6
1 Terang a valing averi! Amkarya verin Ubu, ba amsurak mia, boma deka myotu ma Ni rala lolin i nala roak verin mia yai, wol ihin lahir naꞌa bira vavaꞌat ra.
2 Tevek Ubu nfalak roak naꞌa Surat Ralan ne:
“Naꞌut amar i ralang a nfalak a, na Yaꞌa urenar mu falurut a,
ovu naꞌut amar i usikat tamata ra tali rira salasilan ra, ma rira vavaꞌat kakiwal, na Yaꞌa ulobang vali oa.”
Mingnanang ma lolin, tevek amar ini, amar i Ubu ralan a nfalak. Amar ini vali amar i Ubu notu lingaꞌan ma nsikat tamata ra tali rira salasilan ra, ma rira vavaꞌat kakiwal.
Paulus ntuan angangal naꞌa Ubu Ni karya ralan a
3 Naꞌa afaka watan, na amsahak urun ma amfabana ma lolin mami vavaꞌat ra, boma tamata ra deka rfasala ami naꞌa mami karya ra.
4 Naꞌuk amfaturu ne, ameluk tamata sansinir verin Ubu naꞌa afa ovi amotu ra munuk. Amtahang nal ralamami ra naꞌa susa ovi tamata ra rotu verin ami, ovu naꞌa susa afaka watan.
5 Amtahang ralamami ra naꞌut amar ovi tamata ra rwi-rwa ami, ovu rvaval ami, ovu vali raꞌabuꞌi ami. Amkarya urun ia, nata amakla watan, ovu amar boku, na wol amtuba ovu amtolat watan.
6 Amfaturu ne, Ubu Ni tamata sansinir verin ami naꞌa afa ovi amotu ra, ovu ralamami ra rmerat urun, ovu vali amfaturu naꞌa mami kakaꞌa ra. Amtahang nal ralamami ovu amarkai, ovu Ubu Ni Roh a nkarya naꞌa ralamami ra, ovu vali amlobang tamata liak ra ovu ralamami urun.
7 Amfamalik afa ovi kena ra, ovu Ubu Ni ngrebat a nfangrebat ami naꞌa afa ovi amotu ra. Afa ovi amotu ra munuk rmalola, ba afa avyai reluk minak verin ami ma amlotar mami inorang a, ovu vali amangal tamata ovi rangal ami.
8 Tamata boku ralang ami, naꞌuk boku rfamaꞌit vali ami. Boku rfadawang ami, naꞌuk boku rfalak sian vali ami. Ami amfalak lalawatan afa ovi kena ra, naꞌuk tamata boku rfalak ne, amsiklabir.
9 Ira ranovak ne, tamata ra wol rkaꞌa ami, naꞌuk velik aba, tamata ovi rorang Yesus rkaꞌa lahir ami. Ira rfikir ne amamata roak, naꞌuk amvaꞌat obin. Velik ne rwi-rwa ami, naꞌuk wol amamata.
10 Velik ne rotu ma ralamami lalau, naꞌuk ralamami lolin urun. Ami tamata kasian ami, naꞌuk amotu ma tamata rivun rkaꞌi naꞌa rira inorang a. Ira ranovak vali ne, ami wol mami afakataka, naꞌuk velik aba, ami mami munuk afakataka.
11 Terang a valing ovi mnyaꞌa kota Korintus. Ami amfalak munuk roak ralamami ra, ovu vali amlobang urun mia.
12 Amfaturu mami silobang verin mia, naꞌuk mia wol fyaturu bira silobang verin ami.
13 Terang a valing averi, deka fyonak ralabira ra verin ami, wean ami vali wol amfonak ralamami ra verin mia, tevek fiang ini ungrihi wean lahir i ungrihi verin yanak ra.
Deka isa mia ovu tamata ovi wol rorang Yesus
14 Terang a valing averi! Deka isa mia ovu tamata ovi wol rorang Yesus, tevek lafirba ma afa ovi lolin ra, ovu afa ovi sian ra, isa ira? Te wean inba ma tamata ovi rbana naꞌa lyawan a, ovu tamata ovi rbana naꞌa ngarmeran a, isa ira?
15 Wol mane trea lahir ne, Yesus irua nitdawan a raꞌan vai isa! Te tamata ovi rorang Yesus ovu tamata ovi wol rorang Yesus rira vavaꞌat ra wear isa? Wahal lahir!
16 Ubu Ni Rahan Dawan Falurut a ovu wan i baꞌi rfadoku walut ra naꞌa wol wear isa. Ita weadida lahir Ubu i nvaꞌat Ni Rahan Dawan Falurut a. Ia nfalak roak naꞌa Ni Surat Ralan ne:
“Yaꞌa veka uti unaꞌa fruarira ra,
ma uvaꞌat ovu ira.
Yaꞌa veka eluk Ubu verin ira,
ovu ira veka reluk Ning tamata ovi rorang Yaꞌa.
17 Wean inyai, bi fyaroa mia tali tamata ovi wol rkaꞌa Ubu,
ovu mdyir-talik ira. Deka mkyena lahir tamata avyai rira afa ovi ngra-ngrodi ra,
boma ala mia ma myeluk Ning tamata ovi rorang Yaꞌa.
18 Yaꞌa veka eluk Yamabira, ovu
mia veka myeluk yanak brana ra ovu yanak vata ra.
Vaivatul avyai rtali Duilaꞌa i Ni ngrebat a nlia munuk.”