15
کَوْتَلْ تٛکُّٻٜ يٜىٰسُ تٛ اُرُشَلِيمَ
1 سٜيْ وٛٻّٜ يِمْٻٜ پِوٛيِ لٜيْدِ يَحُودِيَ نغَرِ غَرِيرِ اَنْتَاکِيَ، اٜ ٻٜ اٜکِّتِنَ تٛکُّٻٜ يٜىٰسُ، اٜ ٻٜ مبِعَ، «تٛ اٛنْ نَادَاکَ نٛنْ نٛ اَتَّوْرَ وِعِ اٛنْ کِسَتَا؞»
2 بُلُسْ اٜ بَرْنَبَ نغٜدّٛوتِرِ اٜ مَٻّٜ غٜدِّ نَوْطِ؞ سٜيْ کٛولِيٻٜ يٜىٰسُ وٛنْٻٜ اَنْتَاکِيَ شُٻِ بُلُسْ اٜ بَرْنَبَ اٜ وٛٻّٜ ندٜرْ مَٻّٜ، ٻٜ لِلِٻٜ اُرُشَلِيمَ نغَمْ ٻٜ مٜدَّ اٜ لِلَاٻٜ اٜ مَوْٻٜ وٛنْٻٜ تٛنْ دٛوْ حَالَ کَنْ؞
3 سٜيْ تٛکُّٻٜ يٜىٰسُ ٻٜنْ طٛفْتِٻٜ ٻٜ نَنْغِ لَاوٛلْ يَاکِ لٜيْطٜ فِنِيکِيَ اٜ سَمَارِيَ، اٜ ٻٜ کٛکَّ تٛکُّٻٜ يٜىٰسُ حَبَرُ تُوبُکِ يِمْٻٜ نَاع يَحُودَنْکٛعٜنْ؞ تٛکُّٻٜ يٜىٰسُ فُو نَنِ بٜلْطُمْ حَبَرُ طُمْ؞
4 ندٜ ٻٜ نجٛتِّي اُرُشَلِيمَ، کَوْتَلْ تٛکُّٻٜ يٜىٰسُ اٜ لِلَاٻٜ اٜ مَوْٻٜ ٻٜنْ نجَٻِّيٻٜ؞ ندٜنْ بُلُسْ اٜ بَرْنَبَ طِيوِتَنِٻٜ فُو کٛ اَللَّه حُوتِنِرِٻٜ ٻٜ نغَطِ؞
5 اَمَّا وٛٻّٜ کٛولِيٻٜ يٜىٰسُ ندٜرْ فَارِسَنْکٛعٜنْ اُمِّي، مبِعِ، «دٛولٜ تٛکُّٻٜ يٜىٰسُ نَاع يَحُودَنْکٛعٜنْ نَادٜىٰ، ٻٜ مبِعٜىٰ ٻٜ تٛکَّ کٛ اَتَّوْرَ وِعِ؞»
6 سٜيْ لِلَاٻٜ اٜ مَوْٻٜ کَوْرِتِ نغَمْ ٻٜ مٜدَّ دٛوْ حَالَ کَنْ؞
7 ندٜ ٻٜ نٜىٰٻِ اٜ ٻٜ فٛطْفٛطْتِرَ دٛوْ فِي طُمْ، بِيتُرُسْ اُمِّي وِعِٻٜ، «بَنْدِرَاٻٜ، اٛنْ اَنْدِ کٛ نٜىٰٻِ اَللَّه سُٻِييَمْ ندٜرْ مٛوطٛنْ مِ وَعَجِنَ حَبَرُ بٜلْطُمْ ندٜرْ لٜپِّ طِ نَاع يَحُودَنْکٛعٜنْ، نغَمْ ٻٜ نَنَ ٻٜ نغَرْتَ تٛکُّٻٜ يٜىٰسُ؞
8 اَللَّه اَنْدُطٛ ٻٜرْطٜ يِمْٻٜ فُو حٛلِّي اٛ جَٻِيٻٜ ندٜ اٛ حٛکِّٻٜ رُوحُ مَاکٛ نٛنْ نٛ اٛ حٛکِّرِعٜنْطُمْ؞
