30
Tiga ninge na lotu tano bung di ga papos no hala na lotu. Devit ga pit iakan ra ninge.
1 Iau ni hatamat ugu, Watong,
kanong u ga raun leh iau tano lamlamana,
ma pau ga bale ira nugu ebar be diet na papasuane iau.
2 Watong, nugu God, iau ga tataau ukatiga ho ugu wara harharahut,
ma u ga balaure halon iau.
3 Watong, u ga kap haut leh iau makaia ra midi.
Pau ga bale leh iau be ni hansur tano lulur.
4 Inge uram tano Watong, muat ing muat te tar tutun ira numuat nilon tana.
Pirlat no halhaliana hinsana.
5 Kanong warah no uno ngalngaluan i la kiskis dahin mon,
iesen no uno bala malum i la kis hatika taar tano num kudulena nilon bakut.
A sunuah i haruat be na kis mon ma tiga bung ra bung,
iesen no gungunuama i la hananuat ra malaan.
6 Ing iau ga balaraan, iau ga tange,
“Taie tiga linge pa na gune iau.”
7 Watong, ing u ga kanakana tagu,
u gil bia iau ni tur dikdikit haruat ma tiga uladih,
iesen be ing u ga suhe no num matmataan,
iau ga marmaris.
8 Watong, iau tataau ukatiga ho ugu.
Iau suah wara marmaris ukatiga ho ugu, Watong:
9 “Asa naga taam ing bia ni hiruo na minaat,
bia ni hansur tano lulur?
I haruat be kaabus na pirlat ugu?
No kaabus na hinawas palai bia u la gilgil haruat ma ira num nianga?
10 Hadade, Watong, ma nu marse iau.
Watong, harahut iau.”
11 U te pukusane no nugu sunuah i hanuat minangata.
U te kap se ira nugu sigasigam na tapunuk ma u hasigam iau ma ra gungunuama,
12 waing iau ni inge ukatiga ho ugu ma pa ni kis kunkun.
Watong, nugu God, iau ni tanga tahut taam hathatika.