138
Devit ga pit iakan ra ninge.
1 Watong, iau ni pirlat ugu ma no nugu nilon bakut.
Iau ni inge ira num pirharlat ra matmataan ta diet ira kaba god.
2 Iau ni tudu ma urur menalua tano num halhaliana hala na lotu
ma ni pirlat no hinsaam
utano num harmarsai ma no num tutun na magingin,
kanong u te hatamat no hinsaam ma no num nianga na kunubus
naliu ta ira linge bakut.
3 Ing iau ga tataau, u ga taram iau.
U ga hadadas ma u ga habalaraan iau.
4 Watong, i bilai bia ira king bakut tano ula hanuo diet na pirlat ugu
ing diet na hadade ira nianga mekaia tano haam.
5 I bilai bia diet na inge garaan ira gingilaan tano Watong,
kanong no minarine no Watong i tamat.
6 A tutun bia no Watong ie kenam naliu, iesen i la nes mur tar at ira maris.
Iesen ira ut na latlaat, i nunure mon diet mekaia tapaka ta ing i la kis taar kaia.
7 A tutun bia iau haan narako ra tinirih,
iesen u balaure bat tar at no nugu lon.
U tur bat ira ngalngaluan ta ira nugu ebar ma ira iruo limaam.
U kap pukus iau ma no dadas na kata na limaam.
8 No Watong na pakile haruatne asa ing ga lik utagu.
Watong, no num harmarsai na kis hathatika.
Waak u waak kapis ira pinapalim ing ira iruo limaam dir te hatahun tar.