Pola Tesalonikanandmo tiratna outna timbiŋ rapar
Outna kam
Tesalonika auŋ aniac, ma Masedoniana pitrik waŋ ndeacrena. Na an mɨnna Pola Pilipaia tɨkcarica ma Tesalonika auŋ aniaca taŋgatna, na ma anna tɨkca Iesusna rɨtɨpaikta meikramtaɨrta tumbunna moa ŋgeprina. Na u, Iesusna Up Aŋgɨrena Ramtaɨrta Aiŋna Nininina Timbigta Kapna sapta 17 wes 1 taŋca wes 9na inikca wat, an kamma anna eacrena. Na an mɨnna Iudanaŋgepca watrinanna, meikramtaɨr wɨtta Polna kambca raŋgaica, mina Iesusa rɨpacrena laiplacar tarurina. Aintik mina Polmo nikkatta manmo moa ma Tesalonika auŋ aniacmo tɨkcariri. Na iŋmbaia Pola taŋga Korin auŋ aniaca eacri, mana aiŋ kabe Timotia kɨpca manmo an reikca Tesalonika auŋ aniacna Iesusa rɨpacrena laiplacara tarurina kamb toprina.
Na an mɨnna Pola Timotina kambca waracatke, manapa, Sailasapa, Timotia mina gan timbiŋ rapara tirrinan, na anna Tesalonika auŋ aniacna Iesusa rɨpacrena laiplacarta rɨtɨpaikca moi gagranan. Na landamŋina ramtaɨr wɨtta mina gaind ndamŋirena, anna Polna out ŋgoinna timbiŋ raparna timbiŋ raprira ma tirrina. Na an timbiŋ rapar mbuŋa Pola ma Tesalonika auŋ aniacna Iesusa rɨpacrena laiplacarta rɨtɨpaikapa mina tɨpemb kirarir laiŋta toŋtoŋ ŋgoin.
Na anna Iesusa rɨpacrena laiplacara mina mba gɨwaca lamŋirena, Karaisa ma titoca mac nda kɨpit. Na mina garacna, an mɨnna Karaisa kɨp ŋgocora eacrenanna, an menacrina meikramtaɨra mitoca an iarwarna watta aŋgɨit, co wanaiŋ? Na Karaisa tumbuitta kɨpit? Na Pola mina kamb rutica ma gaindoprina, an mɨnna Kacootta kɨp te, mina tɨpemb kirarir laiŋga raŋgairaŋ, na mina kocroca eacraŋ.
Polapa mana aiŋ kabenanda mina Tesalonikanaŋgepta kadmairina
1
(1—3)
1 Aku Pol, aukapa, Sailasapa, Timotiap, aia nemo Tesalonika auŋ aniac ndeacrena meikramtaɨra, ne Iesusna rɨtɨpaikta meikramtaɨrta tumbunmo, aia gan timbiŋ rapara nena moca tirca neaŋga kɨprina, nena meikramtaɨra Raraŋ Aetaniacapa, Kacoot Iesus Karaisap mɨkca eacrenan.
Na Raraŋ Aetaniaca nena moca kadmai te, ma nena iroar inkarmo moi wewettaca ne laiŋ teacnandet.
Pola ma Tesalonikanaŋgepta rɨtɨpaikta toŋgorena
2 Aia memetmbaca nena ndamŋireke, Raraŋ Aetaniacmo nena iremb kaca mbendeireke, manmo kam laŋ neaŋrena.
3 Na nena rɨtɨpaikca nenmo moa ŋgepca, ne tɨpemb kirarir laiŋga morenan, na nena morena aiŋir laiŋta moca, aia ndorita Raraŋ Aetaniac Aetmo kam laŋ neaŋrena. Aintik ne ndorita iroar inkarmo kabenanda matŋireke, na an mamatŋina aiŋ gargara ne aina Kacoot Iesus Karaisna ndabirena.
4 Ne Iesusa rɨpacrena laiplacar, Raraŋ Aetaniaca nena moca mamatŋi aniac ŋgoin, aintik aia lamŋirinanna gaind, Raraŋ Aetaniaca nenmo larapacrina ne manan ŋgoin.
5 Na gan kam wembaŋ laŋa, aia nen ndambuŋ naaŋgɨra kɨpatnanna, anna kam kamainda wanaiŋ. Na ma gargarapa Ŋeroŋ Ratap, na ne ndorita lamnik puŋga aina rɨtɨpaikta gagrar anikca watatna. Na aia nena rɨkca tɨkca nen ŋgotacatna tɨpemb kirarira ne ndori puŋga watatna.
6 Na ne Raraŋ Aetaniacna kam aŋgɨri, nenmo makukar wɨt aniaca nenmo larurina, ri, ne aina tɨpemb kirarirapa Kacootnanna raŋgairi, Ŋeroŋ Ratta nenmo aoca ŋgepca ne toŋgorina.
7 Aintik nena tɨpemb kirarir laiŋ, ne muruŋa Karaisa rɨpacrina meikramtaɨra Masedoniaapa, Akaiana pitrik waŋ ndeacrenanmo, ne minmo muruŋa tɨpemb kirarir laiŋga wandacrina.
8 Na Kacootna kamma ne an wiwitirenan, mana kamma rɨmbɨŋna mɨtmɨtna kamna kirara, mon, monna taŋrena. Na ma Masedoniaapa, Akaia niŋgikca mba taŋri. Wanaiŋ. An auŋemb muruŋa nena Raraŋ Aetaniaca rɨpacrinanna kamna nininiara waracrinan, aintik aia minmo mac ninini mbopna mɨnna wanaiŋ.
9 Na mina ndori puŋga an larurina reikta nininiara, aia nenmo moatna reikta kamb topnandet. Na an mɨnna aia nen ndambuŋ nakɨpatna mɨnna, ne mɨrpembraraiŋ tɨkcarica nikinik iroar uriracri, na ne Raraŋ Aetaniacna aiŋirta ramtaɨr tarurinan, na ne iarwar ndeteacna Raraŋ Aetaniac gidik niŋgikca raŋgairinan.
10 Na mana Nuoca ma tamuŋna auŋ tɨkcarica mac nda kɨpna moca ne anna ndabirena, an Nuoca ma menacri, na Raraŋ Aetaniac, ma manmo mac nda moa ŋgeprina. Na an Nuoca anna Iesus, ma ndo ai mac nda aŋgɨnande, na an mɨnna Raraŋ Aetaniacna nikkakatta laru te, aia laiŋ teacnandet.