19
JESUS SAKEUS ELE DILAH KAYA
1 Amu Jesus Nug tutuḵu noa, Jeriko oop̱a ugeḵe,
2 am danab laa ap̱a dayom, nug onig amu Sakeus. Nug am danab takis aoṯeb amu dilag iḵi. Danab amu nug enub oḵai ele.
3 Amu nug Jesus Nug am danab aṯemunab anṯa dooḵunu oo dayom amge danab ah ameg naḏi Jesus qehaḵeg, Sakeus nug ele am danab tutu amunu nug Jesus anidḵunu elele iiṯa.
4 Elele iiṯa amunu Jesus Nug ib amup̱a uḏiṯe doyom amunu nug qaibaḏ anuqa uḵa, Jesus anidḵunu ha, ad sikimon laa teum.
5 Amu Jesus Nug uḵa uḵa, Sakeus dayomp̱a ta, baeg ya dayaya, ameg huma aṯan neeḵa, nug amegp̱a aum. “Sakeus na paha ne! Gemu da na lautp̱a daaḵul,” awa aum.
6 Nug anam aum amunu Sakeus nug oo gamag ahe, paha honap na, Jesus omale nug laugp̱a gopiḏ.
7 Am Jesus Nug Sakeus laugp̱a goya daaeheh, danab oh ag amu anidna, ag aḵa naituḏ maṯin Jesusnu ap̱ig. “Nug uḵa, hip̱unin danab umu laugp̱a ḏo danab daaḵunu teum,” aon ap̱ig.
8 Aria Sakeus aha hibaiṯa, Jesus amegp̱a aum. “Naḏi, gemu da dahil keeke oh amu gamagp̱anab op̱aten, laih awe, daḏek danab madaḵul. Amu da danab laa ham bup̱uiṯen, nuhig keeke yab aomi dayeb amu aria da amu eḏuen, nob amu tuḏiṯen, ewam laa ele nug medaḵul,” awa aum.
9 Anam a, Jesus Nug Sakeus amegp̱a aum. “Gemu Kayak Nug lag imup̱anu danab ah eḏua diiom. Danab imu ele amu nug Abraham beḵa,” awa aum.
10 Anam anana, Nug nai tuḏiṯa aum. “Danab Beḵalag da amu da danab ag padal mep̱ig daaṯeb ele, da ag eḏuen diiadḵulnu uḏimi,” awa aum.
BEGBEG 10 AG MEN DOḎO, TUḎIDḴULAGNU AOP̱IG
11 Jesus Nug Sakaeus laugp̱a dayaya, nai amu maṯie doyeg, Nug Jerusalem guguiṯa dayeye, danab ah ag, “Kayaknu ḏo maḏoḏ am geha iiḵu miag atiḵu,” dab menan doop̱ig amunu ag anam dab memananu, Jesus amu Nug nai tuḏiṯa, keeke danab ag dooṯeb ii dooṯeb ele amu ou aqata, ip̱uanaṯa, inam maṯiom.
12 Nug maṯia aum. “Wan laap̱an gumak danab laa nug aha, wan laap̱a uma uḵeb, geha ag nug ahilag oḵai daaḵunu mep̱eg, dimp̱a amu nug eḏua uḏia, uḏat aḏit amu oh heḵunu dab meum.
13 Nug anam dab maama aria nug nuhiḵud uḏat danab eblaih tanig ele onilagp̱a ewowa, nug am siks handat kina anen anen anam pania madaṯa, amelagp̱a aum. ‘Ag imu tuḏidna, qag mebep̱eg, da eḏue uḏip̱i, meḏap̱eg aoḵul,’ awa aum.
14 Amge nug mudip̱an laiḵud ag anuḵa ag oolagp̱a nuhignu nau, ninig ele doop̱ig amunu nug uḵe, am danab laala ag heeg, ag oolagp̱an danab laa ag nug dim lamidnana amu ag inam ap̱ig. ‘Ig am danab imu nug ihinig king daaḵunu amu ig oonig ii daaṯe,’ aon ap̱ig.
15 Ag anam ap̱ig amge wan laap̱a ag nug king meeg, dimp̱a nug eḏua uḏia, nug wanebp̱an danab amelagp̱a aum. ‘Uḏat danab anuḵa da men doḏo maṯami ele amu onilagp̱a ep̱eg, ag oh anen anen men doḏo amu tuḏidna tuḏiṯak gane aop̱ig amu da dooḵul,’ awa aum.
