16
Tamata boku tali Yahudi rira sidovung Farisi ovu sidovung Saduki rera ma Yesus notu faneak i tamata ra wol rot-nala
Markus 8:11-13; Lukas 12:54-56
1 Amar isa, na tamata boku tali sidovung Farisi ovu Saduki rma mane rlabir teman Yesus. Ira rera ma notu faneak i tamata ra wol rot-nala ma nfaturu ne, Ubu nsinir urun Ia.
2 Yesus nfalak verin ira ne, “Wean i lera mane nakduvul, na fyalak ne, ‘Ilyan veka lera, tevek lanit a navuli watan.’
3 Wean i varverak obin, na fyalak ne, ‘Lanit navuli ovu mutan ra rdiri, ba veka daꞌut.’ Mia mkyaꞌa ma msyiꞌik lanit, na fyalak lahir ne, veka daꞌut te wahal, naꞌuk wol fyan-aran faneak ovi fiang ini Ubu notu ra.
4 Notu afakinimi tamata ktufan ovi rvaꞌat naꞌa tuvu ini wol rorang Yaꞌa, naꞌuk rera ma otu faneak i tamata ra wol rot-nala? Fiang ini wol otu faneak akataka verin ira, naꞌuk ki ufaturu faneak isa watan verin ira, wean faneak i lan a Ubu notu roak verin nabi Yunus.” Yesus nfalak munuk wean inyai, beti nban-talik ira.
Yesus nfalak ma Ni tamata ra rsiꞌik warira ma lolin naꞌa sidovung tamata Farisi ovu sidovung tamata Saduki rira afa ovi rair ra
Markus 8:14-21
5 Yesus ovu Ni tamata ovi rorang Ia raran danau ni lihir a, naꞌuk Ni tamata ra rablufang ma rtaha roti. Naꞌut inyai, na
6 Yesus nfalak verin ira ne, “Msyiꞌik wabira ma lolin. Msyiꞌik ma lolin tamata Farisi ovu tamata Saduki rira ragi a!”
7 Yesus Ni tamata ra wol rfan-aran Ni vaivatul ra, ba kaꞌi rsifalak afa verin ira ne, “Ia nfalak wean inyai, tevek tablufang ma tataha roti.”
8 Naꞌuk Yesus nkaꞌa afa ovi rfalak ra, ba norat ira ne, “Notu afakinimi msyifalak afa naꞌa i wol mtyaha roti i? Mia bira inorang a koꞌu daꞌin!
9 Mia wol fyan-aran obin! Wol mingnanang amar i uvisul roti ilima ma ufaꞌan tamata rivun ilima? Miblufang vali ne, misdovuk teran ra naꞌa ahir ifira?
10 Wean inba vali naꞌa amar i uvisul roti ifitu ma ufaꞌan tamata rivun ifaꞌat a? Misdovuk teran ra naꞌa ahir ifira?
11 Notu afakinimi wol fyan-aran obin ne, wol ufamalik naꞌa roti! Msyiꞌik ma lolin tamata Farisi ovu tamata Saduki rira ragi a.”
12 Ba Ni tamata ra beti rfan-aran ne, Yesus wol nfamalik ragi i tamata ra baꞌi rfadoku naꞌa roti. Ia nfamalik wean inyai, boma rsiꞌik warira ma lolin naꞌa Farisi ovu Saduki rira afa ovi rair ra.
Petrus nfamalik Yesus ne, Raja i ntevut dida salasilan ra
Markus 8:27-30; Lukas 9:18-21
13 Yesus ovu Ni tamata ovi rorang Ia rti wan ovi sarseri ovu kota Kaisarea Filipi. Ia nanaꞌa inyai, na norat ira ne, “Tamata ra rfalak ne, Tamata Yanan yai, iki ia?”
14 Ira rfalak ne, “Tamata boku rfalak ne, Oa ini Yohanes i nbaptis tamata ra. Boku rfalak ne, Oa ini nabi Elia. Boku vali rfalak ne, Oa ini nabi Yeremia, te nabi liak isa vali.”
