu haruat hoing Iedutan i sip. A ninge na lotu ta Asap.
1 Iau susuah tamat uram ho God.
Iau suah tupas God bia na taram iau.
2 Ing iau te kilingane ra tinirih iau la silsilihe no Watong.
Ra bung iau sasangaha taar, ma ira limagu pai maat,
ma iau malok bia da hamaram iau.
3 God, ing iau lik leh ugu, iau marmaris.
Ing iau lik murmur, ira tamaigu i maalum.
4 Ing pau harahut iau, pai tale bia iau ni kubaba.
No nugu lilik i haruburubu, kaik pai tale bia ni ianga.
5 Iau lik leh ira bung menalua,
ma ira tinahon menalua saakit.
6 Iau lik leh ira nugu ninge ra bung.
Iau lik murmur ma iau pai nunure no burena kaiken ra tinirih.
7 “Hohe, no Watong na malok se hatikane iau?
Pa na hamines ta bilbilai baling at um?
8 Hohe, no uno harmarsai nong pana le pataam i te takumut?
Ma pana le pakile haruatne habaling at um ira uno kunubus?
9 Hohe, God i te lik luban se no uno harmarsai?
Ma tano uno ngalngaluan, na rahi pukus no uno marmaris?”
10 Io, iau ga tange, “No nugu lon i tirih hoken:
iau pai nes habaling um no dadas ta Nong i Naliu Harsakit hoing nalua.”
11 Iau ni lik leh ira magingin tano Watong.
Tutun, iau ni lik leh ira num dadas na gingilaan na kinarup menalua saakit.
12 Iau ni lilik uta ira num pinapalim,
ma ni lik mur timaan leh ira num dadas na gingilaan bakut.
13 God, ira num tintalen i halhaal.
Sige tiga god a tamat ie hoing no udahat God?
14 Augu no God nong ga pakile ira dadas na gingilaan na kinarup.
U ga hamines ira num dadas nalamin ta ira matanaiabar.
15 U ga kul pukus ira num matanaiabar ma no dadas na limaam,
diet kaike ira hintubu ne Iakop ma Iosep.
16 God, ira taah ga nes ugu.
No taah ga nes ugu ma ga lel,
ma no lamlamana tes ga gus.
17 Ira bahuto diet ga burange hasur ra taah,
ma no mawe ga kakel ma ra parparara.
Ira num rumus ga lulungo urau ma ures.
18 Ira num parparara di ga hadadei narakoman tano morohiluo,
ma no num hile ga bulo sare no ula hanuo.
No ula hanuo ga dedar ma ga gunagune.
19 U ga haan nalamin tano tes,
ma ira num ngaas nalamin ta ira tamat na pakananoh,
ma sen ira pinpaas na kakim pa di ga nes.
20 U ga lue ira num matanaiabar hoing tiga ut na balaura sipsip
ta ira limane Moses ma Aaron.