44
A nianga tupas no tunotuno nong i kure ira ut na ninge: ira bulumur ta Korah diet ga pit iakan ra ninge.
1 God, mehet te hadade ma ira talinga het,
ma ira hintubu het diet ga hinawase tar het
ta ira linge ing u ga gil ta ira nudiet pakana bung
nalua saakit.
2 Ma no num dadas at, u ga pasak hasur se ira mes na hunhuntunaan,
ma u ga hakisi ira hintubu het tano udiet pise.
U ga haliare ira mes na matanaiabar,
ma u ga manga hakisi timaan ira hintubu het.
3 Diet pai ga kap taman ma ira udiet wise na hinarabu,
ma diet pai ga petlaar mah no hinarubu ma ra nudiet dadas at.
Iesen no kata na limaam, no num baso mah,
ma no num madaraas nong ga sakate diet, kanong u ga sip diet.
4 Augu no nugu King ma no nugu God,
nong i kure bia no huntunaan ta Iakop na petlaar ira hinarabu ma ira nuhet ebar.
5 Mehet la paspasak pukus diet ma no num dadas.
Tano dadas tano hinsaam mehet papasuane diet ing diet malentakuane het.
6 Iau pai nurnur tano nugu laplapot.
Iau pai petlaar ta hinarubu ma no nugu wise na hinarubu at.
7 Iesen u la harharahut mehet, kaik het gila petlaar wara hinarubu ma ira nuhet ebar.
U la hahirhir diet ing diet malentakuane het.
8 Tano kidilona bung bakut mehet latlaat tupas ugu, God,
ma het na pirlat hatikane no hinsaam.
9 Iesen kaiken um u te malok se tar het ma u te bul hasur het.
Ma pau la saksakate habaling um ira nuhet matana ubane.
10 U ga gil mehet bia het na hesuo tapukus menalua ra matmataan ta diet ing diet harubu tika ma het,
ma diet ga kap leh ira numehet minsik wara nudiet mon.
11 U ga waak se tar het bia da kanam hakidilon het hoing ira sipsip,
ma u ga bul harbasiane het nalamin ta ira mes na hunhuntunaan.
12 U ga suhurane hasiksik ira num matanaiabar.
Pau ga palim mataan diet.
13 U te gil diet ing diet lon tika ma het bia diet na kukutur ta het.
Diet ing diet kis luhutane tar het, diet pa na urur ta het ma diet na malentakuane het.
14 U te gil het bia da hasakit ta het nalamin ta ira hunhuntunaan ta ira mes na hanuo.
Ira matanaiabar diet lawa ul tar ta het.
15 Tano kidilona bung bakut iau palai bia diet hamarisne iau,
ma a hirhir i te pulus no nugu matmataan
16 ta ira harangat ta diet ing diet kukutur ma diet ngangare iau,
kanong ta ira nugu ebar ing diet taguro wara balbalu iau.
17 Kaiken bakut ga hanuat taar ta het,
iesen mehet pai ga luban ugu,
ma het pai lake no num kunubus.
18 Mehet pa ga lilik tatohun taam.
Mehet pa ga mur tiga mes na ngaas. Mehet murmur hani at no num ngaas.
19 Iesen u ga rigisane mehet ma u ga waak tar het nalamin ta ira paap rakaia,
ma u ga pulus bakut het ma ra tamat na kankado saakit.
20 Ing bia mehet gate luban no hinsana no numehet God,
ma bia mehet gate sasaring tupas tiga mes na god,
21 God, u gor nes tupas leh ie,
kanong u nunure tar ira nuhet lilik susuhai.
22 Iesen tano kidilona bung bakut di wara bubu bing het wara gaem.
Di nes kilam het hoing ira sipsip di wara kutkut bing.
23 Watong, tangahun! Wara bih u kubaba?
Nu pada! Waak bia u malentakuane hatikane het.
24 Wara biha u mun ta mehet,
ma u luban ira nuhet tamat na tapunuk ma ira nuhet ngunngutaan?
25 Di ga bul hasur tar het napu ra kaabus.
Ira palatamai het i patep taar tano pise.
26 Tut hut ma nu harahut het.
Halon het kanong tano num harmarsai nong pai la patpataam.