9 اٛ فٜىٰرٛوتِرَايِعٜنْ اٜ مَٻّٜ، نغَمْ اٛ يَافَنَکٜٻٜ حَکّٜ ندٜ ٻٜ کٛولِي يٜىٰسُ؞
10 جٛونِ، نغَمْ طُمٜ ڤٛوندٛتٛنْ اَللَّه اٛنْ نجٛوَنَ تٛکُّٻٜ يٜىٰسُ دٛنْغَلْ نغَلْ اٜنْ مبَاوَايِ رٛنْدَاکِ، اٜنٜنْ اٜ مَامَعٜنْ مٜىٰطٜنْ؟
11 اَاعَ! نٛنْ نٛ تٛکِّرْطٜنْ يٜىٰسُ جٛومِرَاوٛ کٜٻْطٜنْ کِسْندَمْ بَرْکَ يِدّٜ مَاکٛ، نٛنْ کَمْٻٜ مَا ٻٜ کِسْرَتَ؞»
12 حَوْرُتُٻٜ فُو ندٜعِّتِ کٜتِّندَنِي کٛ بَرْنَبَ اٜ بُلُسْ مبِعَتَٻٜ دٛوْ نٛ اَللَّه حُوتِنِرِٻٜ وَطِ اَلَامَاجِ اٜ کُوطٜ کَيْطِنِيطٜ ندٜرْ لٜپِّ طِ نَاع يَحُودَنْکٛعٜنْ؞
13 ندٜ ٻٜ کٜىٰݧِ مٜتُکِ، سٜيْ يَاکُبُ وِعِ، «بَنْدِرَاٻٜ، نَنٜىٰ کٛ مبِعَيْمِعٛنْ!
14 جٛونِ سِيمَنْ يٛتِّنِ طِيوِتَنْکِعٜنْ نٛ اَللَّه سُٻِرِ وٛٻّٜ ندٜرْ لٜپِّ طِ نَاع يَحُودَنْکٛعٜنْ، وَرْتِرِٻٜ يِمْٻٜ مُوطُمْ؞
15 طُمْ فٛتِّدِي اٜ کٛ اَنَّبٛعٜنْ مبِنْدُنٛو، ٻٜ مبِعِي،
16 ‹اَللَّه وِعِي، «غَطَ مَاجُمْ، مِ سٛعّٛيْتٛ،
مِ مَحِتٛتٛو وُرٛ دَوْدَ سَنْکِتَانغٛ؞
مِ مَحِتٛونغٛ،
مِ دَرْنَنغٛ کَدِمَا،
17 نغَمْ يِمْٻٜ حٛرِيٻٜ فُو طَٻِّتَ جٛومِرَاوٛ،
فُو اٜ يِمْٻٜ نَاع يَحُودَنْکٛعٜنْ نٛدِّرْتٜىٰٻٜ اِنْدٜ اَمْ؞
18 نٛنْ جٛومِرَاوٛ وِعِ، اَنْدِنْطٛ فِي طُعُمْ کٛ نٜىٰٻِ؞» ›
19 «تٛو، نغَمْ مَاجُمْ مِنْ اٜ يِيکِ اَمْ، تٛع اٜنْ نغَنُّ يِمْٻٜ نَاع يَحُودَنْکٛعٜنْ نغَيْلِتٛيِيٻٜ تٛ اَللَّه؞
20 اٜنْ مبِنْدَنْٻٜ طٜرٜوٛلْ تٛع ٻٜ ݧَامَ ݧَمْندُ حَرْمِنِيندُ ندُ طُمْ حِرْسَنِ اَلَّاجِ، تٛع ٻٜ نغَطَ نجٜىٰنُ، تٛع ٻٜ ݧَامَ کٛ مٛيْلَنَا دَاندٜ کٛو کٛ سَاطِ کٛو پِيپَمْ؞
