39
A nianga tupas no tunotuno nong i kure ira ut na ninge: da inge iakan ra ninge na lotu haruat hoing Iedutan i sip. Devit ga pit ie.
1 Iau ga tange bia, “Iau ni nes mur ira nugu hinahaan,
iau kabi gil ta magingin sakena ma no karamegu.
Iau ni palakus no hagu
ing bia ira ut na sakena diet kis tika taar ma iau.”
2 Ing iau ga kis kunkun ma iau ga marur taar,
ma iau pa ga tange tunat tiga bilai na linge,
io, no ngunngutaan tagu ga tamat.
3 Aram narako tagu no balagu ga mamahien.
Ma ing iau ga kis matien taar ma ra lilik, no iaah ga iaiaan.
Kaik um, iau gaam ianga ma no hagu hoken:
4 “Watong, hamines no hauhawatine no nugu nilon tagu,
ma aise ira nugu bung na nilon.
Hapuasne tagu bia a kumkumine mon no nugu nilon.
5 U te gil hakumkum ira nugu bung na nilon.
Ira punpuo ta ira nugu tinahon i haruat bia a linge bia mon ra matmataan taam.
No laulawas ta ira nilon ta ira tunotuno tikatikai i ngan hoing tiga pakana manmanasung mon.
6 Ira tunotuno diet haruat ho ira tanua diet mon ing diet hanahaan urau ma ures.
I manga papalim, iesen pataie ta hunena.
I hahungi ira uno bunbulaan ma pai nunure bia sige na kap leh.
7 “Iesen kaiken um, Watong, asa kaik iau nanaas ine?
Iau kis nanaho taam.
8 Halon leh iau sukun ira nugu nironga bakut.
Waak u gil iau bia ira ulba diet na hasakit tagu.
9 Iau ga kis matien. Iau pa ga tale bia ni papos no hagu,
kanong augu nong ga hatahuat kaiken.
10 Kap se no num harpidanau tagu.
No harpasar tano limaam i te ubu hasur iau.
11 U la baboor ma u la hatakodasne ira tunotuno ta ira udiet magingin sakena.
U la ienien ira udiet bilai na minsik hoing ra epas.
No laulawas ta ira nilon ta ira tunotuno tikatikai i ngan hoing tiga pakana manmanasung mon.
12 “Watong, taram no nugu sinasaring.
Hadade no nugu tintaau wara harharahut.
Waak bia u hadade kapis ira nugu sunsunuah,
kanong iau lon tika ma ugu hoing tiga se taman.
Iau hoing tiga wasire taam hoing ira hintubugu bakut diet ga ngan huo.
13 Nanaas laah mekai ho iau waing iau nigi guama baling,
iau kabi maat laah ma pa da nas habaling iau.”