17
A sinasaring tane Devit.
1 Watong, sa talingaam tano nugu takodasiana tintaau.
Hadade no nugu sunuah.
Taram no nugu sinasaring,
nong i hansur mekatiga ta ira palabulugu ing pai harabota.
2 Iau sasaring bia nu hamines hapalaine bia iau pai gil ta sakena.
Na tahut bia ira mataam at na nas asa ing i takodas.
3 Ing bia u la nesnes salok no kaatigu ma u la rare timaan iau ra bung,
ma ing mah bia u la walwalar iau, pa nu silihe tiga linge.
Iau te bul tar no nugu dadas na lilik bia no hagu pa na gil magingin sakena.
4 Iau pai la murmur ira gingilaan ta ira tunotuno mon. Taie.
Iesen iau te mur no nianga ta ira palabulum.
Huo, iau te haan paas laah
tano subaan ta ira ut na haragawai.
5 Ira pinpaas na kakigu i te mur ira num sinalil.
Ira kakigu pai le malmalagir.
6 God, iau tataau tupas ugu, kanong augu nu balu iau.
Taram iau ma nu hadade no nugu sinasaring.
7 Haminas no num tamat na harmarsai bia daga ngalabo tano bilbilai tana.
Augu nong u la halhalon ma no dadas na kata na limaam
diet ing diet la kis barahit taam talur ira adiet suk.
8 Balaure iau narako ta ira limaam na harhalon.
Gawane leh iau hoing tiga huna kareka i la pabong ira natine.
9 Gawane leh iau huo talur ira ut na sakena ing diet helar tagu,
ma diet ira nugu ebar ing diet tur luhut iau wara bubu bing iau.
10 Pataie ta harmarsai ta ira udiet nilon.
Ma ira ha diet i iangianga ma ra minok.
11 Diet te mur ira pinpaas na kakigu ma diet tur luhutane iau.
Diet mate dit iau ma diet taguro wara isise iau ures napu tano pise.
12 Diet hoing tiga laion i taburungan pane no rana hiruo,
hoing tiga tamat na laion i riirih haan.
13 Taman tut, Watong! Tur bat diet ma nu me bul hasur diet.
Halon iau ma no num wise sukun ira ut na sakena.
14 Watong, ma no limaam nu halon iau sukun kaiken ra mangana tunotuno.
Nu halon iau talur ira tunotuno ta iakan ra ula hanuo ing ira udiet kunkulaan ta ira udiet nilon kaiken tano ula hanuo.
Diet ing u manga kalak diet, nu tabar hahos diet,
ma na kisi mah ira nati diet.
Ma diet na bul hulungan ra bunbulaan uta ira tubu diet.
15 Ma iau, iau ni nes no num matmataan kanong iau te gil ra takodas.
Ing iau ni pada, iau ni guama wara nesnes ugu.