3
Jon ga harharpir bia diet na lilik pukus waing diet naga taguro tano Mesaia.
(Matiu 3.1-12; Mak 1.3-6)
1 Ing Taiberias, no tamat sakit ta ira lualua na gil harkurai, gate harkurai a sangahul ma liman na tinahon, io, ta iakano pakana bung ne Pontias Pailat ga harkurai tano hanuo Iudeia. Ma ne Herot ga harkurai taar tano hanuo Galili ma no tasine, ne Pilip, ga harkurai taar ta ira iruo hanuo Ituria ma Tarakonitis. Ma ne Lisanias ga harkurai taar tano hanuo Abilene.
2 Ma ne Anas ma ne Kaiapas dir ga tamat at ta diet ira mes na ut na pakila lotu. Ta iakano pakana bung God ga tar no uno hinhinawas ta Jon no natine Sekaraia aram ra hanuo bia.
3 Io, Jon ga haan ta ira hanuo bakut kaia hutet tano taah Ioridaan ma ga harharpir hoken: “Muat na kap no baptais na lilik pukus waing God naga lik luban se ira numuat magingin sakena.”
4 Io kaik, gaam haruat ma ira pakpakat tano tangesot Aisaia. Ga tange hoken,
“Meram ra hanuo bia a ingana tiga nong i taatau,
‘Tagure no ngaas tano Watong,
Gil hatakodas ie wara uno hinanhuat.
5 Ira salil bakut da bus,
ma ira uladih da kil hamadahien.
Ira pusuko na ngaas na takodas,
ma ira sagonsagon na madahien.
6 Ma ira tunotuno bakut diet na nes no harhalon gar ta God.’ ”
7 Ma a tamat na matanaiabar ga haan tupas Jon bia na baptais diet. Ma ga tange ta diet, “A sakana ut na harabota muat! Sige ga hakatom muat bia muat na hilau sukun no harpidanau nong God i hutet bia na tar ie?
8 Gaar tahut bia muat na gil ira linge ing na haminas bia muat te lilik pukus! Io, muat tange bia a bulumur tane Abraham muat, kaik muat haruat bia muat na hilau sukun nora harpidanau tane God. Iesen waak muat lik huo. Pa na tutun. Pai tamat na linge bia muat ira bulumur tane Abraham. Iau hinawase muat bia God i petlaar bia na hatahuat ta bulumur ta Abraham ta kaiken ra haat mon.
9 No matau ie ke ra bola daha, nong i taguro taar wara katkato hasur ira daha. Ma ira daha bakut, ing diet pai la huhuai ta tahut na hunena, na kato hasur ma na se tar ra ula iaah.”
10 Ma ira matanaiabar diet ga tirii, “Io, ing bia huo, mehet na gil sa?”
11 Io, Jon ga balu diet ma ga tange, “Bia airuo ra num sigasige, nu tabar nong i supi ma tiga nong. Ma nong i hatur kawase ra nian, i tahut bia na gil mah huo.”
12 Ira ut na kap takis diet ga haan tupas ie bia na baptais diet. Ma diet ga tirii bia, “Tena harausur, mehet na gil sa?”
13 Ga tange ta diet, “I tahut bia muat na kap haruatne mon ing di te kure tar ta muat ma waak muat laklake iakano harkurai.”
14 Ma ari a umri diet ga tirii bia, “Ma mehet, mehet na gil sa?”
Jon ga balu diet bia, “Waak muat hapar leh ra kinewa ta ira matanaiabar ma waak muat tung habisbisne tiga nong. I tahut bia muat na lik bia ira numuat kunkulaan i haruat mon.”
15 Ma ira lilik audiet ira matanaiabar ga tahuat bia a mangana linge na hanuat ma diet ga manga lilik bia no Mesaia dak um utane Jon.
16 Ma Jon ga balu diet gom tange, “Iau baptais mon muat ma ra taah ma sen bia nong i tamat at tagu na hanuat. Ma iau pai haruat bia ni lapus ira hinau ta ira iruo pupunaak na kakine. Aie at na baptais muat ma no Halhaliana Tanuo ma ra iaah mah.
