32
Devit ga pit iakan ra ninge.
1 A haraidaan na kis tano tunotuno
nong ira uno magingin na laka hartula God te lik luban,
ma ira uno magingin sakena God i te kasar.
2 A haraidaan na kis tano tunotuno
nong no Watong pai lik habaling tar um ira uno magingin,
ma taie ta harabota tano uno nilon.
3 Ing iau pai hapuasne ira nugu magingin sakena,
ga mahiawa hanahaan ira tamaigu
tano nugu tamat na ngunngutaan tano kudulena bung bakut.
4 Kanong warah, ra bung ma ra kasakes
no limaam ga tirih naliu tagu.
Ira nugu dadas ga pataam hanahaan
hoing i ngan huo tagu ing no mamahien na kasakes i rang iau.
5 Io kaik um, iau ga hapuasne ira nugu magingin sakena taar taam
ma iau pa ga kasar bus ira nugu nironga.
Iau ga tange, “Iau ni hinawas palai ta ira nugu magingin na laka harkurai taar tano Watong,”
ma u ga lik luban iau
tano saksakena ta ira nugu nironga.
6 Io huo, sige diet ing diet te tar tutun ira udiet nilon taam, diet na sasaring ukatiga ho ugu
tano pakana bung ing i tale bia da nes leh ugu.
Tutun saakit, ing no taah na taahit ma na lel,
pai tale bia na saal huat taar tana.
7 Augu no nugu katon na munmun.
Nu balaure bat iau sukun ra tinirih
ma nu luhutane iau ma ra ninge na harhalon.
8 Iau ni pir ugu ma ni hausur ugu tano ngaas nu haan tana.
Iau ni hakatom ugu ma ni nes mur ugu.
9 Waak u ngan hoing no hos bia no donki,
ing taie ta palpalai ta dir,
iesen di kure dir ma ra sibana haien di sang halakai ta ira ha dir ma ra hinau di sal dir me,
ma bia taie huo, dir pa na hanuat taar taam.
10 A haleng ira tinirih ta ira ut na sakena,
iesen no harmarsai tano Watong nong pai la patpataam
i la luhutane tar no tunotuno nong i nurnur tana.
11 Muat na guama tano Watong ma muat na laro, muat ira ut na takodas.
Muat na inge, muat bakut ing ira kaati muat i gamgamatien.