19
A nianga tupas no tunotuno nong i kure ira ut na ninge: Devit ga pit iakan ra ninge.
1 No mawe na hapuasne no minamarine God.
No mauho na hapalaine ira pinapalim ta ira iruo limana.
2 Ta ira kaba bung no mawe i la hurhurange hawaat ra nianga.
Ta ira bung ra bung bakut i la bulbul hapalaine ra minmintot.
3 Taie tiga kapis nianga bia tiga nianga,
be no ingana pa di hadadei.
4 No ingana no mawe i la hanahaan harbasia tano ula hanuo bakut.
Ira katona nianga i haan taar ta ira hauhawatine no ula hanuo.
Aram ra mawe God i te hatur tiga palpalih wara utano kasakes,
5 nong i haruat ma tiga marawaan i wara tinolen, i hanhansur mekaia hono uno hala
hoing tiga ut na hinilau i guguama bia na hilau mur no uno ngaas na hinilau.
6 No kasakes i tut hut ma tiga ngusuno no mawe
ma i hilau luhutanei ukatiga tiga mes na palpal.
Taie tiga linge pai mun tano uno mamahien.
7 No harkurai tano Watong i takodas harsakit.
I hasigarine ira lon.
Ira hartula tano Watong, i tale bia da nurnur ine.
I tar minminonas ta diet ira bawine.
8 Ira harkurai tano Watong i takodas.
Diet la tartar gungunuama tano kaati nari.
Ira hartula tano Watong i pilpilakas.
Diet la tartar madaraas ta ira mata nari.
9 No bunurut utano Watong i gamgamatien,
ma na tur hathatika.
Ira bul harkurai tano Watong i tutun
ma a takodasiana harsakit.
10 No matana kaike ra harkurai i lua tano kunkulaan ta ira gol,
ma i manga tamat mah ta ira tutun na gol.
Diet manga namnamien ta ira tiri na imara,
ma ta ira tiri na imara makaia ra posi diet.
11 Diet la haakatom no num tultulai.
Bia tikai na taram, na palim kawase ra tamat na harkul.
12 Sige i tale be na nes kilam leh ira uno nironga?
Nu lik luban ira nugu saksakena ing i kis susuhai taar.
13 Balaure iau, no num tultulai, bia pa ni sip bia ni gil sakena.
Waak bia nu haut leh iakano magingin wara gilgil sakena bia na gau iau.
Bia na hokaiken, pai tale bia tikai na tung iau ta nironga,
ma iau ni langalanga sukun ra tamat na nironga.
14 Iau sip bia ira nianga mekai ra hagu ma ira lilik aram tano balagu
na nasnas maririsuan tano num matmataan,
Watong, no nugu Haatkis, ma no nugu Ut na Kul Halangalangai.