17 Ma i palim tar no uno sawol wara sese haut ira wit tano dadaip nong na puh se ira suruno ma ira parahona. Iesen ira tahut na pat na wit ing diet tirih ma diet puko suur, na reng hulungen ukai hora uno suuh na masur. Ma na se tar ira suruno ma ira parahona tano iaah kis.”
18 Io kaik, Jon ga hadadas ira matanaiabar ma ra haleng na mes na nianga mah ing ga pirpir diet ma no tahut na hinhinawas.
19 Iesen Jon ga tibe pinpin ne Herot no lualua kanong ga tole leh Herodies no hahin tano tasine. Ma pa ga tibe pinpin ie uta iakano sen mon. Herot ga gil mah ari a mes na sakana magingin.
20 Ma ing bia Jon ga gil huo, Herot ga gil iakan ra sakena tun at: ga banus bat Jon uram narako tano hala na harpidanau.
Jon ga baptais Jisas.
(Matiu 3.13-17; Mak 1.9-11)
21 Ma ta iakano pakana bung bia ira matanaiabar diet ga kapkap baptais, io, Jisas mah ga kap baptais. Ma bia ga saasaring no mawe ga tapapos.
22 Ma no Halhaliana Tanuo ga hansur taar tana ma ga tatalen hoing tiga bun. Ma a ingana tiga nong ga ianga suur meram ra ula mawe hoken: “Augu no Natigu, ma iau manga sip ugu ma iau kanakana sakit taam.”
Ira hintubune Jisas.
(Matiu 1.1-17)
23 Ma ing bia Jisas ga hatahun no uno pinapalim ga wara haruat ma aitul a sangahul na tinahon. Ma tano lilik ta ira matanaiabar bia Jisas no natine Iosep.
Ma Iosep no natine Heli.
24 Heli no natine Matat.
Matat no natine Lewi.
Lewi no natine Melki.
Melki no natine Ianai.
Ianai no natine Iosep.
25 Iosep no natine Matatias.
Matatias no natine Amos.
Amos no natine Nahum.
Nahum no natine Esli.
Esli no natine Nagai.
26 Nagai no natine Mat.
Mat no natine Matatias.
Matatias no natine Semen.
Semen no natine Iosek.
Iosek no natine Ioda.
27 Ioda no natine Ionan.
Ionan no natine Resa.
Resa no natine Serubabel.
Serubabel no natine Siatiel.
Siatiel no natine Neri.
28 Neri no natine Melki.
Melki no natine Adi.
Adi no natine Kosam.
Kosam no natine Elmadam.
Elmadam no natine Er.
29 Er no natine Iosua.
Iosua no natine Elieser.
Elieser no natine Iorim.
Iorim no natine Matat.
Matat no natine Lewi.
30 Lewi no natine Simion.
Simion no natine Iuda.
Iuda no natine Iosep.
Iosep no natine Ionam.
Ionam no natine Eliakim.
31 Eliakim no natine Melia.
Melia no natine Mena.
Mena no natine Matata.
Matata no natine Natan.
Natan no natine Dawit.
32 Dawit no natine Iesi.
Iesi no natine Obet.
Obet no natine Buas.
Buas no natine Salmon.
Salmon no natine Nason.
33 Nason no natine Aminadap.
Aminadap no natine Atmin.
Atmin no natine Arni.
Arni no natine Hesron.
Hesron no natine Peres.
Peres no natine Iuda.
34 Iuda no natine Iakop.
Iakop no natine Aisak.
Aisak no natine Abraham.
Abraham no natine Tera.
Tera no natine Nahor.
35 Nahor no natine Seruk.
Seruk no natine Reu.
Reu no natine Pelek.
Pelek no natine Eber.
Eber no natine Sela.
36 Sela no natine Kainan.
Kainan no natine Arpaksat.
Arpaksat no natine Siem.
Siem no natine Noa.
Noa no natine Lamek.
37 Lamek no natine Metusela.
Metusela no natine Enok.
Enok no natine Iaret.
Iaret no natine Mahalalel.
Mahalalel no natine Kenan.
38 Kenan no natine Enos.
Enos no natine Set.
Set no natine Adam.
Adam no natine God.