47
A nianga tupas no tunotuno nong i kure ira ut na ninge: ira bulumur ta Korah diet ga pit iakan ra ninge na lotu.
1 Muat ira matanaiabar ta ira kantri bakut, muat na pasapasar ma ira lima muat.
Ma muat na kup ma ra gungunuama uram ho God.
2 No Watong Nong i Naliu Harsakit i haruat bia da rui,
aie no tamat na King tano ula hanuo bakut!
3 I bul hasur ira mes na hunhuntunaan menapu ta dahat,
ma ira kaba matanaiabar menapu ta ira kaki dahat.
4 Ga pilak no taman nong dahat te tinanei,
aie no melmel na linge ta Iakop nong God i sip ie.
5 God i te hanut narakoman ra kunup na gungunuama.
No Watong i te hanut nalamin ta ira kinakel na tahur.
6 Inge pirharlat tupas God, inge pirharlat.
Inge pirharlat tupas no udahat King, inge pirharlat.
7 Kanong warah, God aie no tamat na King tano ula hanuo bakut.
Inge tupas ie ma tiga ninge na pirharlat.
8 God i kure ira kantri.
God i kis taar tano uno halhaliana kinkinis na harkurai.
9 Ira lualua ta ira kantri diet kis hulungai
hoing bia diet ira matanaiabar tano God ta Abaram.
Ira king tano ula hanuo diet gar ta God.
Di manga raun haut ie.