21 نغَمْ کٛ نٜىٰٻِ اٜ طُمْ وَعَجِنَ اَتَّوْرَ اٜ کٛو ندِيٜ غَرِيرِ، اٜ طُمْ جَنْغَطُمْ کٛو ندٜيٜ ݧَلْندٜ سِوْتَارٜ ندٜرْ شُوطِ دٛعَارٜ؞»
نٛوتَاکِ اَرْدِيٻٜ کَوْتَلْ کٛولِيٻٜ يٜىٰسُ
22 سٜيْ لِلَاٻٜ اٜ مَوْٻٜ اٜ کَوْتَلْ تٛکُّٻٜ يٜىٰسُ فُو ندَرْوِ سُٻُکِ وٛٻّٜ دَغَ ندٜرْ مَٻّٜ نغَمْ ٻٜ لِلَٻٜ غَرِيرِ اَنْتَاکِيَ، ٻٜ نجَادَ اٜ بُلُسْ اٜ بَرْنَبَ؞ ٻٜ شُٻِ مَوْٻٜ طِطٛ ندٜرْ مَٻّٜ: يَحُودَ، بِعٜتٜىٰطٛ بَرْسَبَ، اٜ سِيلَ؞
23 ٻٜ کٛکِّٻٜ طٜرٜوٛلْ بِينغٛلْ:
«دَغَ بَنْدِرَاٻٜ مٛوطٛنْ لِلَاٻٜ اٜ مَوْٻٜ، اٜ مِنْ کٛوْنَعٛنْ، اٛنٛنْ بَنْدِرَاٻٜ اَمِنْ دَغَ غٛطِّ لٜپِّ غٛنْطِ ندٜرْ غَرِيرِ اَنْتَاکِيَ اٜ ندٜرْ لٜيْطٜ سِيرِيَ اٜ کِلِيکِيَ؞
24 مِنْ نَنِي حَبَرُ وٛٻّٜ ندٜرْ اَمِنْ اُمِّنَنِيعٛنْ حَکِّيلٛ اٜ مٜتٜمٜتٜىٰجِ مَٻّٜ اٜ ٻٜ نغَنَّعٛنْ، کٛو ندٜ نَاع مِنٛنْ لِلِٻٜ؞
25 کَنْجُمْ وَطِ مِنْ کَوْرِتِ کٛعٜ اَمِنْ مِنْ ندَرْوِ سُٻُکِ وٛٻّٜ ندٜرْ اَمِنْ مِنْ لِلٛيَٻٜ تٛ مٛوطٛنْ، حَوْتِ اٜ بَرْنَبَ اٜ بُلُسْ حِغٛوٻٜ اَمِنْ،
26 شٛورُٻٜ يٛنْکِيجِ مَٻّٜ نغَمْ حُوَنْکِ جٛومِرَاوٛ مٜىٰطٜنْ يٜىٰسُ اَلْمَسِيحُ؞
27 نغَمْ نٛنْ مِنْ لِلٛيِ يَحُودَ اٜ سِيلَ ٻٜ مٜدَّ اٜ مٛوطٛنْ حٛنْدُکٛ اٜ حٛنْدُکٛ دٛوْ کٛ مِنْ مبِنْدَنِعٛنْ؞
28 طُمْ دَرْوُکِ رُوحُ اَللَّه اٜ اَمِنْ، تٛع مِنْ نجٛوَنَعٛنْ وٛنْغَلْ تٜدّٛرَلْ، سٜيْ نِ طُعُمْ نَنْغُطُمْ دٛولٜ:
29 تٛع اٛنْ ݧَامُ کٛ طُمْ سَکَّنِ غُنْکِيجِ کٛو کٛ سَاطِ کٛو کٛ طُمْ مٛيْلَنِ دَاندٜ کٛو پِيپَمْ، ندٜنْ تٛع اٛنْ نغَطُ نجٜىٰنُ؞ تٛ اٛنْ شُرِي کٛعٜ مٛوطٛنْ اٜ وَطُکِ فِي طُعُمْ اٛنْ نغَطِي بٛطُّمْ؞ اَللَّه وَلَّعٜنْ!»
