62
A nianga tupas no tunotuno nong i kure ira ut na ninge: da inge iakan ra ninge na lotu haruat hoing Iedutan i sip. Devit ga pit ie.
1 No nugu lon i silihe tupas ra sinangeh kaia ho God sen mon.
No nugu harhalon i hanuat mekaia ho ie.
2 Aie sen mon no ula habo nong iau nes leh no nugu harhalon kaia.
Aie no nugu dadas na subaan na munmun, pa da le gune at iau.
3 Na haruat hunanges ma kana u iangianga huli tikai?
I tale bia muat bakut muat na se hasur ie napu?
Aie hoing tiga balo i ioh taar, ma hoing tiga wer pai dadas.
4 Diet manga sip tun taar bia diet na sun hapuko se ie
mekarama naliu ra uno tamat na kinkinis.
Diet guama pane ra harabota.
Diet haraidaan ma ira ha diet,
iesen meram narako ta ira bala diet, diet se ira nianga na halhaliarai.
5 Nugu lon, nu siliha sinangeh ta God sen mon.
Iau kis nanaho ma ra nurnuruan tano harharahut i hanuat mekaia ho ie.
6 Aie sen mon no ula habo nong iau nes leh no nugu harhalon kaia.
Aie no nugu dadas na subaan na munmun, pa da gune at iau.
7 No nugu harhalon ma no bilai na hinsagu i burena sen ta God.
Aie no nugu dadas na ula habo, no nugu katon na barbarahit.
8 Matanaiabar diet, muat na so nurnur tana ta ira kaba bungbung bakut.
Muat na hapuasne ira kaati muat taar tana,
kanong aie no nudahat katon na barbarahit.
9 Ira tunotuno, taie ta dadas ta diet.
Ira watong ma ira maris, a linge bia mon diet.
Ing bia da walar ira udiet tirtirih, a parahona mon diet.
Diet bakut mon hoing di manasung.
10 Waak bia da nuruan no magingin na kap kuman kinewa,
bia da tangarot ta ira linge di kinau.
I tale bia na tamtamat hanahaan ira num bunbulaan,
iesen waak u so tar no kaatim ta kaike ra linge.
11 Tiga linge God i te tange,
ma airuo linge ing iau te hadade ma i hoken:
God, a dadasine augu.
12 Watong, a ut na harmarsai ugu.
Tutun saakit, nu kul tikatikai na tunotuno
haruat ma asa ing i te gil.