73
A ninge na lotu ta Asap.
1 Tutun saakit, God i la tahtahut ma Israel.
I la bilbilai ma diet ing ira udiet nilon i gamgamatien.
2 Iesen iau balik, iau gor te surmalagir.
Hutet tunat bia iau gor puko,
3 kanong iau ga lilik sakasaka taar ta ira ut na hariamul
ing iau ga nes ira tahut na kinkinis audiet ira ut na sakena.
4 Diet pai hamaan ngunngutaan.
Ira tamai diet i nunuhuan ma adiet tabi baso.
5 Diet langalanga sukun ira mangana tinirih ing ira tunotuno i la kilkilingane.
Ira purpuruan pai ubal diet hoing ira mes na tunotuno.
6 Kaik huo, diet ruane ra latlaat hoing tiga biar,
ma no magingin na harhagawai i sigam diet.
7 Ira sakana tintalen i hanuat meram narako ta ira bala diet.
Ma ira sakana lilik i bureng suur meram ta ira kaati diet.
8 Diet hasakit sakasaka ma diet harmang.
Ta ira udiet latlaat diet haramramin ira tunotuno bia diet na hamarisne diet.
9 Ira udiet nianga na sa butbut i haan harbasia tano ula hanuo
ma uram muk ra mawe.
10 Kaik huo, ira matanaiabar diet mur diet,
ma diet kanam bakut leh ira udiet nianga.
11 Diet tange, “God pai tale bia na nunure leh ira udahat gingilaan.
Aie Nong i Naliu Harsakit, pa na nes tupas leh.”
12 Diet ira ut na sakena diet haruat hoken:
diet pai kilingane tiga tinirih, ma ira udiet bunbulaan i tamtamat hanahaan.
13 Tutun saakit, iau te balaure tar um no balagu bia na gamgamatien,
ma iau pai gil ta nironga, ma sen pataie ta hunena tano nugu nilon.
14 Tano kidilona bung bakut iau kap hinangul.
Ta ira kaba malaan iau kap harpidanau.
15 Ing bia iau gor tange kaike ra mangana nianga,
iau gor te lamus habato leh ira num matanaiabar.
16 Ing iau ga walar bia ni palai ta kaiken ra linge bakut,
i ga ubal iau
17 tuk iau ga laka tano halhaliana hala ta God.
Io, iau ga palai laah um bia na ngan hohe namur ta ira ut na sakena.
18 A tutun saakit bia u bul tar diet tiga malmalagiruana katon.
U se hasur diet wara halhaliare diet.
19 Habir saakit diet hiruo sakasaka.
Ira linge i haramramin diet i hapataam hatikane diet.
20 Hoing tiga tunotuno i luban se no barbarian ing i pada,
io, Watong, ing nu tangahun, nu hunane diet kanong diet na panim laah um.
21 Ing no balagu ga tapunuk
ma iau ga ngurungur,
22 iau ga ngulo ma iau pai ga palai.
Iau ga ngan hoing tiga wawaguai ra matmataan taam.
23 Iesen iau la tur tika taar at ma augu.
U palim tar no kata na limagu.
24 U lue iau narakoman ta ira num sinisip,
ma namur um nu kap leh iau ma nu hatamat no hinsagu.
25 Sige mah um ing a nugu ie aram ra mawe? Augu sen mon.
Ma taie tiga linge kai tano pise iau masingan pane. Taie. Augu sen mon.
26 I tale bia no palatamaigu na malmalungo ma na puko no nugu lilik,
iesen God aie no dadas tano nugu lon ma no pinlawegu hathatikai.
27 Diet ing diet te haan tapaka taam, diet na hiruo.
U haliare bakut diet ing diet pai mur habaling um ugu.
28 Iesen utagu, i bilai bia iau tur hutet ta God.
Iau te nes kilam no Watong Kiskis bia aie no nugu barbarahit.
Iau ni hinawas ta ira num gingilaan bakut.