147
1 Da pirlat no Watong.
I bilai saakit at bia da pirlat no udahat God ma ra ninge.
Da kap ta gungunuama ing da tar no pirhakasing nong i takodas bia da tar tana.
2 No Watong i hatur habaling Ierusalem.
I lamus hulungan ira Israel ing diet gate kis tapaka hoing ra karabus.
3 I hamaram diet ing diet tapunuk,
ma i pulus timaan ira udiet unien.
4 I te lik tar bia aise tiding bakut na pakile,
ma i te pas bakut tar ira hinsa diet.
5 A tamat saakit no udahat Watong ma no uno dadas i manga tamat.
Pai tale bia da was no uno minmintot kanong i tamat saakit.
6 No Watong i sukal haut diet ing di helar ta diet,
iesen i se hasur ira ut na sakena taar tano pise.
7 Dahat na tanga tahut tano Watong ma ra ninge.
Da ting no gita uram hono udahat God.
8 I kasar no mawe ma ra bahuto.
I tabar no ula hanuo ma ra bata
ma i gil no pitoka gi kubur ta ira uladih.
9 I tabar ira bulumakau ma ra nian
ma ira nat na maan mah ing diet na tataau.
10 No uno gungunuama pai iakaike tano dadas ta ira hos,
huo mah, ira dadas ta ira umri pai haguama ie.
11 No Watong i guama ta diet ing diet burtei,
diet at ing diet bul ira udiet nurnuruan tano uno harmarsai nong pa na pataam.
12 Muat me Ierusalem, i tahut bia muat na pirhakasing no Watong.
Masa, muat me Saion, muat na pirlat no numuat God.
13 Kanong warah, i hadadas ira matanangaas ta ira balo tano numuat pise na hala,
ma i haidane muat ing muat kis kaia ta iakano pise na hala.
14 I bale no malum tano numuat katon na pise bakut,
ma i tabar hahos muat ma ra bilai na wit.
15 I tule se ira uno nianga ukai hono ula hanuo
ma asa ing i tange i hilau gasien.
16 I palase no sinow hoing tiga pupulus
ma i se harbasiane ira ais taar tano pise hoing ra tahuna iaah.
17 I se hasur ira uno bata na ais hoing ra pat na wana.
Sige i tale be na petlaar no tamat na madohon i tule sei?
18 I tule no uno nianga ma ira ais i pola.
I puuh hatatik ira dadaip ma ira taah i saal.
19 I te hamines ira uno nianga tano huntunaan tane Iakop.
I te tar kaike ra hartula ma ira uno harkurai taar ta diet ira Israel.
20 Pai gil baak huo ta ira mes na hunhuntunaan.
Diet pai nunure ira uno harkurai.
Da pirlat no Watong.