30 سٜيْ ٻٜ لِلِٻٜ يَاکِ اَنْتَاکِيَ؞ ندٜ ٻٜ نجٛتِّي تٛنْ، ٻٜ کَوْرِتِ تٛکُّٻٜ يٜىٰسُ، ٻٜ کٛکِّٻٜ طٜرٜوٛلْ نغٛلْ؞
31 ندٜ تٛکُّٻٜ يٜىٰسُ وٛنْٻٜ اَنْتَاکِيَ نجَنْغِنغٛلْ، ٻٜ نَنِ بٜلْطُمْ نغَمْ نغٛلْ سٜمْبِطِنِيٻٜ؞
32 ندٜ يَحُودَ اٜ سِيلَ ٻٜ اَنَّبٛعٜنْ، ٻٜ شٜمْبِطِنِ ٻٜرْطٜ تٛکُّٻٜ يٜىٰسُ، ٻٜ مبَغِّنِٻٜ دٛوْ فِي طُطُّمْ؞
33 غَطَ ٻٜ مبَالِي بَلْطٜ تٛنْ، ٻٜ طٛفْتَا ٻٜ مبَرْکِطِنِٻٜ، ٻٜ شٛعِّي تٛ لِلٛيْٻٜٻٜ؞
34 [اَمَّا سِيلَ جٛوطِي طٛنْ؞]
35 بُلُسْ اٜ بَرْنَبَ بٛو نجٛوطِي ندٜرْ اَنْتَاکِيَ اٜ يِمْٻٜ طُطْٻٜ اٜ ٻٜ اٜکِّتِنَ، اٜ ٻٜ نغَعَجِنَ وٛلْدٜ جٛومِرَاوٛ؞
بُلُسْ سٜنْدِرِي اٜ بَرْنَبَ
36 غَطَ بَلْطٜ سٜطَّ بُلُسْ وِعِ بَرْنَبَ، «اٜنْ شٛعّٛ غَرِيجٜ تٛ نغَعَجِنّٛوطٜنْ وٛلْدٜ جٛومِرَاوٛ، ندَارٜنْ نٛ تٛکُّٻٜ يٜىٰسُ نغٛنْتِندِرِ؞»
37 بَرْنَبَ اٜ يِطِ ٻٜ نجَادَ اٜ يَحَيَ بِعٜتٜىٰطٛ مَرْکُسْ؞
38 اَمَّا بُلُسْ يِعِ طُمْ حَانَايِ، نغَمْ مَرْکُسْ سٜنْدِرِينٛ اٜ مَٻّٜ اٜ لٜيْدِ بَمْفِيلِيَ، اٛ حٜىٰݧَايِ کُوغَلْ نغَلْ اٛ فُطِّدِ اٜ مَٻّٜ؞
39 ٻٜ نغٜدّٛوتِرِ نَاع سٜطَّ حَا غٜدِّ طِنْ نجَارِٻٜ اٜ سٜنْدِرْکِ؞ بَرْنَبَ حٛشِّ مَرْکُسْ، ٻٜ نَتِّ کٛمِوَلْ يَاکِ سَيِيفُرُسْ؞
40 اَمَّا بُلُسْ سُٻِ سِيلَ، دِلِّدِ اٜ مَاکٛ؞ تٛکُّٻٜ يٜىٰسُ نغَطِٻٜ ندٜرْ جُنْغٛ جٛومِرَاوٛ نغَمْ اٛ رٜىٰنَٻٜ؞
41 سٜيْ ٻٜ تٛکِّ ندٜرْ لٜيْطٜ سِيرِيَ اٜ کِلِيکِيَ، اٜ ٻٜ شٜمْبِطِنَ تٛکُّٻٜ يٜىٰسُ؞