15 Ba norat ewal ira ne, “Naꞌuk mia fyikir ne, Yaꞌa ini iki?”
16 Simon Petrus nfalak ne, “Oa ini Raja i mtevut mami salasilan ra, ovu Ubu i nvaꞌat a, Yanan Oa.”
17 Yesus nfalak verin ia ne, “Ubu naflahar oa, Simon i yamam verin Yunus, tevek tamata ra wol rfavotuk afa ini verin oa, naꞌuk tali Yamang i naꞌa lanit ratan a.
18 Ufalak vali verin oa ne, naram a Petrus, ihin a vatminan. Yaꞌa veka ufadiri Ning sidovung tamata ovi rorang Yaꞌa naꞌa vatminan ini ratan a. Matmatan ni ngrebat wol nfalek-nala ira.
19 Yaꞌa wean ala kusi tali Ubu Ni Fareta ma ufadoku naꞌa limam ralan a, boma wean i fwalak teri afaka watan naꞌa lanit ivavan a, na Ubu nfalak teri vali naꞌa lanit ratan. Wean i mtorung afaka watan naꞌa lanit ivavan a, na Ubu veka ntorung vali naꞌa lanit ratan.”
20 Nata nfalak teri ma deka rfamalik verin tamata ra ne, Ia Raja i ntevut rira salasilan ra.
Yesus nfamalik Ni matmatan a
Markus 8:31—9:1; Lukas 9:22-27
21 Tali amar yai vali, na Yesus nfalyawang verin Ni tamata ovi rorang Ia ne, afaka veka nkena Ia. Ia nfamalik verin ira ne, musti nti Yerusalem ma dawan Yahudi ra, Yahudi rira dawan mela falurut ra ovu vali Yahudi rira dawan ovi rair Musa ni inukun ra veka rotu sian Ia tia ma watan. Ira vali veka rfedan Ia, naꞌuk amar itelu nelak, na Ubu veka nfavaꞌat ewal Ia.
22 Ba Petrus novun Ia ma rdir-aling ira, beti ntabu Ia nfalak ne, “Duilaꞌa, deka fwalak wean inyai! Era verin Ubu, boma afa yai deka nkena Oa.”
23 Naꞌuk Yesus ndir-tamuri Petrus, beti nfalak verin ia ne, “Nitdawan, muti vatuk oa tali ini! Oa mangal Yaꞌa ma deka ot-orang Ubu Ni banbanan verin Yaꞌa. Afa ovi fwikir ra wol rtali Ubu, naꞌuk rtali watan tamata ra.”
Tamata ovi rorang Yesus musti rtorung ma rtuan susa
24 Nata, Yesus nfalak verin Ni tamata ra ne, “Tamata iki inan ma norang Yaꞌa, na ia musti nalak tenan a ovu nvara ni aa walwalur ma norang aꞌuk Yaꞌa.
25 Tamata iki watan inan ma ntahang teri ni vavaꞌat i naꞌa lanit ivavan a, na ia wol ni vavaꞌat kakiwal a. Naꞌuk tamata iki nablufang ni vavaꞌat a tevek norang Yaꞌa, na veka ni vavaꞌat kakiwal.
26 Wean i tamata isa nasdovu munuk metan ovi rnaꞌa lanit ivavan a, naꞌuk wol ni vavaꞌat kakiwal, na ihin aka? Ia ki nala aka ma al nkati vavaꞌat kakiwal yai? Wol nala akataka lahir!
27 Ba myorang aꞌuk Yaꞌa ovu ralabira urun, tevek Ning amar veka nma ma Yaꞌa, Tamata Yanan Yaꞌa veka uma ewal, ovu Yamang Ni ngrebat i nfitik nyadat a, ovu vali Ni sansinir ra tali lanit ratan rovu vali Yaꞌa. Naꞌut amar yai, na veka ukun tamata ra munuk ma inovan ovu afa ovi rotu ra.
28 Afa i ufalak verin mia ini, kena urun! Tali bir tinemun naꞌa wan ini, na tamata boku wol rmata obin, naꞌut inyai na ira veka rsiꞌik lahir Yaꞌa Tamata Yanan Yaꞌa veka uma ma ufareta wean lahir Raja.”