5
Iesusa rɨpacrena laiplacara gan tiacarpaikna gargarmo kunda eacrena
1 Na meikramtaɨra muruŋa Iesusmo rɨpacrenan, na ma an ramootta Raraŋ Aetaniaca babuca mbagɨrica kɨpca aimo mac nda aŋgɨna ramoot, aintik mina Raraŋ Aetaniacna mombonik tarurina. Ainda moca meikramtaɨra muruŋa aet kabea matŋirenan, mina muruŋa mana mombonik motoco matŋirena.
2 Te, aia Raraŋ Aetaniacmo matŋica mana tɨpemb wandikmo mataui raŋgai te, an kirarir puŋga, aia ndorimo lamŋi rapacnande, aia Raraŋ Aetaniacna mombonikmo mataua matŋica maraupŋireke.
3 Na aia Raraŋ Aetaniaca matŋi te, aia mana tɨpembta kirarirmo, mataui raŋgaina. Na mana an tɨpembca, aimo makukara neaŋna mɨnna wanaiŋ.
4 Aintik meikramtaɨra muruŋa Raraŋ Aetaniacna mombonik tarurenan, mina gan tiacarpaikna gargarmo kɨtac iriknande. Ainda moca aia Raraŋ Aetaniac niŋgikca rɨpac, an taup mbuŋa aia gan tiacarpaikna gagrarmo ruŋi kɨtaci irikca, kunda tamuŋ ŋgoin ndeacnande.
Raraŋ Aetaniaca ndona Nuocna kammo mboprina
5 Na mandaia gan tiacarpaikna gargarmo kɨtac irikna mɨn? Na ramootta Raraŋ Aetaniacna Nuoc Iesusa rɨpac te, ma gan tiacarpaikna gagrarmo ma kɨtac irikna mɨn.
6-8 Na an ramoot Iesus Karais, ma gan kirar mbuŋa kɨpatna, kɨtac puk aŋtaŋgɨna kirarap, ik nakeraca ndona racaindpaiknanna kactaca irikatna kirar mbuŋ nakɨpatna. Na ma puk mbuŋna kɨtac pukna kirar niŋgik ndiŋa mba kɨpatke, wanaiŋ ŋgoin. Ma pukna kɨtac pukapa racaindpaikapna, kirar mbuŋ nakɨpatna. Na Ŋeroŋ Rat, ma ndo kam gidikna mɨnɨŋ, na ma ndo Iesusna morena kirarirta kam wiwitirena. An reik, mbonkaca mina ndori, mana kirarirta kam wiwitia wandacrena. An reikca ianna Ŋeroŋ Rat, na ianna puk, na ianna mana racaindpaik. Na mina ndori kam iro kabe niŋgikna kam leacrena.
9 Na aia meikramtaɨr mboprena kambca waraca rɨpacrena, na Raraŋ Aetaniacna mbopatna kamb, an meikramtaɨrta kambmo kundrina. Na mana Nuocna kamma anna ma atuna wiwitia mbopatna.
10 Na ramootta Raraŋ Aetaniacna Nuoca rɨpacrenan, ma Raraŋ Aetaniacna wiwitiatna an kambca ma aŋgɨra mana iro inik maeacreke. Na ramootta Raraŋ Aetaniacna kambca rɨpac ŋgocor, ma Raraŋ Aetaniacna kammo ma paparu ndopnande. Aintik Raraŋ Aetaniaca ndona Nuocna tɨpemb kirarirta kambca an topatnanna, ma waraca mba rɨpacri.
11 Mana kambca gidkar koind, an kirarir puŋga, ma aimo anna wandacrina. Ainda moca Raraŋ Aetaniaca aimo iarwarna eteacna wat neaŋgatna. Na mana Nuoca ma an iarwarna eteacna wat ŋgam, na man niŋgikca ma ndo anna mɨnɨŋ.
12 Na ramootta Raraŋ Aetaniacna Nuocmo taŋi mɨk te, ma iarwarna eteacna watap. Na ramootta Raraŋ Aetaniacna Nuocmo taŋi mɨk ŋgocor, an iarwarna eteacna watta manap mba eacitndai.
Ionna mamamaina kam
13 Na ne Raraŋ Aetaniacna Nuocna i mbuŋa rɨpaca utiŋrena meikramtaɨra, aku gan kamma nena moca tirrina, nemo anna wati rapacna moca, na an iarwarna eteacna watta ne maaŋgɨri.
14 Na aia Raraŋ Aetaniacna toŋtoŋ niŋgik ŋgoinna raŋgairaŋ te, na aia mana toŋgorena kirar ndiŋa mbendeica digi te, ma aina mbendeiekna kamma, ma waracnandet. Ainda moca aia man narica mba nanambirenanna, wanaiŋ ŋgoin. Aia mana kɨtɨmma taŋrena.
15 Aintik aia lamŋirena, aia mamo mbendeica digirena kambca, ma waracrena. Ainda moca aia manmo ndorimo reac ian neaŋna moca digirenanna. Aia rɨpaca lamŋirina, an reaca, ma aimo gidik ŋgoinna neaŋnande.
16 Na ramootta, u Iesusa rɨpacrena laiplacarta ianna tɨp ŋgoreacna makukca moeknanna wat te, mana morina tɨp ŋgoreacna makukca, mamo mo menacna mɨnna wanaiŋ, te, u Raraŋ Aetaniacmo mbendei digica, ma mamo otaca, mamo wat manan mac nda neaŋna. Na aku mboprena tɨp ŋgoreacna makukna kamma, aku an tɨp ŋgoreacna makuk ianna meikramtaɨrmo mba moa menacrenanna, an tɨp ŋgoreacna makukna kamma aku an ndoprena. Na tɨp ŋgoreacna makuk ianna, anna meikramtaɨrta, ŋerŋgaurmo mo menacna mɨn, na aku nemo meikramtaɨra an tɨp ŋgoreacna makukca morenanna, mbendei nake mba mbopri.
17 Na tɨpemb kirarira muruŋa laiŋga wanaiŋ, mina maeacreke. An tɨpemb kirarir, anna tɨpemb ŋgorikta makukar. Na tɨp ŋgoreacna makuk ianna, ma meacramootna ŋeroŋmo mba mo menacitndai.
18 Na meikramtaɨra Raraŋ Aetaniacna mombonik teacrenan, aia minmo lamŋirena mina mba tɨp ŋgoreacna makukca mba moraŋitndai. Wanaiŋ ŋgoin. Raraŋ Aetaniaca minmo aŋgɨra raupŋia ndona bubuocna kaŋgaukca tɨkca, mina mana mombonik teacrena. Na Ramoot Ŋgoreaca minmo reac ianna mona mɨnna wanaiŋ.
19 Na gan tiacarpaikca Ramoot Ŋgoreacna gargarna kaŋgauk ndeacrena. Aintik aia lamŋirena, aia wanaiŋ, aia Raraŋ Aetaniacna mombonik.
20 Na aia lamŋirina, Raraŋ Aetaniacna Nuoca kɨpca eacreke, ainda moca ma aimo iro landamŋi neaŋrena, aimo Raraŋ Aetaniaca watirapaca, manapa mana Nuoc Iesus Karaisap, maniŋmo taŋi mɨkna moca. Aintik Iesus, ma Raraŋ Aetaniac, ma ndo iarwarna eteacna watna mɨnɨŋ.
21 Ainda moca aukna mombonik, ne gan tiacarpaikna mɨrpembraraiŋ tarica, iukaia tawan ndeac.