4
A nianga tupas no tunotuno nong i kure ira ut na ninge: da ting ira mangana gita ing da inge iakan ra ninge. Devit ga pit ie.
1 Taram iau ing bia iau tataau tupas ugu,
no nugu takodasiana God.
Hasangeh iau sukun ira nugu tinirih.
Nu bala malum tagu ma nu taram ira nugu sinasaring.
2 Na haruat hunanges ing muat ira matanaiabar muat na tange haliare no bilai na hinsagu?
Na haruat hunanges ing muat na kalak ira linge bia, ma muat na silsilihe ira ina bis?
3 I tahut bia muat na palai bia no Watong i te bul hasisingen wara uno iat diet ing diet te tar tutun ira udiet nilon tana.
No Watong na taram ing iau ni tataau uram ho ie.
4 Ta ira numuat ngalngaluan, waak muat gil ta nironga.
Ing muat noh taar ta ira numuat suuh,
muat na nes gilgilse ira numuat nilon ma muat na kis kunkun.
5 Muat na tar ira takodasiana hartabar tupas no Watong,
ma muat na nurnur tana.
6 Haleng diet tirtiri bia, “Sige i tale bia na hamines ta bilbilai ta dahat?”
Waak tar no murarang tano num matmataan na bulo sare het, Watong.
7 U te hahungi no kaatigu ma ra gungunuama
i tamat saakit ta ira udiet gungunuama pane ira udiet wit ma ira sigar wain ing i tamtamat hanahaan.
8 Iau ni noh suur ma ni kubaba ma ra malum,
kanong augu sen, no Watong,
u la balbalaure timaan iau.