36
A nianga tupas no tunotuno nong i kure ira ut na ninge: Devit no tultulai tano Watong ga pit iakan ra ninge.
1 Tiga nianga na hakilang ie ken narako tagu
uta ira saksakena tano sakana tunotuno ma i tange hoken:
Taie ta bunurut tane God
i kis tana.
2 Kanong warah, i nes hatamat ie ma ira iruo matana tus,
kaik, pa na nes kilam ma pa na malentakuane ira uno sakana magingin.
3 Ira inga na hana a sakena ma i hung ma ra harabota.
Pai mintot baling um wara gilgil ira bilbilai.
4 Kaia mah tano suhuno i la pingpingit sakena.
I la tartar habaling tar ie ra sakana ngaas,
ma pai la malmalok se asa ing pai takodas.
5 No num harmarsai, Watong, i hanut muk uram ra mawe,
ma no num tutun na magingin i hanut uram ra mauho.
6 No num taktakodas i haruat ho ira tamat na uladih saakit,
ma no num takodasiana harkurai i haruat ma ra tingena lamlamana.
Watong, u la balbalaure kahe ira tunotuno ma ira wawaguai.
7 No num tutun na harmarsai ing pa na pataam i manga tamat ma pai tale be da hapupuo!
Ira tunotuno bakut diet barahit napu ra ududuh ta ira babaam.
8 U tabar diet ma ra nian ing kana i hung taar tano num hala,
ma u hamamo diet ma ra taah tano num taah na gungunuama.
9 Kanong warah, ie ke ho ugu no puat na nilon.
Tano num lulungo het nes ra madaraas.
10 Waak u hatakumutne no num harmarsai ta diet ing diet nunure tar ugu.
Waak u sangeh wara gilgil ira magingin i takodas taar ta diet ing ira kaati diet i gamgamatien.
11 Waak u bale no kakine no ut na latlaat bia na papasuane iau,
ma waak mah be no limana no ut na sakena na kap se iau.
12 Nes ira ut na gil nironga ing diet te puko taar huo.
Di te se hasur diet, ma diet pai haruat bia diet na taman tut!