16 Eeg dona amu danab laa ba nug aum. ‘Naḏi, da siks handat kina nahip imu bau laa tuḏiṯe qag mein, tuḏiṯak siks tausen kina aomi,’ awa a am king nug amegp̱a aum.
17 ‘Na uḏat danab ena, na uḏat enanag heme, na keeke nakoknab dab meṯan autna aome amunu gemu da na ab oḵai ten gumadḵutnu g̱agaṯag medaṯem,’ awa aum.
18 Aria laa dim ba aum. ‘Naḏi, da siks handat kina nahip imu bau laa tuḏiṯe qag mein, tuḏiṯak tri tausen kina aomi,’ awa a, king nug amegp̱a aum.
19 ‘Da na ab oḵai tanig ele gumadḵutnu g̱agaṯag medaṯem,’ awa aum.
20 Amu uḏat danab laa nug aum. ‘Naḏi, nahip siks handat kina amu ina daaṯe. Da lamen qaṯi laa oop̱a iten mei dayom.
21 Aḏinu? Da na anidṯem, na danab g̱agaṯag ele, danab laa nug keeke me daaṯe amu na aona, danab laa e ep̱om amu na amunu meu ele aoṯem. Amunu da nahipnu baḏami,’ awa aum.
22 A amu king nug nid amu amegp̱a aum. ‘Na uḏat danab nau, bodo eṯaknab. Amu da na naḵa nahip nai amup̱a na epeḏidḵul. Amu genabnabte na doome, da am danab g̱agaṯag ele? Amu keeke oh danab laala meeg, da aoṯem amu danab laala e ep̱aeg, da hiḏaṯem, da anam heiyi doomete?
23 Na genab da am danab g̱agaṯag doolom amu na da baḏilna, na men doḏo dahil amu benkp̱a melom, dimp̱a da eḏue uḏien, men doḏo amu, am nuhig tuḏuiṯak ena ele aolom amge na anam ii heme,’ awa aum.
24 Nug anam anana amu nug danab guguiṯak hip̱aidna daaegeg amelagp̱a aum. ‘Ag nug ep̱egp̱a siks handat kina daaṯe amu aḏidna aon, danab laa siks tausen kina ele amu meṯeg!’ awa aum.
25 Nug anam a amu ag ap̱ig. ‘Naḏi nug am siks tausand kina awa aḏate,’ aon ap̱ig.
26 Anam aeg nug aum. ‘Da ag amelagp̱a aṯem, danab nug keeke aḏate ele amu da baula ele medaḵul amge danab laa nug keeke nakok tatam awom aaḵuib aḏeb amu da aḏidḵul,’ awa aum.
27 Gumak danab amu nug anam anana, nug nai tuḏiṯa aum. ‘Aria laa ag da kekeḏ meḏan, da ahilag king daaḵulnu uup̱ig ele amu ag diin, da noolp̱a ip̱a dona, aqap̱eg mauheg!’ awa aum.”
JESUS KING BIA JERUSALEM TEUM
28 Amu Jesus Nug nai amu maṯia malowa, Nug aha anuqa, Jerusalem ukaknu ib awa uḵom.
29 Nug uḵa Betpasi, Beṯani ele guḵuata, ab aḏit amu a qauko Olip ele aṯeb, qauko amu guguiṯak amu, ap̱a nug he, nuhikuḏ ip̱uniṯak awak danab aḏit laa anuqya goḵulahnu aum.
30 Nug a amelahp̱a inam aum. “A goya, ab nakok miag amup̱a teya, ap̱a ab daugp̱a a donki nag laa nakok oḵai meum ele amu, qaḵak daaṯe anidḵulah. Anuḵa danab laa amu aṯan ii oiyom ele. A anidya amu a uhuqya aoya uḏieḏ!
31 A anam aop̱eḏ amu danab laa, ‘Aḏinu a donki amu uhuqṯep?’ awa oḏ maṯeb amu aria a nug amegp̱a inam aiḏ! ‘Naḏi Nug nuhignu uḏat ele amunu i uhuqṯeb,’ aḵulah,” awa aum.
