3
No Bung na Sinangeh i wara harharahut ira tunotuno.
(Matiu 12.9-14; Luk 6.6-11)
1 Namur Jisas ga haan baling ukaia ra hala na lotu udiet ira Iudeia ing tiga tunotuno a lima mat ie ga kis taar kaia.
2 Ari diet ga kis taar mah kaia ing diet ga sip bia diet na tung Jisas. Io kaik, diet gaam nesnes ie bia na harhalon tano Bung na Sinangeh bia taie.
3 Io, Jisas ga tange tano lima mat, “Tut naliu ma nu haan ukai nalamin.”
4 Ma Jisas ga tange ta diet, “Asa ira harkurai tane Moses i tange bia da gil ra Bung na Sinangeh? Bia da harahut bia da harangungut? Bia da halon tikai bia da bing tikai?” Iesen diet ga kis kunkun.
5 Bia Jisas ga nasnas diet ga ngalngaluan taar ta diet ma ga manga tapunuk kanong diet ga hadadas ira bala diet. Io, ga tange tano tunotuno hoken: “Tul se no limaam.” Ga tul se no limana, io, ga tahut baling.
6 Io, ira Parisi diet ga suur laah gasien tano hala na lotu audiet ira Iudeia ma diet ga wawor ma diet ing diet git turtur ma ne Herot bia diet na bu bing Jisas hohe.
A tamat na matanaiabar sakit diet git murmur Jisas.
7-8 Io, Jisas ma ira uno bulu na harausur diet ga haan laah ukaia tano tamat na taah kom Galili. Ma a tamat na matanaiabar sakit diet ga mur ie. Diet ga hanuat meram ta ira hanuo Galili, Iudeia, Idumaia, ma no hanuo menamur tano tiga palpal tano taah Ioridaan. Ma diet ga hanuat mah ta ira pise na hala Ierusalem, Tair, ma Saidon. Diet kaiken ra matanaiabar diet ga hanuat kanong diet ga hadade uta ira linge bakut Jisas ga gilgil.
9 Bia ga manga haleng sakit ira matanaiabar Jisas ga tange ta ira uno bulu na harausur, “Muat na tagure tiga mon ukai ho iau waing diet kabi sibit iau.”
10 A burena gaam tange huo kanong gate halon ra haleng ma diet ing diet ga maset diet ga hartaguniguni ukaia nalua wara singsigire Jisas.
11 Ma ari a tunotuno, ira sakana tanuo ga sosoha ta diet. Ma bia diet ga nes Jisas, diet git tuntudu menalua tana ma ira sakana tanuo diet git kaakongane, “Augu no Nati God.”
12 Iesen Jisas ga hakatom tar ira sakana tanuo hoken: “Muat pa na hinawase ta tiga nong bia sige iau.”
Jisas ga gilamis ira apostolo.
(Matiu 10.1-4; Luk 6.12-16)
13 Namur Jisas ga hanut uram ra uladih ma i ga tatau leh diet ing ga sip diet. Ma diet ga haan tupas ie.
14-15 Ma ga gilamis leh ira sangahul ma iruo gaam kilam diet bia apostolo. Io, ga gilamis diet bia diet na kis tika mei ma na tule harbasiane diet wara harpir, ma bia diet na hatur kawase ra dadas wara hashasur ira sakana tanuo.
16-17 Io, i ga gilamis kaike ra sangahul ma iruo: Saimon (nong Jisas ga kilam ie bia Pita), ma Jemes dir tasin ma ne Jon ira iruo nati Sebedi (ga pas tiga mes na hinsa dir Buanerges, ing a kukuraina bia “Ira tunotuno ho ira parparara.”)
18-19 Ma ga gilamis habaling Andru, Pilip, Batalomiu, Matiu, Tomaas, Jemes no natine Alpias, ma Tadius. Ma tika ma diet, ne Saimon nong di ga kilam ie bia no Selot, ma ne Iudas Iskariot nong na tar se Jisas.
Jisas ga haminas bia pa ga tule hasur se ira sakana tanuo ma no dadas ta Sataan.
(Matiu 12.22-32; Luk 11.14-23; 12.10)
20 Bia Jisas ga haan laka tiga hala a tamat na matanaiabar diet ga haan haruat kaia kaik Jisas ma ira uno bulu na harausur diet pa ga haruat at bia diet na iaan.
21 Ma bia ira hinsakane Jisas diet ga hadade huo, io, diet ga marsei, diet gaam tange bia, “I biha? I te ba. Naka?” Ma diet ga haan wara hanhanawaan leh ie.
22 Ma ari a tena harausur ta ira harkurai tane Moses diet ga hansur meram Ierusalem. Ma diet ga tangtange, “Belsebul i te sosoha tane Jisas. Ma Jisas i haruat wara tultule hasur se ira sakana tanuo kanong iakano watong audiet ira sakana tanuo i te tar ra dadas tana kaik gi gilgil huo.”
23 Io, Jisas ga tatau leh diet ma ga haianga diet ma ira nianga harharuat hoken. “Sataan pai haruat tun at wara hasur se habaling ie.
24 Bia tiga huntunaan pai tur tika pa na tur dadas.
25 Bia tiga hatatamaan pai tur tika pa na kis timaan.
26 Ing bia no huntunaan tane Sataan gor harharubu baling ta diet, gor puko ma gor pataam.
27 Pataie ta tiga nong na laka tano ngasiana no ut na baso ma na kinau ta linge, ing bia pai huna kubus kawase ie. Ma namur um, na kikinau narako tano uno hala.
28 “Muat na hadade baak! God na lik luban se ira magingin sakena ta ira matanaiabar ma bia diet na ianga hagahe sige ta tikai, na lik luban se iakano mah.
29 Iesen nong i ianga hagahe no Halhaliana Tanuo, God pa na lik luban se iakano magingin. Iesen iakano magingin sakena na kis hatika taar ma pa nale pataam.”
30 Jisas i ga tange huo kanong diet ira tena harausur diet ga tangtange, “A sakana tanuo i te sosoha tana.”
Jisas ga hapuasne ira hinsakana tutun.
(Matiu 12.46-50; Luk 8.19-21)
31 Namur no pawasi Jisas ma ira tasine diet ga hanuat ma diet ga turtur haan nataman. Diet ga tule halaka tiga nong bia na lamus leh ie.
32 Ma ari ta diet ta ira haleng na matanaiabar diet ga tange tana, “No pawasim ma ira tasim ken nataman.”
33 Io, Jisas ga tange, “Iau ni hinawase muat bia sige no pawasigu ma ira tasigu.”
34 Namur ga nas diet ing diet ga kis luhutane tar ie gaam tange, “Diet kaiken ira pawasigu ma ira tasigu.
35 Bia sige tikai i la murmur no sinisip tane God, iakanong a tasigui, a hainigui, bia a pawasigui.”