70
A nianga tupas no tunotuno nong i kure ira ut na ninge: A ninge tane Devit. Tiga sinasaring.
1 God, habir wara halhalon iau.
Watong, hanuat habir wara harharahut iau.
2 Iau sip bia diet ing diet wara bubu bing iau,
da gil hahirhir diet ma diet na nguanguo.
Iau sasaring bia diet bakut ing diet masmasingan no nugu sakena,
diet na tahurus tapukus ma ra malahuan.
3 I tahut bia diet ing diet kukutur tagu,
diet na hirhir ma diet na tahurus tapukus.
4 Iesen diet bakut ing diet silsilihe ugu,
i tahut bia diet na guama ma diet na laro taam.
Diet ing diet kalak no num harhalon,
i tahut bia diet na tangtange hatikane bia, “Da bul haut God!”
5 Iesen kana iat iau tiga maris ma ra nugu mon sunupi.
God, hanuat habir ukai ho iau.
Augu no nugu harharahut ma no nugu Ut na Harhalon.
Watong, waak u halis.