32 Jesus Nug danab aḏit otiatom ele amu a goya, keeke oh a amelahp̱a aum ele amu anidpiḏ.
33 Anidya, a donki qaḵak, muḏi amu uhuqeheh, donki mameg ag a oḏ matan ap̱ig. “Aḏinu a donki nag bau amu uhuqṯep?” aon ap̱ig.
34 Aon aeg amu a apiḏ. “Naḏi Nug nuhignu uḏat ele,” aoya apiḏ.
35 Aria a donki amu aoya, Jesus gumidya uḵaeh, ag lamen ulahnu ahilag aon, donki gomep̱a duqona amu Jesus ehaniṯeg, donki aṯan ta dayom.
36 Am Jesus Nug donki aṯan ugeḵe, danab ah ag lamen ulahnu ahilḵad aḵan ibp̱a duqadp̱ig.
37 Am Jesus Nug uḵa, ib laih qauko Olip amu eḏiṯa no amu nuhiḵud ip̱uniṯak awak danab kuḏum laa ele ag oh nuhignu gamalag ahom. Aḏinu? Nug uḏat danab heḵunu elele iiṯa kuḏum he anidp̱ig amunu ag baalag oḵaip̱a enan Kayak binag humap̱ig.
38 Ag Kayak binag human, baalag oḵai enan ap̱ig. “Ig king binag metu, Nug Naḏi onigp̱a uḏiṯe! Kayak Nug itidṯe. Nuhigp̱a Kayak Nug ig danab, ihinignu oo ena daaṯe. Ig Kayak Ebehi Ele, Nug binag aṯannab humatu.”
39 Ag anam heegeg, Juda dilag ḏo gumak danab-Parasia ag danab ah ameg amu oolagp̱a daanna, ag Jesus amegp̱a ap̱ig. “Ip̱uniṯak danab, na nahipad ip̱uniṯak awak danab amelagp̱a ap̱e, ag to eṯeg!” aon ap̱ig.
40 Aon aeg amu Jesus Nug ag anam ap̱ig amunu amelagp̱a aum. “Da ag amelagp̱a aṯem, imu ag oḏelag qamutp̱eg, aria men amu ag eḵulag,” awa aum.
41 Anam anana Jesus Nug uḵa, Jerusalem guguiṯa wana, Nug ab oḵai amu anṯa, ameg leb ne,
42 Nug aum. “O gadon, ag maḏoḏ daaglagnu ib ii dooṯeb. Ug awak haen ahilag am miagnab amge ag aṯemun maḏoḏ daaglagnu ib amu anidlob, ag ug amu ii anidlob amge ib amuam ag amelagp̱a loḵumak daaṯe.
43 Amunu ag doyeg! Geha dimp̱a haen amu uḏieb, ahilag kekeḏ ag aqaglagnu uḏin, talilidna, wan buup̱eg uḵeb amu qalana wana, ag aben ohp̱a ag oo maṯan autanab aoglag.
44 Amu geha kekeḏ, ag amu ag buḏulḵad ele, ag tap̱aladna oḏoḏadna autna aoglag. Abnu aḏ, lag ele menp̱a hep̱ig amu kekeḏ ag men laip̱u uup̱eg abenp̱a ii daama. Kayak Nug ag Juda ehanadḵunu heum amge ag amu ii doop̱ig amunu kekeḏ ahilagnu ag anam heḵulag,” awa aum.
JESUS NUG LAA MANA MEṮAK LAG OOP̱ANU LAMAṮOM
45 Amu Jesus Nug mana meṯak lag oop̱a noa, nug danab lag amu oop̱a mana meṯaknu keeke dadennu maadp̱ig amu, Nug dig ma ag lamaṯom.
46 Nug amelagp̱a inam aum. “Kayak naip̱a yak inam daaṯe. ‘Da laul amu unuqiṯak lag,’ amge ag heeg, yabhok danab dilag loḵumak aben bia daaṯe,” awa aum.
47 Nug anam hewowa amu Nug deḏ oh mana meṯak lag oop̱a noa, danab ah Kayak nai ip̱uanaṯom. Nug anam heehe amu mana meṯak danab oḵai amu ḏo mehuqak danab am danab ah gumaṯak iḵi ele ag ahan, Nug qep̱eg mauhḵunu ib madip̱ig.
48 Amge danab ah oh ag nuhig nai dooglagnu wagai mena hep̱ig amunu iḵi danab ag Nug qep̱eg mauhḵunu ib laa ii anidp̱ig.