116
1 Iau kalak no Watong, kanong ga hadade no ingagu.
Ga hadade no nugu sunuah wara gaiena harmarsai.
2 Iau ni tataau ie ta ira nugu bung na nilon bakut,
kanong ga sa talingana ukai ho iau.
3 No minaat ga wiwisane iau,
ma no ngunngutaan na minaat ga pulus iau.
A tinirih ma ra marmaris ga ubal iau.
4 Io, iau ga tataau um tupas no Watong hoken:
“Watong, halon iau!”
5 No Watong i marse dahat ma a takodasianai.
No udahat God i hamines no balana ta dahat.
6 No Watong i balaure diet ing diet pai tale bia diet na harahut habaling at diet.
Ing iau ga wara hiniruo sakasaka, ga halon iau.
7 I tale bia ni kis matien balin,
kanong no Watong i te gil ra bilai tagu.
8 Watong, u te halangalanga iau sukun ra minaat,
u te ros ise ira luur na matagu,
ma u te balaure iau bia iau kabi tuke ira kakigu,
9 waing iau ni haan ra matmataan tano Watong
kai ra taman audiet ira lilona.
10 Iau ga nurnur, kaik iau gaam tange,
“A tamat na tinirih te ubal tar iau.”
11 Iau ga burut, kaik iau gaam tange bia,
“Ira tunotuno bakut, a ut na harabota diet.”
12 Iau ni balu no Watong
uta ira uno bilbilai ukai ho iau hohe?
13 Iau ni raun haut no gingop nong a hakilang ie tano uno harhalon
ma iau ni tataau tupas no Watong.
14 Iau ni pakile haruatne ira nugu kunubus taar tano Watong
kaia ra matmataan ta ira uno matanaiabar bakut.
15 Ing tiga tunotuno nong i mur timaan God i maat,
a tamat na linge ra matmataan tano Watong.
16 Watong, tutun saakit bia a num tultulai iau.
Iau no num tultulai, hoing no pawasigu mah huo.
U te palas ise iau sukun ira nugu winwisaan.
17 Iau ni tar tiga hartabar wara tanga tahut saakit taam
ma iau ni tataau tupas no Watong.
18 Iau ni pakile haruatne ira nugu kunubus taar tano Watong
kaia ra matmataan ta ira uno matanaiabar bakut,
19 aram narako tano ngasiana no Watong
aram Ierusalem.
Pirlat no Watong.