10
1 Watong, wara biha gu tur tapaka sakit?
Wara biha gu suhe ugu ta ira sakana pakana bung?
2 No ut na sakena i la palpalim kawase ma ra minok diet ing taie ta harharahut ta diet.
Bale diet bia ira udiet harpingit na hakuni habaling diet.
3 I la butbut ta ira nginarau tano kaatine.
I la haidane ira gumut ma i la ngangare no Watong.
4 No ut na sakena pa na silihei narako ta ira uno minok.
Narako tano uno lilik bakut taie ta subaan ta God.
5 Ira uno hinahaan i la mon hunena.
I manga gotgot ma ira num harkurai i tapaka makaia ho ie.
I la ngaangangar taar ta ira ana suk.
6 I la tangtange tana iaat, “Taie tiga linge pa na gune iau.
Iau ni guama hathatikai ma pa ni haan tupas ta saksakena.”
7 No hana i hung ma ra nianga sakasaka.
A hinarabota ma ra harburut,
a haragahai ma ra sakena i la sursuur tano hana.
8 I la nanaho kumkumaan hutet ta ira taman.
I la bubu bing hakarup ira tunotuno ing taie pa da nes leh ta nironga ta diet.
I la munmunuane kuman diet ing na haliare diet.
9 I la nohnoh hoing tiga laion ing i susuhai taar.
I la palpalim kawase diet ing taie ta harharahut ta diet
ma i la rahrahi leh diet ma no uno uben.
10 I la halhaliare ira ana hiruo ma diet puko suur.
Diet puko menapu ta ira uno dadas.
11 I la tangtange tana iaat, “God i te luban.
I te suhe no uno matmataan ma pana le naanaas.”
12 Watong, taman tut! Raun no limaam, God.
Waak u lumluban diet ing taie ta harharahut ta diet.
13 Wara biha ira ut na sakena diet gi tange hagahe God?
Wara biha gi tange tana iaat, “Pana le tataau iau bia ni tur ra harkurai”?
14 Iesen augu, God, u la nesnes ira haragahai ma ira tapunuk.
U la liklik kaike ra magingin wara balbalu pukus ma no limaam.
Nong taie ta harharahut tana, i la tartar ise tar ie ukaia ho ugu.
Augu no ut na harharahut ta ira tintana.
15 Kutus no dadas tano ut na sakena.
Kurei ta ira uno magingin sakena tuk bia pa nu nes leh habaling a mon sakena.
16 No Watong aie no tamat na lualua hathatikai.
Ira sakana kantri diet na panim sukun no uno pise.
17 Watong, u te hadade ira sinisip ta ira maris.
Nu haragat diet ma nu hadade ira udiet tintaau.
18 Nu harahut ira tintana ma diet ing di hagahe diet,
waing ira tunotuno mekai ra ula hanuo, diet pa na haburut habaling ira mes.